សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជាបានស្វះស្វែងទាក់ទាញវិនិយោគមកបណ្ដាក់ទុនវិនិយោគនៅក្នុងប្រទេសកម្ពុជា ដោយបានបង្កើតតំបន់សេដ្ឋកិច្ចពិសេសជាបន្តបន្ទាប់ ដើម្បីសម្រួលនីតិវិធីដល់ការវិនិយោគ ក្នុងនោះរាជរដ្ឋាភិបាលក៏បានជំរុញឱ្យបង្កើតតំបន់សេដ្ឋកិច្ចពិសេសដោយផ្ដោតលើប្រទេសមួយៗ ជាក់ស្ដែងដូចជាតំបន់សេដ្ឋកិច្ចពិសេសចិន តំបន់សេដ្ឋកិច្ចពិសេសជប៉ុន ជាដើម ។ ដោយឡែកតំបន់សេដ្ឋកិច្ចពិសេសជប៉ុន ត្រូវបានរំពឹងថានឹងលេចរូបងរាងនៅរយៈពេល៣ឆ្នាំខាងមុខ ខណៈចិនមានគម្រោងបង្កើតតំបន់សេដ្ឋកិច្ចពិសេសចំនួន២ទៀតនៅកម្ពុជា ។
បើតាមសេចក្ដីប្រកាសព័ត៌មានក្រោយដំណើរទស្សនកិច្ចរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅប្រទេសជប៉ុនកាលពីចុងខែឧសភា ២០២៥ បានឱ្យដឹងថា សម្ដេចមហាបវរធិបតី បានបង្ហាញក្ដីសង្ឃឹមថា ក្រោមកិច្ចសហប្រតិបត្តិការរវាងកម្ពុជា និងជប៉ុន តំបន់សេដ្ឋកិច្ចពិសេសកម្ពុជា -ជប៉ុន អាចលេចរូបរាងឡើងនៅរយៈពេល៣ឆ្នាំខាងមុខ ។ ទន្ទឹមនឹងនោះ សម្ដេចធិបតីក៏បានអំពាវនាវដល់វិនិយោគិនជប៉ុនឱ្យមកបណ្ដាក់ទុនវិនិយោគនៅកម្ពុជា ដោយបានលើកឡើងពីកត្តាអំណោយផលរបស់កម្ពុជា ដែលរួមមាន ស្ថិរភាពនយោបាយ អត្រាកំណើនម៉ាក្រូសេដ្ឋកិច្ច យន្តការថែរក្សា និងដោះស្រាយក្ដីកង្វល់នានារបស់វិនិយោគិនជប៉ុន ច្បាប់វិនិយោគអំណោយផល កម្លាំងពលកម្មវ័យក្មេង និងកត្តាអនុគ្រោះពន្ធ រួមទាំងកិច្ចព្រមព្រៀងពាណិជ្ជកម្មសេរីជាដើម ។
សម្ដេចធិបតីក៏បានលើកឡើងពីសក្ដានុពលក្នុងការវិនិយោគនៅព្រះរាជាណាចក្រកម្ពុជា ដោយធុរជន និងវិនិយោគិនជប៉ុនអាចទាញយកប្រយោជន៍ជាច្រើនពីកិច្ចព្រមព្រៀងពាណិជ្ជកម្មសេរី និងការអនុគ្រោះពន្ធរបស់កម្ពុជា ហើយការវិនិយោគនៅក្នុងប្រទេសកម្ពុជា មិនសម្រាប់តែទីផ្សារកម្ពុជាទេ ប៉ុន្តែក៏សម្រាប់ទីផ្សារតំបន់ផងដែរ ។
គួររម្លឹកថា ទាក់ទិននឹងការវិនិយោគលើតំបន់សេដ្ឋកិច្ចពិសេសនេះ ភាគីចិនក៏បានបញ្ជាក់ពីគម្រោងក្នុងការបង្កើតតំបន់សេដ្ឋកិច្ចពិសេសចំនួន២បន្ថែមទៀតនៅក្នុងប្រទេសកម្ពុជា ដោយផ្ដោតលើតំបន់សេដ្ឋកិច្ចប្រើប្រាស់បច្ចេកវិទ្យាទំនើប ខណៈសព្វថ្ងៃនេះ ការវិនិយោគលើតំបន់សេដ្ឋកិច្ចពិសេស ចិនបាននាំមុខគេក្នុងចំណោមការវិនិយោគពីបរទេស ។
នៅក្នុងដំណើរទស្សនកិច្ចរបស់អភិបាលខេត្តជាំងស៊ូ ប្រទេសចិន កាលពីពេលថ្មីៗនេះ ថ្នាក់ដឹកនាំខេត្តរបស់ចិនមួយនេះ បានប្ដេជ្ញាក្នុងការជួយជំរុញវិនិយោគិនចិនមកបណ្ដាក់ទុនវិនិយោគនៅក្នុងតំបន់សេដ្ឋកិច្ចពិសេសក្រុងព្រះសីហនុ និងបានបង្ហាញពីគម្រោងក្នុងការបង្កើតតំបន់សេដ្ឋកិច្ចពិសេសចំនួន២បន្ថែមទៀតនៅកម្ពុជា ។
យោងតាមក្រុមប្រឹក្សាអភិវឌ្ឍន៍កម្ពុជាបានបង្ហាញថា គិតត្រឹមឆ្នាំ២០២៤ កម្ពុជាមានតំបន់សេដ្ឋកិច្ចដែលកំពុងដំណើរការចំនួន ២៦ និងតំបន់រដ្ឋបាលចំនួន២០ ដែលទាក់ទាញគម្រោងវិនិយោគបានចំនួន៧៤៥គម្រោង ជាមួយទុនវិនិយោ ៨,៩ពាន់លានដុល្លារអាមេរិក និងបង្កើតការងារបានចំនួន១៨ម៉ឺនកន្លែង ៕
Account
Security
Favourite Content