សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាឧស្សាហកម្មផលិតសាប៊ូក្នុងស្រុកមួយ បច្ចុប្បន្ន បាន និងកំពុងខិតខំផលិតសាប៊ូយ៉ាងមមាញឹក ដើម្បីចម្រាញ់យកគុណភាពស្តង់ដារសាប៊ូដែលអាចផ្គត់ផ្គង់តម្រូវការរបស់អតិថិជនក្នុងស្រុក និងដើម្បីប្រកួតប្រជែងជាមួយទីផ្សារអន្តរជាតិដែលមានក្រុមហ៊ុនចម្រុះចូលរួមក្នុងវិស័យអាជីវកម្មតែមួយ។
អូកា ជាយីហោដែលមានឈ្មោះល្បីនៃសាប៊ូបោកសម្លៀកបំពាក់ ដែលគេនិយមហៅរហូតជាប់ឈ្មោះក្រុមហ៊ុនទាំងមូលថា ក្រុមហ៊ុនសាប៊ូ អូកា ដែលផលិតសាប៊ូសម្រាប់បំពេញតម្រូវតាមការប្រើប្រាស់របស់ប្រជាជនខ្មែរផ្ទាល់តែម្ដង ពោលគឺទាំងគុណភាព ការវេចខ្ចប់ និងតម្លៃសមរម្យ។
លោកស្រី នុត សម្ផស្ស អគ្គនាយិកាក្រុមហ៊ុន LSV Industry Co., Ltd ខណ្ឌសែនសុខ រាជធានីភ្នំពេញ ដែលជាក្រុមហ៊ុនផលិតសាប៊ូយីហោ អូកា (OKA) បានប្រាប់ពីមូលហេតុនៃការបង្កើតក្រុមហ៊ុននេះថា ដោយសារតែលោកស្រីមានចំណេះជំនាញស្រាប់ ចង់បង្ហាញឱ្យបរទេសបានឃើញ និងចង់បន្សល់នូវស្នាដៃទុកឱ្យក្មេងជំនាន់ក្រោយផងដែរ។
លោកស្រីបញ្ជាក់ថា ៖
“មូលហេតុនៃការបើកក្រុមហ៊ុនសាប៊ូនអូកានេះឡើងគឺដោយសារកត្តាជាច្រើន ទីមួយគឺនាងខ្ញុំមានចំណេះជំនាញជិត២០ឆ្នាំទាំងផ្នែកទីផ្សារ វេជ្ជសាស្ត្រ និងគីមី ហើយចំណុចទីពីរគឺនៅពេលរៀន និងធ្វើការនៅក្រៅប្រទេសធ្លាប់រងពាក្យបន្តោសបង្អាប់ថាប្រទេសយើងធ្វើអីអត់កើតដោយខ្លួនឯង យើងចាំតែប្រទេសគេ ដែលជាចំហេះមួយដុតចិត្តឱ្យចង់កែប្រែនូវអ្វីដែលគេថាឱ្យយើង ហើយទីបីគឺនាងខ្ញុំចង់បន្សល់ស្នាដៃអ្វីមួយទុកសម្រាប់អ្នកជំនាន់ក្រោយក៏ដូចជាលើទឹកដីដែលយើងកើត”
បច្ចុប្បន្ន OKA មានផលិតផលចំនួនពីរផ្នែកគឺផលិតផលប្រើប្រាស់ក្នុងផ្ទះមានដូចជាសាប៊ូបោកសម្លៀបំពាក់ ទឹកក្រអូប បន្ទន់សម្លៀកបំពាក់ សាប៊ូលាងចាន និងផ្នែកផលិតផលថែរក្សារាងកាយមានដូចជាសាប៊ូកក់សក់ ដុសខ្លួន ដុសមុខ ហើយយើងក៏មានគម្រោងផលិតនូវគ្រឿងសម្អាងធម្មជាតិផងដែរ។
ដោយឡែក ផលិតផលដែលមានប្រជាប្រិយភាពជាងគេនោះគឺ សាប៊ូបោកសម្លៀកបំពាក់ OKA ដែលជាផលិតផលដំបូងគេ និងមានគុណភាពអាចបោកជម្រះខ្អែលបានល្អ មិនកាត់ដៃ និងធ្វើឱ្យសម្លៀកបំពាក់បោកហើយមានសភាពទន់ ក្រអូប និងមិនធ្វើឱ្យរោលស្បែកនៅពេលយើងបែកញើសផងដែរ។ សម្រាប់វត្ថុធាតុដើមក្នុងការផលិតក្រុមហ៊ុនខាងលើព្យាយាមប្រើផលិតផលក្នុងស្រុកឱ្យអស់ពីលទ្ធភាពដូចជា អង្ករដំណើប ទឹកឃ្មុំ ក្រូចឆ្មារជាដើមដែលសុទ្ធសឹងជាវត្ថុធាតុដើមសំខាន់ៗ ឯផ្នែកណាដែលស្រុកយើងខ្វះខាតទើបយើងនាំចូល។
លោកស្រីបន្តថា ៖
“ផលិតផលអូកាបានចេញលក់នៅលើផ្សារដំបូងនៅឆ្នាំ២០១៣ ប៉ុន្តែយើងបានត្រៀមដល់ទៅប្រាំឆ្នាំមុននេះ ដោយសារយើងត្រូវសិក្សាពីទីផ្សារ សិក្សាក៏ដូចជាអភិវឌ្ឍលើផលិតផល លៃយ៉ាងណាផលិតបាននូវផលិតផលដែលមានគុណភាពខ្ពស់សម្រាប់អតិថិជន”
លោកស្រី នុត សម្ផស្ស បញ្ជាក់ដែរថា ចំណុចចាប់ផ្ដើមនៃអាជីវកម្មនេះគឺដំបូងឡើយគាត់បើកជាលក្ខណៈគ្រួសារក្នុងដើមទុនប្រមាណ ៤ ០០០-៥ ០០០ដុល្លារ ហើយបន្តពង្រីកខ្លួនបន្តិចម្ដងៗរហូតក្លាយជាឧស្សាហកម្មដូចសព្វថ្ងៃ។ ចំណែកការត្រៀមផ្នែកហរិញ្ញវត្ថុគឺពិតជាសំខាន់ពិសេសនៅក្នុងកំឡុងពេលចាប់ផ្ដើមដំបូងដែលជាដំណាក់កាលលូតលាស់រហូតដល់ផលិតផលលក់ដាច់ ហើយក៏នៅតែព្យាយាមពង្រីកទីផ្សារ គឺសុទ្ធតែត្រូវបន្ថែមដើមទុនផងដែរ។
ដោយឡែកទាក់ទងទៅនឹងបញ្ហាប្រឈម ចំណុចប្រឈមដំបូងគេគឺការគាំទ្ររបស់អ្នកប្រើប្រាស់ដោយសារជាយីហោថ្មីក្នុងស្រុក តែបច្ចុប្បន្នបញ្ហាប្រឈមហាក់ប្លែកពីមុនដោយសារ ដរាបណាមនុស្សនៅតែមានតម្រូវការប្រើប្រាស់ផលិតផលថែរក្សារាងកាយ និងផលិតផលប្រើប្រាស់ក្នុងផ្ទះ នៅតែមានសង្ឃឹម។ សម្រាប់សហគ្រិនទាំងឡាយ ការបង្កើតនូវស្នាដៃមួយគឺមិនមែនជារឿងងាយស្រួលឡើយទេ បើមិនពុះពារ មិនធ្វើអ្វីតាមក្ដីស្រឡាញ់នោះទេ នោះវានឹងនៅតែមួយកន្លែង មិនអាចសម្រេចសមិទ្ធផលអ្វីបានឡើយ។ ចុងក្រោយ លោកស្រីអគ្គនាយិកា ក្រុមហ៊ុន LSV Industry ចង់ឱ្យផលិតផលយីហោ អូកា ក្លាយជាផលិតផលទីមួយរបស់ប្រជាជនខ្មែរ ដោយសារអ្វីៗដែលអ្នកស្រីបានស្រាវជ្រាវមកនេះគឺសុទ្ធសឹងតម្រូវសម្រាប់ប្រជាជនខ្មែរទាំងអស់ ទាំងការសិក្សា រូបមន្ត គុណភាព តម្លៃ ពោលគឺព្យាយាមបំពេញតម្រូវការក្នុងស្រុកឱ្យបានគ្រប់គ្រាន់ បន្ទាប់មកទើបគិតដល់ការនាំចេញទៅទីផ្សារក្រៅប្រទេស៕
ជីវប្រវត្តិ: ជានិស្សិតនៃសាលកវិទ្យាល័យភូមិន្ទភ្នំពេញ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍។ បច្ចុប្បន្ន ជាអ្នករាយការណ៍ព័ត៌មាននៅ AMS Economy ។
របាយការណ៍ថ្មីៗ
មើលទាំងអស់ ➧
អ្នកជំនាញ ៖ ចង់មានសុវត្ថិភាពគណនីហិរញ្ញវត្ថុគប្បីបង្កើនប្រសិទ្ធភាពលេខសម្ងាត់ឱ្យបានរឹងមាំ
• 09/04/2026
ព័ត៌មានទូទៅ
មើលទាំងអស់ ➧
ជីប ម៉ុង គាំទ្រការពង្រីកវិសាលភាពកីឡាជិះសេះនៅកម្ពុជា តាមរយៈការបង្កើតទីលានជិះសេះលំដាប់អន្តរជាតិក្រោមស្ថាបត្យកម្មបែបខ្មែរ
ព្រឹត្តិការណ៍, អត្ថបទពាណិជ្ជកម្ម
• 24/08/2026
ជីប ម៉ុង គាំទ្រការពង្រីកវិសាលភាពកីឡាជិះសេះនៅកម្ពុជា តាមរយៈការបង្កើតទីលានជិះសេះលំដាប់អន្តរជាតិក្រោមស្ថាបត្យកម្មបែបខ្មែរ
លុយយេនធ្លាក់ថ្លៃ បន្ថែមសម្ពាធលើវិបត្តិសន្តិសុខស្បៀងរបស់ជប៉ុន
ព្រឹត្តិការណ៍, អាជីវកម្មថ្មី និងនវានុវត្ត
• 24/08/2026
នៅពីក្រោយវប្បធម៌ម្ហូបអាហារដ៏ល្បីល្បាញរបស់ជប៉ុន ដូចជា Sushi, Udon និង Sake ប្រទេសមហាអំណាចសេដ្ឋកិច្ចអាស៊ីមួយនេះកំពុងប្រឈមនឹងបញ្ហាសន្តិសុខស្បៀងដ៏ស្មុគស្មាញ ខណៈការពឹងផ្អែកលើការនាំចូល ការធ្លាក់ថ្លៃប្រាក់យេន និងផលប៉ះពាល់ពីគោលនយោបាយកសិកម្មចាស់ៗកំពុងបង្កើនភាពងាយរងគ្រោះ
កម្មវិធីពិសេសរបស់ AMS ECONOMY
ព័ត៌មានសង្ខេប
Account
Security
Favourite Content