កូរ៉េខាងត្បូង ត្រូវបានគេចាត់ទុកថាជាប្រទេសដែលមានកំណើនសេដ្ឋកិច្ចខ្លាំងជាងគេបំផុតមួយក្នុងតំបន់អាស៊ីលើគ្រប់វិស័យ ប៉ុន្តែថ្មីៗនេះបញ្ហាអត្រាបង្កកំណើតទាបបានក្លាយទៅជាវិបត្តិថ្មីដែលគួរឲ្យព្រួយបារម្ភបំផុតសម្រាប់រដ្ឋាភិបាល និងអនាគតរបស់ប្រទេសជាតិ។

កូរ៉េខាងត្បូងត្រូវបានគេដាក់ចំណាត់ថ្នាក់ជាប្រទេសដែលមានអត្រាបង្កកំណើតទាបជាងគេបំផុតបំផុតលើពិភពលោក ឬ Lowest Fertility Rate ដែលជាមធ្យមនៅពេលបច្ចុប្បន្ននេះ ស្ត្រីជនជាតិកូរ៉េខាងត្បូងម្នាក់អាចមានឱកាសក្នុងការបង្កកំណើតត្រឹមតែ ០,៧៨នាក់ប៉ុណ្ណោះក្នុងមួយជីវិតរស់នៅរបស់ពួកគេធៀបទៅនឹងអត្រាបង្កកំណើតរបស់មានសេដ្ឋកិច្ចខ្លាំងក្នុងបញ្ជី OECD ដែលមានទៅដល់ ១ ៥៩នាក់។

រដ្ឋាភិបាលបានធ្វើចំណាត់ការជាច្រើនរួចមកហើយដើម្បីលើកទឹកចិត្តពលរដ្ឋឲ្យព្យាយាមបង្កកំណើតឲ្យបានច្រើនជាងមុន ហើយនៅក្នុងឆ្នាំ២០២៣នេះ កូរ៉េខាងត្បូងនឹងធ្វើការអនុវត្តកញ្ចប់ជំនួយជាសាច់ប្រាក់សុទ្ធប្រមាណជា ៧៧០ដុល្លារក្នុងមួយខែដល់គ្រួសារទាំងឡាយណាដែលផ្តល់កំណើតបានកូនម្នាក់ ហើយបន្តទទួលបានប្រាក់ឧបត្ថម្ភធននេះរហូតដល់កូនៗមានអាយុបាន១ឆ្នាំ។

នៅក្នុងកិច្ចខិតខំប្រឹងប្រែងដើម្បីប្រយុទ្ធប្រឆាំងទៅនឹងបញ្ហាអត្រាបង្កកំណើតទាប និងចំនួនពលរដ្ឋធ្លាក់ចុះផងនោះរដ្ឋាភិបាលប្រទេសកូរ៉េបន្តបង្កើនកញ្ចប់ប្រាក់ជំនួយបែបនេះអស់រយៈពេល៣ឆ្នាំជាប់គ្នាមកហើយ ពោលគឺប្រមាណជា ២៣០ដុល្លារក្នុងមួយខែកាលពីឆ្នាំទៅ និងប្រមាណជា ៥៤០ដុល្លារក្នុងមួយខែសម្រាប់យុទ្ធនាការបច្ចុប្បន្ន និងចុងក្រោយនេះ ៧៧០ដុល្លារក្នុងមួយខែ។

បញ្ហាចំនួនពលរដ្ឋធ្លាក់ចុះមិនត្រឹមតែមកពីបញ្ហាអត្រាបង្កកំណើតទាបនោះទេ ដោយឡែកអត្រាមរណភាពក៏កំពុងកើនឡើងផងដែរ បានធ្វើឲ្យមានការព្រួយបារម្ភ និងព្យាករណ៍ទុកថា ចំនួនពលរដ្ឋពេញវ័យធ្វើការងារនឹងធ្លាក់ចុះដល់ទៅពាក់កណ្តាលនៃពលរដ្ឋសរុបនៅត្រឹមឆ្នាំ២០៧០ខាងមុខនេះ។

ទោះបីជាយ៉ាងណាក្តី កូរ៉េខាងត្បូងមិនមែនជាអ្នកដែលជួបប្រទះបញ្ហានេះតែម្នាក់ឯងនោះទេ ដោយសារតែបច្ចុប្បន្នគេក៏អាចមើលឃើញដែរថាអត្រាបង្កកំណើតរបស់ពលរដ្ឋពិភពលោកក៏មានការធ្លាក់ចុះគួរឲ្យកត់សំគាល់ផងដែរ ពី២,៧នាក់កាលពីឆ្នាំ២០០០ មកត្រឹមតែ ២,៣នាក់ប៉ុណ្ណោះក្នុងឆ្នាំ២០២៣នេះ ខណៈដែលអង្គការសហប្រជាជាតិបានទស្សន៍ទាយថា ពលរដ្ឋពិភពលោកនឹងកើនឡើងទៅដល់ ១០,៤ពាន់លាននាក់នៅត្រឹមឆ្នាំ២០៨០៕