សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ប្រាក់ឈ្នួលអប្បបរមាសម្រាប់កម្មករនិយោជិតក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូបនៅកម្ពុជា ក្នុងឆ្នាំ២០២៦ មានកម្រិតខ្ពស់ជាងប្រទេសមួយចំនួននៅអាស៊ី រួមមាន វៀតណាម ឥណ្ឌា ប៉ាគីស្ថាន ស្រីលង្កា មីយ៉ាន់ម៉ា បង់ក្លាដេស និងឡាវ។
យោងតាមរបាយការណ៍របស់ក្រសួងការងារ និងបណ្ដុះបណ្ដាលវិជ្ជាជីវៈ គិតត្រឹមខែសីហា ឆ្នាំ២០២៦ កម្មករនិយោជិតក្នុងវិស័យទាំងនេះនៅកម្ពុជា ទទួលបានប្រាក់ខែអប្បបរមាសរុបចំនួន ២២៩.៥ ដុល្លារ ក្នុងមួយខែ រួមមានប្រាក់ឈ្នួលអប្បបរមា ២១០ ដុល្លារ និងប្រាក់អត្ថប្រយោជន៍ផ្សេងៗចំនួន ១៩.៥ ដុល្លារ ដែលកម្មករនិយោជិតត្រូវទទួលបាន។
ក្នុងចំណោមប្រទេសដែលមានកម្រិតប្រាក់ឈ្នួលទាបជាងកម្ពុជា ស្រីលង្កាមានកម្រិតទាបជាងគេ ដោយមានត្រឹម ៩៣ ដុល្លារ ខណៈមីយ៉ាន់ម៉ាមាន ៩៧ ដុល្លារ បង់ក្លាដេស ១០២ ដុល្លារ ឡាវ ១១៤ ដុល្លារ ប៉ាគីស្ថាន ១៤៣ ដុល្លារ និងឥណ្ឌា ១៩២ ដុល្លារ។
ចំណែកប្រាក់ឈ្នួលអប្បបរមានៅវៀតណាម មានចន្លោះពី ១៤៧ ដុល្លារ ដល់ ២១១ ដុល្លារ។
ទោះជាយ៉ាងណា បណ្ដាប្រទេសមួយចំនួននៅតំបន់មានកម្រិតប្រាក់ឈ្នួលអប្បបរមាខ្ពស់ជាងកម្ពុជា។ ម៉ាឡេស៊ីមានកម្រិតខ្ពស់ជាងគេ ដល់ ៤២៤ ដុល្លារ សម្រាប់កម្មករនៅក្នុងវិស័យទាំងនេះ។
បន្ទាប់មក គឺប្រទេសចិន ដែលមានចន្លោះពី ២៥៥ ដុល្លារ ដល់ ៣៩៩ ដុល្លារ ឥណ្ឌូនេស៊ីមានចន្លោះពី ១៣៣ ដុល្លារ ដល់ ៣៣០ ដុល្លារ និងហ្វីលីពីនមានចន្លោះពី ១៧៧ ដុល្លារ ដល់ ៣២៥ ដុល្លារ។
ពាក់ព័ន្ធនឹងការកំណត់ប្រាក់ឈ្នួលអប្បបរមាសម្រាប់ឆ្នាំ២០២៧ ក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ថា ក្រសួងយកចិត្តទុកដាក់ស្តាប់កង្វល់ និងសំណើរបស់កម្មករនិយោជិត សហជីព និងគ្រប់ភាគីពាក់ព័ន្ធ ខណៈការចរចានឹងផ្អែកលើទិន្នន័យ និងលក្ខណៈវិនិច្ឆ័យទាំង៧ តាមរយៈយន្តការត្រីភាគី។
លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់នៅថ្ងៃទី១០ ខែកញ្ញា ឆ្នាំ២០២៦ថា ការកំណត់ប្រាក់ឈ្នួលត្រូវមានមូលដ្ឋានលើទិន្នន័យច្បាស់លាស់ ដោយគិតគូរទាំងតម្រូវការរបស់កម្មករ ស្ថានភាពសេដ្ឋកិច្ច និងលទ្ធភាពអនុវត្តជាក់ស្តែង។
លោកបានលើកឡើងថា៖ «ក្រសួងយល់ពីកង្វល់របស់បងប្អូនកម្មករ។ រាល់សំណើរបស់បងប្អូន សហជីព និងគ្រប់ភាគី សុទ្ធតែគួរទទួលបានការស្តាប់ និងការពិនិត្យដោយយកចិត្តទុកដាក់ ព្រោះគោលដៅចម្បងរបស់រាជរដ្ឋាភិបាល គឺជួយឱ្យបងប្អូនកម្មករមានជីវភាពប្រសើរឡើង មានការងារស្ថិតស្ថេរ និងជំរុញការពង្រីករោងចក្រ សហគ្រាស ដើម្បីបង្កើនឱកាសការងារជូនប្រជាពលរដ្ឋ»។
អ្នកនាំពាក្យរូបនេះបានបញ្ជាក់ថា ការចរចាត្រូវប្រព្រឹត្តទៅតាមច្បាប់ ដោយមានការចូលរួមពីតំណាងកម្មករនិយោជិត និយោជក និងរាជរដ្ឋាភិបាល។ ការពិនិត្យកត្តាសង្គម និងសេដ្ឋកិច្ចរួមគ្នា នឹងជួយឱ្យការសម្រេចចិត្តមានមូលដ្ឋានច្បាស់លាស់ សំដៅធានាប្រាក់ឈ្នួលសមរម្យ ទន្ទឹមនឹងការរក្សាស្ថិរភាពការងារ និងការរីកចម្រើនរបស់សហគ្រាសប្រកបដោយចីរភាព។
លោក ស៊ុន មេសា បានបន្ថែមថា ការពិភាក្សាប្រាក់ឈ្នួលអប្បបរមាជាប្រចាំឆ្នាំ បង្ហាញពីការយកចិត្តទុកដាក់របស់រាជរដ្ឋាភិបាលចំពោះជីវភាពកម្មករ និងស្ថានភាពវិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប។
ដំណើរការនេះផ្តល់ឱកាសឱ្យភាគីពាក់ព័ន្ធលើកឡើងពីកង្វល់ សំណូមពរ និងបញ្ហាប្រឈម ព្រមទាំងពិនិត្យសមត្ថភាពប្រកួតប្រជែងរបស់កម្ពុជា។
ទន្ទឹមនឹងការគិតគូរអំពីប្រាក់ឈ្នួល រាជរដ្ឋាភិបាលក៏បន្តគាំទ្រដល់កម្មករ និងគ្រួសារ តាមរយៈការគាំពារសង្គមរបស់ ប.ស.ស. ការបណ្តុះបណ្តាលជំនាញ និងវិធានការសម្រាលបន្ទុកចំណាយ ដើម្បីរួមចំណែកលើកកម្ពស់ជីវភាព និងសុខុមាលភាពរបស់កម្មករនិយោជិត៕
Account
Security
Favourite Content