សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្ទើរគ្រប់ប្រភេទនៃបន្លែ ផ្លែឈើ ដែលត្រូវបានទិញយកមកពីផ្សារសម្រាប់ទទួលទានប្រចាំថ្ងៃ ទាំងប្រភេទទិន្នផលដែលដាំដុះក្នុងស្រុក ទាំងទិន្នផលនាំចូលពីក្រៅប្រទេស គឺចាំបាច់ត្រូវតែធ្វើការលាងសម្អាតឱ្យបានត្រឹមត្រូវដើម្បីប្រាកដថាមានសុវត្ថិភាពចំពោះសុខភាព ត្បិតផលិតផល ក៏ដូចជាទិន្នផលទាំងនោះមិនប្រាកដនោះទេថា មានប្រើសារធាតុគីមី ឬអត់។ ឆ្លើយតបទៅនឹងការលើកឡើងខាងលើនេះ ក្រុមហ៊ុនក្នុងស្រុកមួយបានខិតខំស្រាវជ្រាវ រហូតឈានដល់ការផលិតបាននូវប្រភេទម្សៅលាងបន្លែមួយប្រភេទប្រកបដោយគុណភាព មានការទទួលស្គាល់ពីស្ថាប័នជំនាញថ្នាក់ជាតិយ៉ាងត្រឹមត្រូវ និងកំពុងចរាចរនៅលើទីផ្សារក្រោមការគាំទ្រពីសំណាក់អតិថិជនគួរឱ្យកត់សម្គាល់។
អ្នកស្រី អ៊ុក ច័ន្ទបូលីនដា ជានាយិកាប្រតិបត្តិក្រុមហ៊ុន Soda Food ដែលកំពុងដំណើរការផលិត និងចែកចាយនូវប្រភេទម្សៅលាងបន្លែក្រោមយីហោ Soda Food បានប្រាប់ឱ្យដឹងថា ៖ គ្រប់ប្រភេទនៃបន្លែ ផ្លែឈើដែលទទួលទានប្រចាំថ្ងៃ គឺមិនមែនគ្រាន់តែមួយចម្អែតក្រពះ ឬបំពេញសេចក្ដីស្រេកឃ្លាននោះទេ ប៉ុន្តែក៏ត្រូវប្រាកដថា អាចទទួលបាននូវគុណប្រយោជន៍ពីការទទួលទានផងដែរ។
អ្នកស្រីបានបញ្ជាក់ថា ៖
«ដូចដែលយើងធ្លាប់បានដឹងឮរួចមកហើយ ឱ្យតែនិយាយពីបន្លែ ផ្លែឈើ ដែលដាក់លក់នៅលើទីផ្សារ គឺតែងតែឮគេនិយាយថាមានសារធាតុគីមី ត្បិតអ្នកដាំដុះភាគច្រើនចង់ចំណាយពេលខ្លី ហើយអាចទទួលបានទិន្នផលច្រើន ដូច្នេះ គឺជៀសមិនផុតពីការប្រើថ្នាំ ឬជីគីមីនោះទេ។ បើបែបនេះ ដើម្បីអាចកាត់បន្ថយហានិភ័យបាន អ្នកទទួលទានក៏ត្រូវតែចេះពីវិធីលាងសម្អាតផងដែរ »។
នៅក្នុងឱកាសដាក់តាំងបង្ហាញផលិតផលក្នុងស្រុកដែលត្រូវបានរៀបចំឡើងដោយក្រសួងពាណិជ្ជកម្មកាលពីពេលកន្លងទៅនេះ អ្នកស្រី ច័ន្ទបូលីនដា បានលើកថា បច្ចុប្បន្ននេះ ស្ថិតក្រោមកេរ្តិ៍ឈ្មោះរបស់ក្រុមហ៊ុន Soda Food គឺកំពុងមានដំណើរការផលិតនូវម្សៅមួយប្រភេទសម្រាប់លាងសម្អាតបន្លែ ផ្លែឈើ ដែលជាផលិតផលក្នុងស្រុក មានស្លាកសញ្ញា Soda Food និងបានដាក់លក់នៅលើទីផ្សារមួយចំនួនក្នុងប្រទេសកម្ពុជា។ ផលិតផលម្សៅ Soda Food មានប្រសិទ្ធភាពក្នុងការលាងសម្អាតបន្លែ ផ្លែឈើ កម្ចាត់បាក់តេរី ជម្រះសារធាតុគីមី ក៏ដូចជាថ្នាំពុលកសិកម្ម និងជួយរក្សាវីតាមីនបន្លែ ផ្លែឈើមិនឱ្យបាត់បង់។
អ្នកស្រីបញ្ជាក់ថា៖
«សម្រាប់ការផលិតរបស់យើងគឺទើបតែចាប់ដំណើរការកាលពីថ្ងៃ១១ ខែកក្កដា ឆ្នាំ២០២៤ កន្លងទៅតែប៉ុណ្ណោះ ប៉ុន្តែក្នុងកំឡុងពេលដំណើរការអាជីវកម្មមួយរយៈនេះ យើងសង្កេតឃើញថា ពីមួយថ្ងៃទៅមួយថ្ងៃ ទីផ្សារលក់របស់យើងគឺមានការកើនឡើង មានអតិថិជនគាំទ្រច្រើន ដោយក្នុងមួយខែអាចលក់បានចាប់ពី ២ម៉ឺនប្រអប់ឡើងទៅ។ ចំនួននេះគិតតែក្នុងរាជធានីភ្នំពេញប៉ុណ្ណោះ»។
ពាក់ព័ន្ធទៅនឹងតម្លៃនៃផលិតផលម្សៅលាងបន្លែ ផ្លែឈើ ដែលជាផលិតផលក្នុងស្រុកមួយនេះត្រូវបានគេដាក់លក់នៅលើទីផ្សារ ១ប្រអប់ ២ម៉ឺនរៀល ដោយក្នុង ១ប្រអប់ មាន ២០កញ្ចប់តូច ខណៈដែលលទ្ធភាពផលិតរបស់ក្រុមហ៊ុនអាចធ្វើទៅបានចាប់ពី ៣ម៉ឺន ទៅ ៤ម៉ឺនប្រអប់ក្នុង១ខែ ហើយអ្នកប្រើប្រាស់អាចរកទិញបាននៅតាមទីកន្លែងលក់អីវ៉ាន់ចាប់ហ៊ួយ ឬតាមម៉ាតក្នុងតំបន់ ឬនៅតាមផ្សារទំនើបនានា ជាពិសេសក្នុងរាជធានីភ្នំពេញ។
គួរបញ្ជាក់ថា សម្រាប់ិធីសាស្ត្រប្រើប្រាស់គឺមានភាពស្រួលបំផុត ពោលគឺគ្រាន់តែហែកកញ្ចប់ ចាក់ម្សៅចូលក្នុងទឹកសម្រាប់លាងបន្លែបរិមាណ ៥-១០លីត្រ រួចដាក់បន្លែ ផ្លែឈើ ចូល ហើយត្រាំទុកប្រមាណ ១០-១៥នាទី រួចស្រង់ចេញ លាងទឹកសម្អាតម្ដង ឬពីរដង រួចជាស្រេច។
គួរបញ្ជាក់ដែរថា ដំណើរការផលិតនូវម្សៅលាងសម្អាតបន្លែ ផ្លែឈើ Soda Food ត្រូវបានធ្វើឡើងក្រោមគំនិតផ្តួចផ្តើមរបស់លោកវេជ្ជបណ្ឌិត អ៊ុយ ដាវីន ដែលបានបញ្ចប់ការសិក្សាផ្នែកគីមីចំណីអាហារមកពីប្រទេសបារាំង។ ផលិតផលក្នុងស្រុកមួយនេះ មានការទទួលស្គាល់ពីស្ថាប័នពាក់ព័ន្ធដូចជា ក្រសួងឧស្សាហ៍កម្ម វិទ្យាសាស្ត្រ បច្ចេកវិទ្យា និងនវានុវត្តន៍, ក្រសួងសេដ្ឋកិច្ច និងហិរញ្ញវត្ថុ , ក្រសួងពាណិជ្ជកម្ម និងមានការចុះបញ្ជីផលិតផលបញ្ជាក់ពីម៉ាកសញ្ញាយ៉ាងត្រឹមត្រូវ។ សូមចូលរួមគាំទ្រផលិតផលខ្មែរ ដែលជាផលិតផលក្នុងស្រុកទាំងអស់គ្នា៕
Account
Security
Favourite Content