ជាទូទៅ យុវជននៅកម្ពុជាច្រើនតែមានបញ្ហាទៅលើការគ្រប់គ្រងចំណូល-ចំណាយជាប្រចាំថ្ងៃ ប្រចាំខែ ហើយភាគច្រើន ការចំណាយមាន ទំហំច្រើនជាងចំណូល ដែលជាហេតុធ្វើឲ្យមានការចាយវាយមានភាពលំអៀង និងដែលអាចប៉ះពាល់ដល់ផែនការហិរញ្ញវត្ថុទៅអនាគត ។ ខាងក្រោមនេះ ជាគន្លឹះមួយចំនួនដែលយុវជនអាចសិក្សា និងអនុវត្តក្នុងការរស់នៅប្រចាំថ្ងៃ ដើម្បីពង្រឹងការគ្រប់គ្រងហិរញ្ញវត្ថុឱ្យបានប្រសើរជាងមុន។
១. អប់រំខ្លួនឯង ៖ ត្រូវដឹងថា អ្នកមានទំនួលខុសត្រូវលើអនាគតហិរញ្ញវត្ថុរបស់អ្នក ដូច្នេះហើយគួរអានសៀវភៅអំពីមូលដ្ឋានគ្រឹះមួយចំនួន ដើម្បីពង្រឹងចំណេះដឹងហិរញ្ញវត្ថុផ្ទាល់ខ្លួន។ នៅពេលដែលអ្នកមានចំណេះដឹងលើហិរញ្ញវត្ថុគ្រប់គ្រាន់ហើយ អ្នកនឹងមិនងាយចំណាយអ្វីខ្ជះខ្ជាយ ឬចំណាយតាមមិត្តភក្កិ ទិញរបស់ណាមួយដែលលើលពីសមត្ថិភាពរបស់អ្នកឡើយ។
២. រៀនចំណាយទៅលើអ្វីដែលត្រឹមត្រូវ ៖ បន្ទាប់ពីអ្នកបានអប់រំចំណេះដឹងហិរញ្ញវត្ថុដល់ខ្លួនឯងហើយ អ្នកនឹងយល់ពីវិន័យចំនួនពីរធំៗគឺ កុំឱ្យការចំណាយលើសពីចំណូលរបស់អ្នក និងតាមដានជាប្រចាំថាអ្នកចំណាយទៅលើអ្វីខ្លះ។ វិធីដ៏ល្អដើម្បីចៀសវាងនូវការចំណាយ ដែល មិនចាំបាច់គឺ អ្នកត្រូវបង្កើតផែនការចំណាយផ្ទាល់ខ្លួន។
៣. សន្សំទុកមួយកញ្ចប់សម្រាប់បង្កាហានិភ័យ ៖ អ្នកនឹងមិនអាចដឹងមុនទេថា ខ្លួនអាចនឹងជួបបញ្ហាអ្វីនាពេលអនាគត ដូច្នេះដើម្បីកុំឱ្យបញ្ហាទាំងនោះ បង្អាក់ផែនការអនាគត គួររៀបចំប្រាក់សន្សំមួយកញ្ចប់ទុកសម្រាប់បញ្ហាបន្ទាន់នានា។
៤. មានប្រព័ន្ធការពារសុខភាពរបស់ខ្លួន ៖ ក្រៅតែពីការមើលថែទាំសុខភាពរបស់ខ្លួនឱ្យបានល្អ អ្នកក៏គួរតែគិតគូរលើប្រព័ន្ធការពារសុខភាព ដូចជា ទិញធានារ៉ាប់រងសុខភាពជាដើម។ សម្រាប់បរិបថនៃប្រទេសកម្ពុជា សុខភាពនេះជារឿងសំខាន់ណាស់ ដោយករណីភាគច្រើន គឺមាន ជំងឺនៅពេលដែលកំពុងស្ថិតក្នុងវ័យសកម្មក្នុងការធ្វើការងារ ឬរកស៊ី។ ដូច្នេះហើយ សូមកុំឲ្យបញ្ហាសុខភាពទៅយាយីរំខានការធ្វើការរបស់អ្នក ឲ្យសោះ ព្រោះវាមិនត្រឹមតែប៉ះពាល់ដល់អ្នកតែម្នាក់ទេ តែក៏នឹងប៉ះពាល់ដល់សមាជិកផ្សេងទៀតដែលស្ថិតក្រោមបន្ទុករបស់អ្នកផងដែរ។
៥. សន្សំទុកសម្រាប់ការចូលនិវត្តន៍ចាប់ពីពេលនេះទៅ ៖ មិនថាអ្នកនៅក្មេងយ៉ាងណានោះទេ អ្នកគួរតែរៀបចំផែនការសម្រាប់ការចូលនិវត្តន៍របស់អ្នកដោយចាប់ផ្ដើមពីពេលនេះទៅ។ នៅពេលដែលអ្នកមានរយៈពេលសន្សំកាន់តែច្រើន ប្រាក់របស់អ្នកនឹងកើនឡើងកាន់តែច្រើនដូចគ្នា ម្លោះហើយទម្រាំដល់ពេលអ្នកចូលនិវត្តន៍ អ្នកមិនចាំបាច់ត្រូវភ័យព្រួយអំពីការរស់នៅប្រចាំថ្ងៃពេលដែលគ្មានការងារធ្វើនោះទេ៕