សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ធនាគារជាតិនៃកម្ពុជា បានពង្រីកការតភ្ជាប់ប្រព័ន្ធទូទាត់ឆ្លងដែនតាមប្រព័ន្ធបាគង (Bakong) ជាមួយប្រទេសចំនួន ៩ ដែលអនុញ្ញាតឱ្យអតិថិជនកម្ពុជាប្រើប្រាស់កម្មវិធីបាគង ឬកម្មវិធីធនាគារចល័ត ស្កេន QR Code ដើម្បីទូទាត់ថ្លៃទំនិញ និងសេវាកម្មនៅពាណិជ្ជករប្រមាណ ២៥០ លានទីតាំងក្នុងប្រទេសជាដៃគូ ខណៈប្រតិបត្តិការទូទាត់ឆ្លងដែនតាមប្រព័ន្ធនេះក្នុងឆ្នាំ២០២៥ បានកើនឡើង ៧៤,៥%។
ថ្លែងប្រាប់ AMS នាពេលថ្មីៗនេះ លោក សុខ ចាន់ អ្នកនាំពាក្យសមាគមធនាគារនៅកម្ពុជា (ABC) បានមានប្រសាសន៍ថា ដើម្បីលើកកម្ពស់ការប្រើប្រាស់រូបិយវត្ថុ និងជំរុញការទូទាត់តាម QR Code ប្រកបដោយសុវត្ថិភាព ប្រសិទ្ធភាព កាត់បន្ថយចំណាយប្រតិបត្តិការ ព្រមទាំងពង្រឹងបរិយាបន្នហិរញ្ញវត្ថុ ធនាគារជាតិនៃកម្ពុជាបានពង្រីកកិច្ចសហប្រតិបត្តិការជាមួយប្រទេសជាដៃគូ និងក្រុមហ៊ុនទូទាត់អន្តរជាតិ។
លោកបន្តថា កិច្ចសហប្រតិបត្តិការនេះផ្តល់លទ្ធភាពដល់អតិថិជនប្រព័ន្ធបាគង និងអតិថិជនរបស់គ្រឹះស្ថានធនាគារនិងហិរញ្ញវត្ថុជាសមាជិក អាចទូទាត់ថ្លៃទំនិញ និងសេវាកម្មជាមួយពាណិជ្ជករនៅប្រទេសជាដៃគូបានយ៉ាងងាយស្រួល និងឆាប់រហ័ស ដោយមានទីតាំងទទួលការទូទាត់ប្រមាណ ២៥០លានទីតាំង។
បច្ចុប្បន្ន គ្រឹះស្ថានធនាគារនិងហិរញ្ញវត្ថុចំនួន ៥៩ ដែលជាសមាជិកប្រព័ន្ធបាគង អាចផ្តល់សេវាទូទាត់ឆ្លងដែនជាមួយប្រទេសចំនួន ៩ រួមមាន វៀតណាម តាមរយៈ VietQR Global ឡាវ តាមរយៈ Lao QR ចិន តាមរយៈ UnionPay, Alipay+ និង WeChat Pay ឥណ្ឌា តាមរយៈ Unified Payments Interface (UPI) ជប៉ុន តាមរយៈ JPQR ម៉ាឡេស៊ី តាមរយៈ DuitNow QR សិង្ហបុរី តាមរយៈ SGQR/RoamQR កូរ៉េខាងត្បូង តាមរយៈកម្មវិធី JBB Mobile App របស់ធនាគារ Jeonbuk និងថៃ តាមរយៈ PromptPay។
លោក សុខ ចាន់ បានពន្យល់ថា អតិថិជនដែលប្រើប្រាស់កម្មវិធីបាគង ឬកម្មវិធីធនាគារចល័តរបស់គ្រឹះស្ថានជាសមាជិកដែលបានតភ្ជាប់ជាមួយបណ្តាញទូទាត់របស់ប្រទេសដៃគូ អាចស្កេន QR Code របស់ពាណិជ្ជករនៅប្រទេសទាំងនោះ ដើម្បីទូទាត់ជាប្រាក់រៀល ខណៈពាណិជ្ជករនៅប្រទេសនីមួយៗនឹងទទួលបានប្រាក់ជារូបិយវត្ថុក្នុងស្រុករបស់ខ្លួន។
ក្រៅពីប្រទេសទាំង ៩ នេះ ធនាគារជាតិនៃកម្ពុជាក៏កំពុងបន្តអភិវឌ្ឍ និងពង្រីកការតភ្ជាប់ប្រព័ន្ធទូទាត់ឆ្លងដែនជាមួយប្រទេសឥណ្ឌូណេស៊ី ហ្វីលីពីន និងរវ៉ាន់ដាផងដែរ ដោយគ្រោងនឹងបញ្ចប់ការធ្វើសន្ធានកម្ម និងដាក់ឱ្យដំណើរការជាផ្លូវការនៅឆ្នាំ២០២៧។
លោក សុខ ចាន់ បានបញ្ជាក់ថា ការតភ្ជាប់ប្រព័ន្ធទូទាត់ឆ្លងដែនតាម QR Code បានរួមចំណែកយ៉ាងសំខាន់ក្នុងការសម្រួលដល់ការទូទាត់របស់ភ្ញៀវទេសចរ ពាណិជ្ជករខ្នាតតូច និងមធ្យម ព្រមទាំងអ្នកប្រើប្រាស់ដែលធ្វើដំណើរទៅកាន់ប្រទេសជាដៃគូ ដោយមិនចាំបាច់កាន់សាច់ប្រាក់ច្រើន ឬប្តូររូបិយប័ណ្ណជាមុន ដែលអាចកាត់បន្ថយហានិភ័យមួយចំនួនក្នុងពេលធ្វើដំណើរ។
ចំណែកលោកបណ្ឌិត ជ័យ តិច អ្នកវិភាគសង្គមនិងសេដ្ឋកិច្ច បានមើលឃើញថា ការទូទាត់តាម QR Code មានសារៈសំខាន់ក្នុងបរិបទបច្ចុប្បន្ន ជាពិសេសការកាត់បន្ថយតម្រូវការកាន់សាច់ប្រាក់ច្រើនតាមខ្លួន ដែលអាចបង្កហានិភ័យដល់អ្នកប្រើប្រាស់។
លោកបានគូសបញ្ជាក់ថា ប្រព័ន្ធទូទាត់ឌីជីថលអនុញ្ញាតឱ្យប្រជាពលរដ្ឋប្រើប្រាស់ថវិកាបានកាន់តែមានសុវត្ថិភាព និងគ្រប់គ្រងហិរញ្ញវត្ថុបានច្បាស់លាស់ តាមរយៈការពិនិត្យសមតុល្យសាច់ប្រាក់នៅលើទូរស័ព្ទដៃបានគ្រប់ពេលវេលា និងគ្រប់ទីកន្លែង។ សម្រាប់វិស័យអាជីវកម្ម ការទូទាត់ក៏កាន់តែមានភាពងាយស្រួល ដែលអាចជួយទាក់ទាញវិនិយោគិន និងភ្ញៀវទេសចរបរទេស ដោយមិនចាំបាច់កាន់សាច់ប្រាក់ច្រើនក្នុងពេលធ្វើដំណើរ ព្រមទាំងរួមចំណែកលើកកម្ពស់សេដ្ឋកិច្ចឌីជីថលនៅកម្ពុជា។
ទោះជាយ៉ាងណា លោកបណ្ឌិត ជ័យ តិច បានសង្កត់ធ្ងន់ថា កម្ពុជាគួរបន្តពង្រឹងសុវត្ថិភាពប្រព័ន្ធបច្ចេកវិទ្យា ដើម្បីធានាការប្រើប្រាស់ប្រព័ន្ធបាគងប្រកបដោយសុវត្ថិភាពសម្រាប់អ្នកប្រើប្រាស់ទាំងអស់។
ពាក់ព័ន្ធនឹងការរីកចម្រើននៃប្រព័ន្ធទូទាត់ឌីជីថល លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា ធ្លាប់បានមានប្រសាសន៍ថា កម្ពុជាបានកសាងប្រព័ន្ធហិរញ្ញវត្ថុរបស់ខ្លួនឡើងវិញពីបាតដៃទទេ ហើយបច្ចុប្បន្នបាននិងកំពុងដើរតួនាទីយ៉ាងសកម្មក្នុងការចូលរួមបង្កើតកិច្ចពិភាក្សាសកលស្តីពីទម្រង់ហេដ្ឋារចនាសម្ព័ន្ធហិរញ្ញវត្ថុសម្រាប់ជំនាន់ក្រោយ។
លោកជំទាវបណ្ឌិតបានបន្ថែមថា ប្រព័ន្ធបាគងបានបង្ហាញពីសក្ដានុពលនៃហេដ្ឋារចនាសម្ព័ន្ធឌីជីថលក្នុងការជំរុញការតភ្ជាប់ និងប្រតិបត្តិការរវាងប្រព័ន្ធផ្សេងៗឱ្យកាន់តែទូលំទូលាយ ពង្រីកលទ្ធភាពទទួលបានសេវាទូទាត់ឌីជីថល ពង្រឹងតួនាទីប្រាក់រៀល និងផ្សារភ្ជាប់កម្ពុជាឱ្យកាន់តែជិតស្និទ្ធជាមួយសេដ្ឋកិច្ចដទៃទៀត។
យោងតាមរបាយការណ៍ស្តីពីស្ថិរភាពហិរញ្ញវត្ថុឆ្នាំ២០២៥ (Financial Stability Review 2025) របស់ធនាគារជាតិនៃកម្ពុជា ប្រតិបត្តិការទូទាត់ឆ្លងដែនតាមប្រព័ន្ធបាគងក្នុងឆ្នាំ២០២៥ មានចំនួនប្រមាណ ២៧០,៦ពាន់ប្រតិបត្តិការ កើនឡើង ៧៤,៥% ធៀបនឹងឆ្នាំ២០២៤។ ចំណែកទំហំទឹកប្រាក់ប្រតិបត្តិការសរុបមានប្រមាណ ១១១,៤ពាន់លានរៀល កើនឡើង ២៣៥,៣% ធៀបនឹងឆ្នាំមុន៕
Account
Security
Favourite Content