ភ្នំពេញ ៖ ជ្រក់ម្រេចខ្ចីសម្ងួត ជាផលិតផលកែច្នៃមួយប្រភេទដែលជាគ្រឿងផ្សំជំនាន់ថ្មី មានប្រជាប្រិយភាព និងមានទីផ្សារល្អ ជាពិសេសទីផ្សារក្នុងស្រុកដែលមានការគាំទ្រទាំងអតិជនជាជនជាតិបរទេស និងជនជាតិខ្មែរផងដែរ។

លោក លីម សីហា អ្នកគ្រប់គ្រងទូទៅសិប្បកម្ម ធូបបូអាគ្រីហ្វូដ ដែលកំពុងផលិតជ្រក់ម្រេចខ្ចីសម្ងួត បានមានប្រសាសន៍ប្រាប់ AMS ថា ៖ បច្ចុប្បន្ននេះ សិប្បកម្ម ធូបបូអាគ្រីហ្វូដ កំពុងផលិតម្រេចជ្រក់ម្រេចសម្ងួតដែលមានគុណភាព រសជាតិឆ្ងាញ់ ហើយមានបេសកកម្មសំខាន់ៗក្នុងការកែច្នៃកសិផលក្នុងស្រុក ដើម្បីកាត់បន្ថយការនាំចេញកសិផលស្រស់ទៅប្រទេសជិតខាង និងបង្កើនការងារជូនប្រជាសហគមន៍ក្រៅពីការដាំដុះផងដែរ ខណៈដែលគោលបំណងចម្បងគឺផ្ដោតខ្លាំងទៅលើការនាំចេញនៅនឹងកន្លែង។

លោកបន្តថា៖

«ចំពោះគុណភាពម្រេចដែលយើងយកមកជ្រក់គឺមិនខ្ចីពេក មិនចាស់ពេក ពោលគឺយើងពិនិត្យ និងជ្រើសយកគុណភាពច្បាស់លាស់មួយដើម្បីផលិតម្រេចជ្រក់ដែលមិនផុយ និងមិនរឹង ហើយតាមរយៈអាជីវកម្មមួយនេះផងដែរ ក៏បានផ្ដល់នូវការងារ និងចំណូលបន្ថែមដល់កសិករដោយការបេះផ្លែម្រេចប្រមាណ ៧០-១០០គីឡូក្រាមក្នុងមួយថ្ងៃ ជាមួយកម្រៃឈ្នួល ៥០០រៀលក្នុងមួយគីឡូក្រាម»។

ទាក់ទងនឹងសង្វាក់ផលិតកម្មវិញ ម្ចាស់សិប្បកម្មខាងលើរៀបរាប់ថា ការផលិតត្រូវផ្ដោតលើ ២ដំណាក់កាលសំខាន់ៗ គឺនៅកសិដ្ឋាន និងនៅកន្លែងកែច្នៃ ដោយផ្នែកនៅកសិដ្ឋាន សម្ដៅលើដំណាក់កាលដែលកសិករដាំដុះ ថែទាំ ប្រមូលផល និងប្រឡេះគ្រាប់ម្រេចខ្ចី វេចខ្ចប់ និងបញ្ជូនមកកាន់កន្លែងកែច្នៃ។ លុះម្រេចមកដល់កន្លែងកែច្នៃ ត្រូវឆ្លងកាត់ការពិនិត្យគុណភាព បន្ទាប់មកយកទៅលាងសម្អាត ដាក់ជ្រក់ ២សប្ដាហ៍ សម្ងួត វេចខ្ចប់ ទើបអាចចែកចាយបាន។

សម្រាប់ម្រេចជ្រក់សម្ងួតមានតម្លៃ ៤ដុល្លារក្នុងមួយកំប៉ុង ដែលអាចរក្សារទុកបានរយៈពេល ៦ខែ ហើយអាចផលិតបាន ១៥០០ – ១៧០០កំប៉ុងក្នុងមួយខែ។ ដោយឡែកផលិតផលកែច្នៃនេះអាចទទួលទានបានជាមួយនឹងអាហារស្ទើរគ្រប់ប្រភេទ មិនថាជាមួយបាយឆា គុយទាវ សាច់អាំង ឬសាឡាដជាដើម ព្រោះវាមានរសជាតិហឺរឆ្ងាញ់ និងងាយស្រួលដាក់តាមខ្លួន ។

ជាមួយនឹងកិច្ចដំណើរការរបស់សិប្បកម្មខាងលើនេះត្រូវបានលោក សីហា ប្រាប់ឱ្យដឹងថា ដំបូងឡើយ រូបលោក និងក្រុមការងារបានចំណាយដើមទុនប្រមាណ ២ពាន់ដុល្លារដោយសារខ្សែសង្វាក់ផលិតកម្មម្រេចជ្រក់សម្ងួតនេះមិនត្រូវការសម្ភារផលិតសាំញ៉ាំច្រើននោះទេ ប៉ុន្តែការធ្វើអាជីវកម្មអ្វីមួយចាំបាច់ត្រូវតែមានការរៀបចំខ្លួនឱ្យបានល្អរួចរាល់ ហើយបើមានដៃគូ ត្រូវរកដៃគូណាដែលមានជំនាញផ្សេងៗគ្នា ដើម្បីឱ្យមានគំនិត និងការរៀបចំអាជីវកម្មមានលក្ខណៈពេញលេញ​ ហើយអ្វីដែលសំខាន់ជាងនេះទៅទៀត គឺការត្រៀមដើមទុនបម្រុងសម្រាប់ដំណើរការអាជីវកម្ម។

គួរបញ្ជក់ថា ជ្រក់ម្រេចខ្ចីសម្ងួត ដែលត្រូវបានផលិតនៅក្នុងខេត្តបាត់ដំបងមួយនេះ ក្រៅពីមានរសជាតិឈ្ងុយឆ្ងាញ់ ថែមទាំងមានប្រយោជន៍ច្រើនដល់សុខភាព ដូចជា សម្បូរនៅសារធាតុដែលជួយសម្រួលសរសៃឈាម និងជួយដល់ប្រព័ន្ធរំលាយអាហារជាដើម។ ក្រៅពីជ្រក់ម្រេចខ្ចីសម្ងួត សិប្បកម្ម ធូបបូអាគ្រីហ្វូដ ក៏មានផលិតសុខភាពផ្សេងទៀតដូចជា ប្រភេទម្សៅតែ រួមមានម្សៅតែខ្ញី និងម្សៅតែរមៀត និងមានម្សៅប្រភេទ Instant ដែលជាប្រភេទមិនមានកាក មិនមានជាតិស្ករ ងាយស្រួលឆុង រលាយបានល្អ និងងាយស្រួលយកតាមខ្លួន៕​​