សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការដាំដុះដំណាំចម្រុះ គឺជាការដាំដំណាំលើសពីមួយមុខនៅពេលជាមួយគ្នាក្នុងដីស្រែ ឬចំការតែមួយ។ តាមរយៈការដាំដុះដំណាំចម្រុះ អ្នកដាំនឹងទទួលផលបានច្រើនមុខលើសពីអ្នកដាំដំណាំតែមួយមុខ ហើយអ្នកដាំក៏អាចបន្ថយនូវការបំផ្លាញរបស់ដំណាំពីពពួកស្មៅ សត្វល្អិត និងជំងឺទាំងឡាយផងដែរ។
សម្រាប់គុណសម្បត្តិនៃការដាំដុះដំណាំចម្រុះ គឺអាចរក្សាគុណភាពដី ការពារការហូរច្រោះ អាចប្រើប្រាស់ឱ្យអស់នូវលទ្ធភាពពន្លឺថ្ងៃ និងចំណីអាហាររបស់រុក្ខជាតិ។ ថែមលើនេះ វាជួយការពារផលដំណាំឱ្យផុតពីការខាតបង់ទាំងស្រុង ព្រោះសត្វល្អិត ស្មៅ និងជំងឺ ភាគច្រើនរាតត្បាតលើដំណាំតែមួយប្រភេទប៉ុណ្ណោះ។ ដំណាំចម្រុះក៏អាចជួយឱ្យយើងទទួលបាននូវផលិតផលកសិកម្ម និងស្បៀងបានច្រើន ដោយប្រើពលកម្មដដែលលើផ្ទៃដីមួយកន្លែងដូចគ្នា។
ចំពោះការដាំដំណាំចម្រុះលើដីតែមួយនេះ កសិករអាចផ្គត់ផ្គង់ដល់គ្រួសារនូវម្ហូបអាហារគ្រប់គ្រាន់ និងប្លែកៗដូចជា ដាំសណ្ដែកមួយរងនៅចន្លោះពោត និងដំឡូងមី ឬអាចដាំសណ្ដែកអង្គុយ សណ្ដែកទ្រើង នៅចន្លោះត្រប់ ត្រសក់ ឬពពាយ ហើយអាចដាំត្រប់ ត្រសក់ ឬពពាយ និងសណ្ដែកអង្រែ នៅពេលជាមួយគ្នាផងដែរ។ នៅពេលបេះ ត្រសក់ ត្រប់ ឬពពាយ រួចត្រូវដាំសណ្ដែកអង្គុយ ពោត ឬសណ្ដែកទ្រើង ក្រោយមកយើងអាចប្រមូលផលដំណាំទាំងនេះដំណាលសណ្ដែកអង្រែដែរ។
បន្ថែមពីលើនេះ កសិករក៏អាចដាំរុក្ខជាតិធ្វើជាជីស្រស់ និងដំណាំស្បៀងជាមួយគ្នា តួយ៉ាងការដាំសណ្ដែកអង្គុយជាមួយពោត ពេលប្រមូលផលពោត និងសណ្ដែករួច យើងត្រូវកាប់ ឬភ្ជួរដីសណ្ដែកលប់ចូលទៅក្នុងដី។ ដោយឡែក ពពួកសណ្ដែក គឺជារុក្ខជាតិដែលបន្ថែមអាសូត ដែលជាអាហារដ៏សំខាន់របស់រុក្ខជាតិទៅក្នុងដីតាមរយៈឫសរបស់វា។ នៅពេលយើងដាំពពួលសណ្ដែកចម្រុះជាមួយដំណាំដទៃទៀត អាសូតនឹងត្រូវបានបង្កើននៅក្នុងដី សម្រាប់ឱ្យដំណាំលើកក្រោយអាចស្រួប ឬបឺតយកបាន។
ទន្ទឹមគ្នានេះដែរ ការដាំដំណាំចម្រុះក៏ត្រូវការការយកចិត្តទុកដាក់ដូចជា ការជ្រើសរើសមុខដំណាំដោយប្រុងប្រយ័ត្ន ដោយមិនឱ្យដំណាំមួយបឺតយកជីជាតិទឹក ឬទទួលនូវពន្លឺថ្ងៃច្រើនជាងដំណាំមួយទៀតឡើយ។ ឯពូជដំណាំថ្មី ជាច្រើនដែលផ្ដល់ទិន្នផលខ្ពស់ មិនអាចដុះបានល្អជាមួយប្រភេទដំណាំប្រភេផ្សេងគ្នាទេ។
ក្រៅពីនេះ ក៏មានវិធីដាំដុះផ្សេងទៀតដូចជា ការដាំដុះរាយប៉ាយ ការដាំដុះចម្រុះជួរ ការដាំដុះឆ្លាស់ជួរ ការដាំដុះដំណាំការពារ ការដាំដុះបន្តក្នុងដីដែលបានដាំហើយ ជាដើម៕
Account
Security
Favourite Content