ភ្នំពេញ ៖ ការដាំដំណាំ ក្រៅពីការថែទាំឱ្យដើម្បីជំរុញដល់ការលូតលាស់ និងទទួលបានផលល្អហើយនោះ ការចេះទុកដាក់ ការវេចខ្ចប់កសិផល បន្ទាប់ពីប្រមូលផលរួច គឺជាផ្នែកមួយយ៉ាងសំខាន់ដែលកសិករគួរយល់ដឹង ដើម្បីរក្សាគុណភាពកសិផលឱ្យបានយូរ អាចលក់ក្នុងតម្លៃល្អ និងទទួលបានការគាំទ្រច្រើន។

លោក ណល់ រតនា អតីតនិស្សិតកម្មសិក្សាអន្តរជាតិជំនាញកសិកម្ម ចំណីអាហារ និងអាហារូបត្ថម្ភ បានមានប្រសាសន៍ថា ការយល់ដឹងពីបច្ចេកទេសថែរក្សាក្រោយពេលប្រមូលផល ជាផ្នែកមួយដ៏សំខាន់ក្នុងការរក្សាទិន្នផលកសិកម្មទុកប្រកបដោយគុណភាព សុវត្ថិភាព និងអាចផ្គត់ផ្គង់ទីផ្សារក្នុងតម្លៃល្អថែមទៀតផង។

លោកបន្តថា ៖

“ផលិតផលកសិកម្មដែលយើងខិតខំផលិតបានទិន្នផលល្អហើយ ការទុកដាក់ និងវេចខ្ចប់នេះក៏ជាចំណុចដែលយើងគួរយកចិត្តទុកដាក់ផងដែរ។ សម្រាប់បច្ចេកទេសក្រោយការប្រមូលផល ឬគេហៅថា post-harvest technology នេះសម្រាប់ប្រទេសយើងក៏កំពុងដំណើរការ ជាពិសេសការស្តុកទុកផ្លែឈើជាដើម”

លោកបន្តថា ៖

“ពាក់ព័ន្ធទៅនឹងបច្ចេកទេសក្រោយការប្រមូលផល ជាចំណេះដឹងមួយដែលទាមទារឱ្យកសិករត្រូវតែចេះ មានន័យថាបន្ទាប់ពីយើងផលិតបានកសិផលល្អហើយ យើងត្រូវចេះទុកដាក់វាបែបណា ឬចាត់ចែងទៅតាមប្រភេទផលិតផលបែបណាខ្លះ។ តួយ៉ាងពពួកផ្លែឈើ ដែលអាចមានជាប្រភេទអាចបន្ទុំបាន(Climacteric fruit) មានដូចជាស្វាយ ឬក៏ប្រភេទផ្លែឈើដែលមិនបន្ទុំ(Non-Climacteric fruit) មានដូចជាផ្លែដូង ដែលយើងប្រមូលផលហើយមិនចាំបាច់បន្ទំទៀតនោះទេ”

សម្រាប់បច្ចេកទេសនេះទៀតសោត លោកបន្ថែមថា ៖

“យើងផ្ដោតទៅលើអាយុកាលនៃការប្រមូលផល ថាតើយើងត្រូវធ្វើដូចម្ដេចដើម្បីពន្យាអាយុកាលរបស់ផលិតផលឱ្យបានយូរ ហើយវាក៏អាស្រ័យទៅលើប្រភេទកសិផល ក៏ដូចជាការស្តុកទុកនៅក្នុងលក្ខខណ្ឌសមស្របណាមួយដូចគ្នា ហើយការស្តុកទុកនេះក៏ជាផ្នែកមួយដ៏សំខាន់សម្រាប់កសិករផងដែរ ដើម្បីជៀសវាងការខាតបង់នានារបស់ម្ចាស់ចំការផ្ទាល់តែម្ដង”

តួយ៉ាង ផ្លែស្វាយ ដែលបេះមកជាផ្លែស្វាយខ្ចី ឬស្វាយចាស់ ថាតើតម្រូវការទីផ្សារត្រូវការស្វាយចាស់ទាំងអស់ ឬយ៉ាងណា ប្រសិនបើគេត្រូវការតែ ៥០ភាគរយនៃបរិមាណស្វាយដែលប្រមូលផល ហេតុនេះគេអាចយកស្វាយចាស់នេះទៅបន្ទំតាមស្តង់ដារ គុណគូរក្នុងបរិមាណត្រូវដែលអាចឱ្យកម្រិតជាតិស្ករក្នុងស្វាយស្ថិតក្នុងកម្រិតសមល្មម ដែលជាផ្នែកមួយចូលរួមជួយឱ្យកសិផលអាចបំពេញតម្រូវការទីផ្សារបានបន្ថែមទៀត។ ចំណែកការវេចខ្ចប់ ដូចជាផលិតផលបន្លែ ដែលការវេចខ្ចប់ជាផ្នែកមួយជួយឱ្យបន្លែមានសោភ័ណភាពទាក់ទាញអតិថិជនផង ជាការធ្វើទីផ្សារផង ក៏ដូចជាការរក្សាគុណភាពបន្លែ តួយ៉ាងបន្លែស្លឹកដែលងាយស្រពោន ឬស្លោក គេអាចប្រើជាប្លាស្ទិកដើម្បីរុំបិទជិត កាត់បន្ថយដំណកដង្ហើមរបស់បន្លែ ធ្វើឱ្យបន្លែរក្សាគុណភាពបានយូរ មិនងាយស្លោក ឬមិនងាយប្រែពណ៌ជាដើម។

ទន្ទឹមគ្នានេះដែរ មុននឹងឈានដល់ការវេចខ្ចប់ ឬក៏ធ្វើទីផ្សារ គេក៏ត្រូវយកចិត្តទុកដាក់ក៏ដូចចជាធានានូវគុណភាព និងសុវត្ថិភាព ដល់អ្នកបរិភោគ។ សម្រាប់បន្លែដែលរាប់ជាបន្លែមានគុណភាព គេផ្ដោតលើផ្នែកខាងក្នុងដូចជាមានអាហារូបត្ថម្ភ ឬសារធាតុចិញ្ចឹមគ្រប់គ្រាន់ឬនៅ ហើយបន្លែដែលមានសុវត្ថិភាព គេសំដៅលើផ្នែកខាងក្រៅដូចជា ថាតើវាមានភ្នាក់ងារបង្កជំងឺ ឬអត់ ហើយវាមានបន្សល់នូវកាកសំណល់គីមី ឬថ្នាំគីមីផ្សេងៗឬយ៉ាងណា។ នេះជាអ្វីដែលអ្នកជំនាញខាងលើបានលើកឡើង។

ស្រដៀងគ្នានេះដែរ លោក អុន សីហា ស្ថាបនិកទីក្រុងបណ្ដុះ ក៏មានមតិចូលរួមដែរថា ការវេចខ្ចប់ទំនិញក៏ដូចជាកសិផល គឺមានសារៈសំខាន់អាចជួយពន្យាពេលនៃការវិវត្តផលិតផផ ជួយរក្សាសារធាតុចញ្ចឹមក្នុងបន្លែឱ្យនៅបានល្អ រក្សាអនាម័យផលិតផល ងាយស្រួលលក់ និងជួយទាក់ទាញអតិថិជន។

លោកបន្ថែមថា ៖

“ការរក្សារទុកបន្លែ យើងអាចរក្សាទុកបានយូរ និងអាចលក់នៅលើទីផ្សារក្នុងតម្លៃល្អ មានដូចជាត្រូវកាត់បន្លែដែលមានអាយុល្មម មិនខ្ចីពេក និងចាស់ពេក ត្រូវសម្អាតជាមួយទឹកស្អាតឱ្យបានស្អាត រួចត្រូវបង្វិលយកទឹកចេញពីបន្លែឱ្យស្ងួត ហើយការវេចខ្ចប់ត្រូវបិតប្រអប់ឱ្យជិត កុំឱ្យមានខ្យល់ចូល ដែលយើងអាចលក់បានតម្លៃថ្លៃជាងបន្លែដែលមិនបានខ្ចប់”

ជារួមមក ចំណុចដែលសំខាន់គឺត្រូវចេះបច្ចេកទេសក្នុងការប្រមូលផល ការទុកដាក់កសិផល ការត្រួតពិនិត្យគុណភាព និងសុវត្ថិភាពមុនពេលវេចខ្ចប់ ហើយចុងក្រោយគឺការវេចខ្ចប់ដែលអាចផ្ដល់ជាប្រយោជន៍ទាំងខាងបច្ចេកទេស និងទីផ្សារ ទើបអាចធ្វើឱ្យកសិផលអាចលក់បានតម្លៃល្អ មានការគាំទ្រ ជឿទុកចិត្តច្រើនពីអតិថិជន ៕