ក្នុងការរក្សាធនធានណាមួយឱ្យគង់រង្ស គេចាំបាច់ត្រូវបង្កើតជាមជ្ឈមណ្ឌលដែលធ្វើការផ្ដោតសំខាន់លើវាតែម្ដង។ ជាក់ស្ដែង រុក្ខជាតិកេសរកូល ដែលជាធនធានដ៏សំខាន់មួយសម្រាប់មនុស្សជាតិ ទាមទារយ៉ាងចាំបាច់ឱ្យមានមនុស្សមួយក្រុមមានការសិក្សាដោយយកចិត្តទុកដាក់លើវា​ ដើម្បី​អាចឈានទៅរក្សាវត្តមានរបស់វាបាន។

ជាការពិត កេសរកូលត្រូវបានគេប្រើជារុក្ខជាតិសម្រាប់វាស់ស្ទង់ពីភាពចម្រុះនៃប្រព័​ន្ធអេកូឡូស៊ីក្នុងតំបន់ដែលវាលូតលាស់នៅ ម្ល៉ោះហើយបានជាគេត្រូវសិក្សាយ៉ាងហ្មត់ចត់លើបរិស្ថានជុំវិញកេសរកូល ដើម្បីធានាការរស់នៅរបស់ធនធានដទៃទៀត។

បច្ចុប្បន្ន កម្ពុជាមានទីតាំងមួយដែលសិក្សាផ្ដោតសំខាន់ទៅលើកេសរកូល គឺ «មជ្ឈមណ្ឌលស្រាវជ្រាវ និងអភិរក្ស​កេសរ​កូលសុខអានភ្នំគូលេន»។ មជ្ឈមណ្ឌលនេះស្ថិតក្នុងស្រុកបន្ទាយស្រី នៅជើងភ្នំ​គូលែន​ដែលជាច្រកឡើងទៅកាន់រមណីយដ្ឋានភ្នំគូលែនតែម្ដង។ មជ្ឈមណ្ឌលនេះបង្កើតឡើងនៅឆ្នាំ២០១៩ ដោយមានដីទំហំ ២០២០ ហិកតា។

មជ្ឈមណ្ឌលនេះមានគោលបំណង៤ធំៗ ៖ ទី១គឺ គាំទ្រដល់សិក្សាស្រាវជ្រាវកេសរកូល, ទី២គឺ ថែរក្សា អភិរក្សកេសរកូលព្រៃ និងរុក្ខជាតិនានារបស់កម្ពុជា, ទី៣គឺ អប់រំផ្សព្វផ្សាយដើម្បីឱ្យប្រជាពលរដ្ឋ​បានយល់ដឹងពីសម្បត្តិធម្មជាតិ និងទី៤គឺ ផ្សារភ្ជាប់សេដ្ឋកិច្ចទៅនឹងការអភិរក្ស មានន័យថាមជ្ឈមណ្ឌល​នេះ​ នឹងបង្កើតនូវរមណីយដ្ឋានដើម្បីឱ្យប្រជាពលរដ្ឋចូលមកទស្សនា ក៏ដូចជាអាចឱ្យពលរដ្ឋក្នុងតំបន់អាច​រកចំណូលបានបន្ថែម។ នេះបើតាមការឱ្យដឹងរបស់លោកជំទាវ ចាន់ សុម៉ាលី អនុរដ្ឋលេខាធិការ​​ក្រសួងបរិស្ថាន ទទួលបន្ទុកលើមជ្ឈមណ្ឌលស្រាវជ្រាវ​ សុខអានភ្នំគូលេន។

លោកជំទាវ ចាន់ សុម៉ាលី បានមានប្រសាសន៍រៀបរាប់ថា ៖

“យើងបានរៀបចំផែនការមេ​ដើម្បីគ្រប់គ្រងតំបន់នេះ ដែលយើងបានបែងចែកជា ១៦តំបន់ ក្រៅពីតំបន់អភិរក្ស និងតំបន់​អាងស្តុបទឹក យើងនៅមានតំបន់អភិរក្ស និងតំបន់សម្រាប់អភិវឌ្ឍន៍ ក្នុងនោះតំបន់​សំខាន់ៗ​មានដូចជា តំបន់សម្រាប់ថែរក្សាពូជរុក្ខជាតិក្នុងស្រុក តំបន់អភិវឌ្ឍន៍ទេសចរណ៍ធម្មជាតិ​ដែលយើងបង្កើតជាការ បោះជំរុំ ការដើរចូលទៅកម្សាន្ដនៅក្នុងព្រៃ”

នៅលើផ្ទៃដីទំហំជាង ២ ០០០ហិចតានេះផងដែរ ក៏មាននូវតំបន់ចិញ្ចឹមសត្វ ធ្វើកសិកម្មអភិរក្ស ដែលជួយសេដ្ឋកិច្ចប្រជាពលរដ្ឋ និងជួយរក្សាដីឱ្យមានជីវជាតិឡើងវិញ ដែលអាចឱ្យប្រជាកសិករ​ធ្វើកសិកម្មបានដោយមិនប៉ះពាល់ ដល់គុណភាពដី។ ប៉ុន្តែយ៉ាងណា មជ្ឈមណ្ឌលក៏កំពុងជួបបញ្ហាខ្វះធនធានមនុស្សផងដែរ ដោយអ្នកសិក្សាជំនាញបច្ចេក ទេសធ្វើចំណាត់ថ្នាក់នេះមានតិចតួចនៅឡើយ។ បច្ចុប្បន្ននេះ ខាងមជ្ឈមណ្ឌលបានចុះអនុស្សារណៈ យោគយល់ជាមួយមន្ទីរពិសោធន៍ក្រៅស្រុក ដើម្បីជួយកំណត់អត្តសញ្ញាណរុក្ខជាតិកេសរកូលរបស់ កម្ពុជា ខណៈដែលកម្ពុជាមិនមានសម្ភារៈ និងលទ្ធភាពគ្រប់គ្រាន់ក្នុងការធ្វើដោយខ្លួនឯង៕