ក្នុងពេលដែលតំបន់អឺរ៉ុប និងលោកខាងលិចកំពុងមានបញ្ហាខ្លួនឯងមិនទាន់ដោះស្រាយរួចរាល់ផងនោះ អង្គការយោធាដែលដឹកនាំដោយសហរដ្ឋអាមេរិក ឬហៅកាត់ថាណាតូ NATO កាលពីដើមខែឧសភាកន្លងមកនេះបានធ្វើការប្រកាសនូវផែនការដ៏គួរឲ្យភ្ញាក់ផ្អើលមួយគឺជាផែនការពង្រីកខ្លួននៅក្នុងតំបន់អាស៊ីទៅវិញ។

ដំណឹងនេះបានធ្វើឲ្យមានការភ្ញាក់ផ្អើលយ៉ាងខ្លាំងពីសំណាក់បណ្តាប្រទេសលើពិភពលោក ហើយក៏មិនមានអ្នកណាដែលសប្បាយចិត្តជាងគេក្រៅតែពីប្រទេសជាសម្ព័ន្ធមិត្តជិតស្និទ្ធ និងជាអតិថិជនទិញអាវុធជាយូរមកហើយរបស់អាមេរិក ដូចជា ជប៉ុន, កូរ៉េខាងត្បូង, អូស្ត្រាលី និងញូវស៊ឺឡេននោះដែរ។

ណាតូប្រកាសថានឹងបើកដំណើរការប្រតិបត្តិការការិយាល័យតំណាងរបស់ខ្លួនជាផ្លូវការរបស់ខ្លួននៅក្នុងប្រទេសជប៉ុន និងត្រូវបានគេចាត់ទុកថាជាប្រវត្តិសាស្ត្រមិនធ្លាប់មានរបស់ណាតូឡើយនៅក្នុងតំបន់អាស៊ីដោយផ្តោតសំខាន់លើការប្រឹក្សាផ្នែកសន្តិសុខជាមួយនឹងដៃគូរបស់ខ្លួនទាំងអស់នៅទីនេះ។ វត្តមានការិយាល័យអង្គការណាតូក៏មានបំណងក្នុងការលើកកំពស់កិច្ចសហប្រតិបត្តិការ ជាពិសេសជាមួយនឹងជប៉ុនផងដែរទៅលើកិច្ចការងារសំខាន់ៗមួយចំនួនដូចជាការប្រយុទ្ធប្រឆាំងនឹងឧក្រិដ្ឋកម្មអនឡាញ ព័ត៌មានមិនពិត និងបច្ចេកវិទ្យាខុសច្បាប់នានាក្នុងតំបន់។ ទោះបីជាមិនទាន់មានដំណើរការអ្វីគួរឲ្យកត់សំគាល់នាពេលក្រោយមកទៀត ប៉ុន្តែតាមផែនការរបស់ណាតូកិច្ចប្រជុំទ្វេភាគីនឹងធ្វើឡើងម្តងទៀតចំពោះបញ្ហានេះមុនកិច្ចប្រជុំកំពូលរបស់អង្គការណាតូនាថ្ងៃទី១១ និងថ្ងៃទី១២ ខែកក្កដាក្នុងទីក្រុង Vilnius ប្រទេស Lithuania។

សប្តាហ៍នេះប្រធានាធិបតីបារាំង លោក Emmanuel Macron បានចេញមកធ្វើការប្រតិកម្មចំពោះផែនការនេះដោយបដិសេធមិនអាចឲ្យមានដំណើរការការិយាល័យអង្គការណាតូនៅក្នុងតំបន់អាស៊ីជាដាច់ខាតដោយព្រមានថាវានឹងក្លាយទៅជាកំហុសដ៏ធ្ងន់ធ្ងរមួយ។

កាលពីដើមខែមិថុនាកន្លងមកនេះ ក្រសួងការបរទេសចិនក៏បានចេញមកធ្វើការព្រមានផងដែរថា អាស៊ីនឹងមិនស្វាគមន៍ចំពោះការប្រឈមមុខដាក់គ្នាដោយនយោបាយ ឬប្រឈមមុខដាក់គ្នាដោយយោធានោះដែរ ហើយណាតូមិនគួរស្វែងរកការពង្រីកឥទ្ធិពលរបស់ខ្លួននៅក្នុងតំបន់អាស៊ីឡើយ។

រំលឹកដែរថា ផែនការនេះត្រូវបានពិភាក្សា និងផ្តួចផ្តើមគំនិតដំបូងដោយអតីតនាយករដ្ឋមន្ត្រីជប៉ុន Shinzo Abe តាំងតែពីឆ្នាំ២០០៧គ្រាដែលលោកបានបំពេញទស្សនកិច្ចទៅអគារការិយាល័យកណ្តាលអង្គការណាតូ ហើយក្រោយមកទើបតែត្រូវបានលើកឡើងមកពិភាក្សាម្តងទៀតកាលពីប៉ុន្មានខែមុន ជាពិសេសអំឡុងពេលដែលលោកនាយករដ្ឋមន្ត្រីជប៉ុនបច្ចុបន្ន Fumio Kishida បានក្លាយជាមេដឹកនាំជប៉ុនដំបូងបំផុតដែលចូលរួមក្នុងកិច្ចប្រជុំកំពូលជាផ្លូវការរបស់អង្គការណាតូកាលពីឆ្នាំទៅ៕