ពិការភាព ជារឿងអកុសល និងផ្ដល់នូវបញ្ហាច្រើនសម្រាប់ជីវិតមនុស្ស ក៏ប៉ុន្តែវាមិនមែនជាបញ្ហាទាំងស្រុងនោះទេសម្រាប់ការរស់នៅប្រកបការងារ ឬធ្វើអាជីវកម្មដោយសេចក្ដីថ្លៃថ្នូរអ្វីនោះទេ សំខាន់ឱ្យតែអ្នកទាំងនោះមានឆន្ទៈ ភាពអត់ធ្មត់ ព្យាយាមដើម្បីសម្រេចគោលដៅដែលខ្លួនចង់បាន។ ជាក់ស្ដែង ស្ត្រីពិការភ្នែកម្នាក់ដែលមិនអស់សង្ឃឹម និងបានខិតខំរៀនជំនាញចាក់កាបូបធ្វើពីអំបោះដើម្បីរកចំណូលចិញ្ចឹមជីវិត។

អ្នកស្រី ប្រឹម ស្រីអូន ជាម្ចាស់អាជីវកម្មលក់សម្ភារចាក់ពីអំបោះឈ្មោះថា ស្នាដៃស្ត្រីពិការភ្នែក / Blind Woman’s crochets មានទីតាំងនៅម្ដុំបឹងសាឡាង ខណ្ឌទួលគោក រាជធានីភ្នំពេញបានមានប្រសាសន៍ឱ្យដឹងថា ៖

«ទោះបីត្រូវពិការភ្នែកម្ខាង មុខមាត់មិនស្អាតល្អដូចមុន ក៏ខ្ញុំមិនផ្ដេកផ្ដួលលើភាពលំបាកទាំងនេះដែរ តែខ្ញុំបានរៀនចាក់កាបូបអំបោះលក់ដើម្បីរកកម្រៃចិញ្ចឹមគ្រួសារ»។

អ្នកស្រីបន្តថា ៖

«ខាងយើងមានផលិតដូចជា កាបូប មួក កន្សែងបង់ក កម្រាលតុ កម្រាលទូ ជាដើម ដែលសុទ្ធសឹងជាផលិតផលធ្វើពីអំបោះច្រើនប្រភេទផ្សេងៗគ្នា ដែលចាក់តាមការចង់បានរបស់អតិថិជន និងខ្លះទៀតច្នៃដោយខ្លួនឯង មានច្រើនម៉ូដ ច្រើនទំហំ គុណភាពល្អ និងអាចប្រើប្រាស់បានយូរ។ ក្រុមអ្នកផលិតរបស់ខ្ញុំមានបីនាក់ ដែលក្នុងនោះមានខ្ញុំជាអ្នកពិការភ្នែក ម្នាក់ទៀតមានជំងឺបេះដូងចំហរ និងម្នាក់ទៀតគាត់មានជីវភាពលំបាកព្រោះកូនមានជំងឺពិការខួរក្បាល ហើយការផលិតជាមធ្យមអាចបានប្រមាណ ២០កាបូបក្នុងមួយខែ ឯសម្ភារដិនដោយដៃសុទ្ធអាចបានត្រឹម ៨ ទៅ ១០ប៉ុណ្ណោះ»។

សម្រាប់តម្លៃវិញ ផលិតផលរបស់ស្នាដៃស្ត្រីពិការភ្នែកមានតម្លៃពី ៥-៧០ដុល្លារ អាស្រ័យទៅលើប្រភេទផលិតផល ទំហំ ម៉ូដ និងប្រភេទអំបោះដែលគេចាក់ផងដែរ។ ចំណែកអតិថិជនភាគច្រើនជាអ្នកកម្ម៉ង់ទិញតាមបណ្ដាញសង្គម ដែលជាអ្នកគាំទ្រស្នាដៃរបស់បងប្អូនពិការ។

គួរបញ្ជាក់ដែរថា អ្នកស្រី ស្រីអូន បានចាប់ផ្ដើមអាជីវកម្មនេះនៅឆ្នាំ២០១៩ ដែលពីមុនឡើយអ្នកស្រីជាអ្នករកស៊ីធម្មតាទេ ប៉ុន្តែបន្ទាប់ពីបានធ្លាក់ខ្លួនពិការភ្នែកមក អ្នកស្រីក៏ចាប់ផ្ដើមរៀនចាក់ រៀនច្នៃដោយខ្លួនឯង ដោយមានកូនស្រីជាអ្នកជួយមើលថែ និងស្រាវជ្រាវប្រាប់ម៉ូដផលិតផល។

ចុងក្រោយ អ្នកស្រី ប្រឹម ស្រីអូន ក៏សូមថ្លែងអំណរគុណដល់បងប្អូនអតិថិជនដែលតែងតែគាំទ្រកម្ម៉ង់ទិញ ហើយក៏សូមអំពាវនាវឱ្យមានការគាំទ្របន្ថែមទៀត។ ជាមួយគ្នានេះ អ្នកស្រីក៏បានលើកទឹកចិត្តដល់បណ្តាបងប្អូនដែលមានពិការភាពត្រូវតែមានភាពតស៊ូ ព្យាយាម កុំផ្ដេកផ្ដួលលើភាពលំបាកវេទនា ឬដើរសុំទានគេនោះគឺមិនល្អនោះឡើយ៕