សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្រូវ ជាដំណាំចម្បងមួយក្នុងវិស័យកសិកម្មនៃប្រទេសកម្ពុជា ដោយក្នុងនោះកសិករផលិតស្រូវមានគោលបំណងចំនួន៣ធំៗគឺ ដើម្បីបរិភោគ លក់ និងធ្វើពូជ ហើយដើម្បីសម្រេចបំណងទាំងនោះ ទាមទារឱ្យកសិករយល់ដឹងពីបច្ចេកទេសសំខាន់មួយគឺការជ្រើសរើសពូជស្រូវ។
បើតាមការផ្សព្វផ្សាយរបស់ក្រសួងកសិកម្ម រុក្ខាប្រមាញ់ និងនេសាទ ការជ្រើសរើសពូជស្រូវជាជំហានមូលដ្ឋាន និងចាំបាច់មួយក្នុងការផលិតស្រូវ ដោយកសិករត្រូវយល់ដឹង និងអនុវត្ត។ ក្នុងការជ្រើសរើសពូជល្អៗ គេអាចសម្គាល់ថា ពូជល្អ ឬសមស្របជាងគេបំផុតគឺជាពូជដែលត្រូវនឹងតម្រូវការរបស់កសិករ និងអតិថិជន ហើយក៏អាស្រ័យនឹងលទ្ធភាពក្នុងការស្រោចស្រព ប្រភេទដី កម្ពស់ស្រែ (ស្រែទួល ឬស្រែជម្រៅ) និងការប្រើប្រាស់ស្រូវអង្ករ (ទុកហូប ឬទុកលក់)។
ពូជស្រូវមាន ២ក្រុមសំខាន់ៗ គឺពូជស្រូវប្រកាន់រដូវ និងពូជស្រូវមិនប្រកាន់រដូវ ក្នុងនោះពូជស្រូវប្រពៃណី ឬ ពូជក្នុងស្រុក ច្រើនតែជាពូជស្រូវប្រកាន់រដូវ (អាចដាំបានតែនៅរដូវវស្សា ហើយចេញផ្កាចាប់ពីខែតុលា ដោយឡែក ពូជស្រូវទំនើប ភាគច្រើនជាពូជស្រូវមិនប្រកាន់រដូវ ដែលអាចដាំពេលណាក៏បាន។ ក្រៅពីនេះ គេក៏អាចបែងចែកជាពូជស្រូវស្រាល ស្រូវកណ្ដាល និងស្រូវធ្ងន់ផងដែរ។
ក្នុងការជ្រើសរើស កសិករអាចគិតទៅលើរយៈពេលដាំដុះ ដោយក្នុងនោះ ពូជស្រូវស្រាល ត្រូវការរយៈពេលតិចជាង ១២០ថ្ងៃ សមស្របសម្រាប់ស្រែដែលងាយរងគ្រោះដោយភាពរាំងស្ងួត ឬស្រែដែលមានប្រព័ន្ធស្រោចស្រពបន្ថែម ចំណែកស្រូវកណ្ដាល ត្រូវការរយៈពេល ១២០-១៤០ថ្ងៃ សមស្របនឹងស្រែរំពឹងលើទឹកភ្លៀង ហើយពូជស្រូវធ្ងន់ ត្រូវការរយៈពេលពី ១៦០ថ្ងៃឡើងទៅ អាចសមស្របនឹងស្រែមានប្រព័ន្ធស្រោចស្រព និងងាយលិចទឹក។
ជំហានសំខាន់មួយទៀតគឺការប្រើគ្រាប់ពូជមានគុណភាពល្អ ជួយឱ្យចំណាយអស់តិច ដើមសំណាបធំមាំមួន និងស្រូវដុះលូតលាស់បានស្មើល្អ ផ្ដល់ទិន្នផលខ្ពស់ ពិសេសគ្រាប់អង្ករមានគុណភាពល្អ។ កសិករអាចសង្កេតមើលគ្រាប់ពូជល្អតាមរយៈ គ្រាប់ស្អាត មិនមានក្រួស ដី និងគ្រាប់ស្មៅលាយឡំ ជាគ្រាប់សុទ្ធ មិនលាយជាមួយពូជស្រូវផ្សេង និងអាចមើលលើគ្រាប់មានសុខភាពល្អ ដាក់គ្រាប់ពេញ មានពណ៌ដូចៗគ្នា មិនមានគ្រាប់ប្រេះស្រាំ ឬស្នាមអុជៗ។
មួយវិញទៀត កសិករក៏អាចផលិតគ្រាប់ពូជឱ្យមានគុណភាពល្អបានតាមរយៈការដាំដុះ និងថែទាំ ដូចជា ជ្រើសរើសយកស្រែដែលមានដីរាបស្មើ មានភ្លឺត្រឹមត្រូវ ងាយស្រួលចេញចូល បន្ទាប់មកប្រើប្រាស់គ្រាន់ពូជស្អាត សុទ្ធ និងមានគុណភាពល្អ ដោយមុនពេលដាំត្រូវការតេស្តដោយដាក់ត្រាំក្នុងទឹក ហើយស្រង់យកស្រូវដែលអណ្ដែតចេញ។ ដាំដុះឱ្យត្រូវពេលវេលា ដាក់ដីឱ្យបានត្រឹមត្រូវ កម្ចាត់ស្មៅបន្ទាប់ពីដាំដុះបាន ២១ថ្ងៃ ហើយចៀសវាងការធ្វើឱ្យគ្រាប់ស្មៅចង្រៃលាយឡំជាមួយគ្រាប់ពូជ។ ដកដើមស្រូវដែលមានលក្ខណៈខុសប្លែកគេនៅដំណាក់កាលលូតលាស់ ចេញផ្កា និងដាក់គ្រាប់។ ចំណែកការច្រូតកាត់ ស្រូវទុំគ្រប់គ្រាន់ គឺនៅពេលដែលគ្រាប់ស្រូវ ៨០-៨៥ភាគរយ មានពណ៌ដូចចំបើង ឬមានអត្រាសំណើម ២១-២២ភាគរយ។ បោកបែន ហើយហាលសម្ងួតស្រូវឱ្យបានឆាប់បន្ទាប់ពីច្រូតកាត់រួច ហើយទុកដាក់ស្រូវឱ្យមានសុវត្ថិភាព ដាក់សម្គាល់ឈ្មោះពូជ និងកាលបរិច្ឆេទច្រូតកាត់នៅលើធុង ឬបាវឱ្យបានត្រឹមត្រូវ៕
Account
Security
Favourite Content