សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បង្គាក្រៀម ជាប្រភេទអាហារកែច្នៃដែលប្រជាជនទូទៅនិយមទទួលទាន ដោយសារវាអាចរក្សាទុកបានយូរ និងអាចបន្ថែមឱជារសក្នុងមុខម្ហូបផ្ទាល់តែម្ដង។ ចំណែកអាជីវកម្មផលិតបង្គាក្រៀមនេះផងដែរ ភាគច្រើនគេឃើញមាននៅតាមបណ្តាខេត្តមួយចំនួន ជាពិសេសនៅតំបន់សមុទ្រ ដោយក្នុងនោះមានទាំងការផលិតជាលក្ខណៈគ្រួសារ(អាជីវកម្មធុនតូច) ជាលក្ខណៈសិប្បកម្ម (អាជីវកម្មធន់មធ្យម) ហើយរហូតមកដល់ពេលបច្ចុប្បន្ននេះ ស្ទើរតែគ្រប់អាជីវកម្មទាំងនោះក៏នៅតែមានភាពសកម្ម។
សិប្បកម្មកែច្នៃ វង្ស តារា ជាសិប្បកម្មមួយក្នុងចំណោមសិប្បកម្មជាច្រើនដែលកំពុងមានភាពមមាញឹកក្នុងការកែច្នៃទិន្នផលនេសាទ ស្ថិតនៅភូមិ២ ឃុំពាមក្រសាប ស្រុកមណ្ឌលសីមា ខេត្តកោះកុង ដែលកំពុងមមាញឹកផលិតនូវបង្គាក្រៀមមានគុណភាពកម្រិតស្តង់ដារ ដើម្បីផ្គត់ផ្គង់លើទីផ្សារទាំងនៅក្នុងស្រុក ខណៈដែលសិប្បកម្មបានយកចិត្តទុកដាក់ខ្លាំងទៅលើគុណភាព និងសុវត្ថិភាពផលិតផល ដែលអាចឱ្យបង្គាក្រៀមរបស់ខ្លួនអាចដាក់លក់នៅតាមបណ្ដាផ្សារទំនើប ក៏ដូចជាផ្សារម៉ាក្រូ ជាដើម ជាពិសេស ឈានទៅដល់ការនាំចេញទៅកាន់បណ្តាប្រទេសក្នុងតំបន់ ក៏ដូចជាទីផ្សារអន្តរជាតិ។
លោក វង្ស តារា ជាម្ចាស់សិប្បកម្មខាងលើបានប្រាប់ឱ្យដឹងថា៖
«សិប្បកម្មយើងមានផលិត និងកែច្នៃអាហារសមុទ្រក្រៀម ដូចជា បង្គាក្រៀម គ្រំចំពុះទា ត្រីក្រៀម និងកាពិ ដែលជាផលនេសាទនៅក្នុងខេត្តកោះកុងផ្ទាល់ ហើយផលិតផលដែលលក់ដាច់ជាងគឺបង្គាក្រៀម ដែលមានការទទួលស្គាល់គុណភាព និងស្តង់ដារពីរដ្ឋបាលជលផល CQS មូលដ្ឋាន»។
លោកបន្ថែមថា៖
«សម្រាប់បង្គាក្រៀម យើងអាចផលិតបានប្រមាណជាង ១០០គីឡូក្រាម ក្នុងមួយខែ ដែលត្រូវការបង្គាស្រស់ប្រមាណ ១តោន ទិញពីប្រជានេសាទក្នុងសហគមន៍ ហើយយើងក៏មានអតិថិជនច្រើន មានទាំងអ្នកទិញរាយ អាចថាជាភ្ញៀវទេសចរដែលទៅលេងខេត្តកោះកុង លក់ឱ្យភោជនីយដ្ឋាន ផ្សារម៉ាតនៅភ្នំពេញ ខេត្តសៀមរាប បាត់ដំបង និងផ្សារទំនើបម៉ាក្រូផងដែរ»។
សម្រាប់តម្លៃវិញ អាជីវកម្មផលិតបង្គាក្រៀមត្រូវចាយថ្លៃដើមច្រើនសម្រាប់ទិញបង្គាស្រស់ៗ តួយ៉ាងបង្គាខេត្តកោះកុងសម្បូរនៅរដូវភ្លៀង ដោយគេអាចទិញចូល ២ប្រភេទ គឺបង្គាខ្នាតតូចតម្លៃ ៧០០០-៨០០០រៀល និងខ្នាតធំ ១៣០០០-១៤០០០រៀល ហើយពេលផលិតចេញជាបង្គាក្រៀម អាចលក់បានក្នុងតម្លៃ ១២ម៉ឺនរៀលចំពោះបង្គាលេខ២ និង ១៦ម៉ឺនរៀលសម្រាប់បង្គាលេខ១ ដែលមានគ្រាប់ធំៗល្អ។ ក្រៅពីនេះ ក៏មានផ្នែកដែលបាក់ៗផ្សេងទៀត ភាគច្រើនគេលក់ឱ្យអាហារដ្ឋានក្នុងតំបន់ក្នុងតម្លៃត្រឹម ៦ម៉ឺនរៀលផងដែរ។
សម្រាប់គុណភាពបង្គាក្រៀមវិញ ភាគច្រើនគេទទួលស្គាល់ដោយសារ សាច់បង្គាក្រហមល្អ មិនប្រៃខ្លាំង ប្រើបង្គាស្រស់ៗជាប្រភេទបង្គាដៃព្រែកមានសាច់ល្អ និងត្រូវបានផលិតដោយគិតគូរពីគុណភាព សុវត្ថិភាព និងការសម្ងួតក្នុងផ្ទះកញ្ចក់ផ្ទាល់តែម្ដង។
បើនិយាយពីដំណើរការផលិតវិញ លោក វង្ស តារា ម្ចាស់សិប្បកម្មរូបនេះបានរៀបរាប់ថា ៖
«ដើម្បីផលិតបង្គាក្រៀម ដំបូងយើងត្រូវទិញបង្គាពីបងប្អូនប្រជានេសាទយកមកលាងសម្អាតទាំងទឹកធម្មតា និងទឹកចម្រោះឱ្យបានស្អាត រួចដាក់ឱ្យស្រស់ទឹកសិន។ បន្ទាប់មកដាំទឹកឱ្យពុះ សឹមបង់បង្គាចូល រួចទុកឱ្យពុះម្ដងទៀត ដោយចំណាយពេលប្រមាណ ១ម៉ោង ទុកយ៉ាងណាឱ្យបង្គាឆ្អិនល្អ បង់អំបិលប្រមាណ កន្លះគីឡូក្រាមក្នុ្ងងមួយឆ្នាំង។ បន្ទាប់មកទៀត យើងស្រស់បង្គាមកសម្រោះទឹក ហើយដាក់ចូលទូរសម្ងួតទុកប្រមាណ ៨-១០ម៉ោង ទើបយកចេញមកបោកសំបកភ្លាមៗកុំឱ្យត្រជាក់ទាន់ រួចរែងយកកម្ទេចចេញ អុំសម្អាត រើសយកបង្គាល្អៗតាមខ្នាតលេខ១ ឬលេក២ ហើយឆ្កឹះយកកន្ទុយឱ្យស្អាតម្ដងទៀត ទើបអាចវេចខ្ចប់ និងបញ្ជូនទៅកន្លែងរក្សាទុកផលិតផលបាន។ ដោយឡែក ផ្នែកដែលសេសសល់ដូចជាកម្ទេចម៉ដ្ឋៗ ឬហៅថាកន្ទក់ អាចលក់បានក្នុងតម្លៃ ១០០០រៀលក្នុងមួយគីឡូក្រាម ដែលភាគច្រើនគេទិញទៅធ្វើជី ឬលាយធ្វើជាចំណីសត្វ»។
យ៉ាងណាក៏ដោយ ត្បិតថាបង្គារក្រៀមមានតម្រូវការទីផ្សារ និងការគាំទ្រច្រើនពីអតិថិជន ប៉ុន្តែសិប្បកម្ម វង្ស តារា ក៏បានចួបប្រទះនឹងបញ្ហាមួយចំនួន ដែលភាគច្រើនទាក់ទងនឹងកង្វះខាតដើមទុនក្នុងការទិញវត្ថុធាតុដើមសម្រាប់ផលិតឱ្យទាន់តម្រូវការទីផ្សារ ណាមួយការផលិតក៏នៅមានកម្រិតនៅឡើយទាក់ទងនឹងការបោកសម្អាតសំបកបង្គាផ្សេងៗ គឺមិនទាន់មានម៉ាស៊ីននៅឡើយទេ។
ជាចុងក្រោយ ម្ចាស់សិប្បកម្ម វង្ស តារា ក៏សូមថ្លែងអំណរគុណដល់អតិថិជនជិតឆ្ងាយដែលតែងតែគាំទ្រដល់សិប្បកម្មកែច្នៃក្នុងស្រុកដែលមានស្តង់ដារ និងអនាម័យ អាចដំណើរការដល់ថ្ងៃនេះ ហើយក៏បានចូលរួមជួយដល់ជីវភាពសហកមន៍ក្នុងតំបន់ ក៏ដូចជាប្រជានេសាទផងដែរ៕
Account
Security
Favourite Content