ភ្នំពេញ ៖ យោង​តាមច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ២០២៤  ត្រូវបានព្យាករថា សេដ្ឋកិច្ចកម្ពុជានៅឆ្នាំ២០២៤ នឹងងើបឡើងវិញ ហើយរំពឹងថានឹងសម្រេច​បានកំណើនក្នុងរង្វង់ ៦,៦% ដែលធ្វើឱ្យផលិតផលក្នុងស្រុកសរុប (ផ.ស.ស) ថ្លៃបច្ចុប្បន្នស្ថិតក្នុងរង្វង់ ១៤២ ៩៥៧ ប៊ីលានរៀល សមមូលនឹងប្រមាណ ៣៥ ១៦៨ លានដុល្លារអាមេរិក ស្របពេលដែល ផ.ស.ស សម្រាប់មនុស្សម្នាក់​ត្រូវបានរំពឹងថា នឹងកើនឡើងដល់ ២ ០៧១ដុល្លារអាមេរិក ខណៈឆ្នាំ២០២៣ មានត្រឹម១ ៩១៧ ដុល្លារអាមេរិក ។ នេះបើយោងតាមច្បាប់ស្តីពីហិរញ្ញវត្ថុសម្រាប់គ្រប់​គ្រងឆ្នាំ២០២៤។

ដូច្នេះ បើយោងតាមការព្យាករនៃច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ២០២៤  ឃើញថាវិធានការចំនួនពីរដែលបានរំលេចចេញដោយរាជរដ្ឋាភិបាលអាណត្តិទី៧ គឺការទទួលបានប្រាក់ឈ្នួលអប្បបរមារបស់កម្មករ កម្មការិនី និយោជិត និងការសម្រេចដំឡើងប្រាក់សោធនអតីត​មន្រ្តីរាជការដល់ជាង ៨២ម៉ឺនរៀលក្នុងឆ្នាំ២០២៤។

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានសាទរដល់បងប្អូនកម្មករ កម្មការិនី និយោជិត ដែល​ទទួល​បាន​ប្រាក់​ឈ្នួល​អប្បបរមា​ថ្មី ។ ពោលគឺអ្វីដេលស្វាគមន៍កម្មករ-និយោជិត រោងចក្រ​ផ្នែក​វាយនភ័ណ្ឌ កាត់ដេរ ផលិត​ស្បែក​ជើង និង​ផលិតផល​ធ្វើដំណើរ និង​កាបូប ចាប់ពី​ខែ​មករា ឆ្នាំ២០២៤ គឺការ​ទទួលបានប្រាក់ឈ្នួលអប្បបរមា ២០៤ដុល្លារ កើនជាងឆ្នាំ២០២៣ ចំនួន៤ដុល្លារអាមេរិក ក្នុង១ខែ​ ខណៈ​ប្រាក់ឈ្នួល​ឆ្នាំ២០២៣ ទទួល​បាន​ត្រឹម២០០ដុល្លារប៉ុណ្ណោះ។

សម្តេចធិបតី ហ៊ុន ម៉ាណែត បានចេញសារអបអរសាទរកាលពីថ្ងៃទី០២ ខែមករា ឆ្នាំ២០២៤ ចំពោះប្រាក់ឈ្នួលអប្បបរមាថ្មី សម្រាប់កម្មករ និយោជិត ដែលចាប់ផ្តើមដំឡើងចាប់ពីខែមករា ឆ្នាំ២០២៤ ដោយសម្តេចធិបតី បានលើកឡើងថា ៖ «អបអរសាទរ! ចាប់ពីខែមករា ឆ្នាំ២០២៤នេះតទៅ បងប្អូនកម្មករ និយោជិត ក្នុងវិស័យវាយនភ​ណ្ឌ កាត់ដេរ ផលិតស្បែក​ជើង និងផលិតផលធ្វើដំណើរ នឹងទទួលបានប្រាក់ឈ្នួលអប្បបរមា ២០៤ដុល្លារ ក្នុង១ខែ គឺកើនជាងខែធ្នូ ឆ្នាំ២០២៣ ចំនួន៤ដុល្លារអាមេរិក»។

ក្រៅពីប្រាក់ឈ្នួលគោល ២០៤ដុល្លារហើយនោះ ប្រាក់អត្ថប្រយោជន៍ផ្សេងទៀតដែលកម្មករនិយោជិតទទួលបានកន្លងមក ត្រូវបានរក្សាទុកនៅដដែល ។ ដូច្នេះជាមធ្យមកម្មករនិយោជិតម្នាក់ៗ នឹងទទួលបានប្រាក់ឈ្នួលយ៉ាងតិចចំនួនពី ២២១ (ពីររយ ម្ភៃមួយ) ដុល្លារអាមេរិក ដល់ ២៣២ (ពីររយសាមសិបពីរ) ដុល្លារអាមេរិក ក្នុងមួយខែ។ ក្រៅពីការដំឡើង ប្រាក់ឈ្នួលអប្បបរមា រាជរដ្ឋាភិបាល និងក្រសួង ស្ថាប័នពាក់ព័ន្ធ នឹងបន្តខិតខំសហការគ្នា ដើម្បីកាត់បន្ថយបន្ទុកចំណាយនានារបស់បងប្អូនកម្មករនិយោជិតជាបន្តបន្ទាប់ នេះបើតាមក្រសួងការងារ និងបណ្តុះបណ្តាលវិជ្ជាជីវៈ ធ្លាប់បានបញ្ជាក់។

ដោយឡែក រាជរដ្ឋាភិបាលបានសម្រេចដំឡើងប្រាក់សោធនអតីត​មន្រ្តីរាជការដល់ជាង ៨២ម៉ឺនរៀល ក្នុងឆ្នាំ២០២៤នេះដែរ ដោយប្រាក់សោធនអប្បបរមាប្រចាំខែរបស់អតីតមន្ត្រីរាជការស៊ីវិល និងអតីតយុទ្ធជន(អតីតយោធិន និងអតីតមន្ត្រីនគរបាល​ជាតិ) ត្រូវបានដំឡើងពី ៧៧ ម៉ឺនរៀល នៅឆ្នាំ២០២៣ ដល់៨២,៥ ម៉ឺនរៀល នៅឆ្នាំ២០២៤។ នេះបើយោងតាម​ច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ២០២៤។

តាមរយៈវិធានការនេះ ថវិកាចំនួន១៨១ ប៊ីលានរៀល ត្រូវបានគ្រោងសម្រាប់ការដំឡើងប្រាក់សោធន និងកាត់បន្ថយ​គម្លាតនេះនៅឆ្នាំ២០២៣ និងថវិកាចំនួន ១០០ ប៊ីលានរៀល ត្រូវបានគ្រោងសម្រាប់ឆ្នាំ២០២៤។

កាលបរិច្ឆេទសម្រាប់ការអនុវត្តការដំឡើងប្រាក់បៀវត្សមូលដ្ឋាន និងប្រាក់បំណាច់មុខងារ ជូនដល់មន្ត្រីរាជការ ព្រមទាំងការដំឡើងប្រាក់ឧបត្ថម្ភប្រចាំខែ សម្រាប់មន្ត្រីជាប់កិច្ចសន្យា និងការដំឡើងប្រាក់សោធនប្រចាំខែជូន​អតីតមន្ត្រីរាជការស៊ីវិល និងអតីតយុទ្ធជន ក៏ដូចជាប្រាក់ឧបត្ថម្ភផ្សេងៗ នឹងត្រូវកំណត់ដោយ​អនុក្រឹត្យរបស់រាជ​រដ្ឋាភិបាលនាពេលខាងមុខ។

សម្រាប់ឆ្នាំ២០២៤ នេះដែរ រាជរដ្ឋាភិបាលបានគ្រោងថវិកាចំនួន ៤៩២ ប៊ីលានរៀល សមមូលនឹងប្រមាណ ១២០ លានដុល្លារអាមេរិក សម្រាប់ការពង្រឹងសមត្ថភាព​រដ្ឋបាលសាធារណៈ ដោយផ្តោតជាសំខាន់លើការពង្រឹងគុណភាព ប្រសិទ្ធភាព និងសមិទ្ធកម្មរបស់មន្ត្រី និងស្ថាប័ន តាម​រយៈ​ការលើកទឹកចិត្តចំពោះមន្ត្រីដែលមានគុណវុឌ្ឈិ ដែលកិច្ចការនេះ នឹងស្ថិតក្រោមការដឹកនាំផ្ទាល់ ពីសំណាក់​ប្រមុខ​រាជរដ្ឋាភិបាល។

ជាមួយគ្នានេះ, រាជរដ្ឋាភិបាល ក៏បានគ្រោងថវិកាចំនួន ៥៥ ប៊ីលានរៀល សម្រាប់ការថែទាំសុខភាពមន្ត្រីរាជការស៊ីវិល កងកម្លាំងប្រដាប់អាវុធ និងនិវត្តជន ព្រមទាំងបានបន្តគ្រោង ថវិកាចំនួន ៦ ប៊ីលានរៀល សម្រាប់របបសន្តិសុខ​សង្គមផ្នែក​ហានិភ័យការងារជូនមន្ត្រីសាធារណៈផងដែរ។

ទាក់ទិនទៅនឹងនយោបាយសេដ្ឋកិច្ច-សង្គមនេះ អគ្គលេខាធិការនៃរាជបណ្ឌិត្យសភាកម្ពុជា បណ្ឌិត យង់ ពៅ បានចាត់ទុកថា វិធានការខាងលើ ដែលរាជរដ្ឋាភិបាលអាណត្តិទី៧ បានរំលេចចេញជាការងារនៅដើមឆ្នាំ២០​២៤នេះ បានបង្ហាញឱ្យឃើញនូវការគិតគូរ និងយកចិត្តទុកដាក់របស់រាជរដ្ឋាភិបាលអាណត្តិថ្មីដល់កម្មករ កម្មការិនី និយោជិត និងមន្ត្រីរាជការ កងកម្លាំងប្រដាប់អាវុធ។

ឯកឧត្តមបណ្ឌិត យង់ ពៅ បានផ្តល់ទស្សនៈថា ជាទូទៅបើនិយាយពី ទស្សនៈសង្គម ទស្សនៈផលប្រយោជន៍ ឱ្យតែមានដំឡើងប្រាក់បន្ថែម ការឡើងប្រាក់បៀវត្សរ៍ ប្រាក់ភាគលាភ ប្រាក់ឈ្នួលអប្បបរមា របស់កម្មករ និយោជិត និងការទទួលបានប្រាក់បៀវត្សថ្មីសម្រាប់ឆ្នាំ២០២៤ របស់មន្ត្រីរាជការ ជាការសាទរទៅដល់អ្នកដែលទទួលផល ។

ឯកឧត្តមបណ្ឌិត បានបញ្ជាក់ប្រាប់ AMS ថា ៖ បើជាទស្សនៈរបស់រាជរដ្ឋាភិបាល នេះជាការដែលបានធ្វើកិច្ចការដ៏សំខាន់ តាមគោលនយោបាយរបស់ខ្លួន និងការបន្តមរតកពីរាជរដ្ឋាភិបាលអាណត្តិមុន ដែលរាជរដ្ឋាភិបាលអាណិតថ្មីបានបំពេញ ។

ឯកឧត្តមបណ្ឌិត យង់ ពៅ បានបញ្ជាក់បន្ថែមថា យើងអាចវាយតម្លៃបានថា ការដំឡើងប្រាក់បៀវត្សសម្រាប់មន្ត្រីរាជការទោះតិចឬច្រើនក្តី និងប្រាក់ខែរបស់កម្មករ និយោជិត ជាការបង្ហាញនូវស្ថិរភាពសង្គម របស់រដ្ឋាភិបាល ព្រោះថា បើមិនមានស្ថិរភាព រដ្ឋាភិបាល នឹងមិនអាចរកប្រាក់ មកបន្ថែមដំឡើងប្រាក់បៀវត្សរ៍នេះបានឡើយ ដែលនេះ ជាការបញ្ជាក់បង្ហាញនូវទិដ្ឋភាពនៃចំណុចខាងលើ។

យ៉ាងណាក្តី បណ្ឌិត យង់ ពៅ បានបញ្ជាក់នូវសារសំខាន់ថា អ្វីដែលសំខាន់មួយទៀត គឺរដ្ឋាភិបាលត្រូវគ្រប់គ្រងម៉ាក្រូសេដ្ឋកិច្ច កុំឱ្យមានអតិផរណាបន្ថែម ព្រោះបើដំឡើងប្រាក់បៀវត្សរ៍ទៅ មានអតិផរណាខ្លាំង ដូចនេះការដំឡើង នឹងមិនទទួលបានផលប្រយោជន៍នោះទេ៕