ស្ពៃខៀវ ឬស្ពៃខ្មៅ ជាប្រភេទស្ពៃមួយក្នុងចំណោមប្រភេទស្ពៃដែលកប្រជាសិករនិយមដាំ និងបរិភោគ ដោយសារតែវាជាដំណាំមិនប្រកាន់រដូវ ប៉ុន្តែកសិករក៏ត្រូវយល់ដឹងពីបច្ចេកទេសមួយចំនួន ដើម្បីដាំស្ពៃខៀវឱ្យបានជោគជ័យ និងអាចទទួលបានផលច្រើន។
ដើម្បីដាំស្ពៃខៀវ កសិករគួរដាំ អំឡុងខែតុលា ដល់ខែធ្នូ និងពីខែកក្កដា ដល់ខែតុលា ពិសេសនៅតំបន់ខ្ពស់រាប និងតំបន់ភ្នំ ដែលមានសីតុណ្ហភាពសមស្រប ហើយអាចទទួលបានទិន្នផលស្ពៃខៀវជាមធ្យម ១៦-១៨ តោនក្នុងមួយហិកតា។

សម្រាប់ពូជស្ពៃខៀវ ប្រទេសយើងនិយមដាំស្ពៃ ៣ ប្រភេទ ទីមួយ គឺប្រភេទពូជស្លឹកតូចវែងមានកម្រាស់ស្ដើង និងគែមស្លឹកដូចធ្មេញរណា ពូជ ទីពីរគឺ ពូជស្លឹកធំលាតត្រដាង ហើយធ្លាក់ចុះក្រោម តែមានស្លឹកស្ដើងមិនអាចធន់នឹងរដូវភ្លៀងបានទេ ចំណែកពូជដែលគេនិយមមួយទៀតគឺប្រភេទពូជស្លឹកក្រាស់ធាងធំពណ៌ស ឈរត្រង់ហើយរួញៗ ដែលធន់នឹងរដូងភ្លៀងអាចដាំបានគ្រប់រដូវ។

ក្រៅពីការជ្រើសរើសពូជ កសិករក៏ត្រូវជ្រើសរើសប្រភេទដីណា ដែលមានជីជាតិគ្រប់គ្រាន់ ជាប្រភេទដីធូរ ស្រទាប់ដីដាំដុះជ្រៅ ដែលអាចជាប្រភេទដីក្រហម ដីគ្រោះខ្មៅ ដីល្បាយខ្សាច់ ដីល្បាប់ក្បែរមាត់មាត់ទន្លេ ឬព្រែក ឬដីល្បាយធម្មតាក៏បាន។ បន្ទាប់មក គេត្រូវរៀបចំសម្អាតដី ប្រមូលស្មៅ និងកាកសំណល់រុក្ខជាតិចេញ រួចភ្ជួរដីហាលឱ្យស្ងួតពី ៥-៧ ថ្ងៃ ហើយរាស់បំបែកដីឱ្យម៉ដ្ឋ ដើម្បីកម្ចាត់ចៃ និងធ្វើឱ្យដីធូរល្អ។

ការភ្ជួរដីត្រូវធ្វើឡើង ២-៣ លើក ទើបគេអាចថ្នាលបានដោយមានទទឹង ១ ម៉ែត្រ ចន្លោះរង ២០-៣០ សង់ទីម៉ែត្រ កម្ពស់ ១៥-២០ សង់ទីម៉ែត្រ ឯបណ្ដោយរងកសិករអាចធ្វើទៅតាមទំហំដី ហើយរាស់បំបែកដី និងកៀរដីលើរងឱ្យស្មើល្អតាមរងនីមួយៗ។

ចំណែកការសាប និងដាំដុះកូនស្ពៃខៀវ កសិករអាចធ្វើឡើងបាន ៣ របៀបផ្សេងៗគ្នា ដូចជាវិធី សាបកូនដែលគេអាចបណ្ដុះកូនស្ពៃបានពីររបៀបទៀត គឺការបណ្ដុះក្នុងគ្រាប់ក្នុងថាស និងការសាបពូជស្ពៃដោយផ្ទាល់លើថ្នាល។ ក្រៅពីនេះ គេក៏មានវិធីស្ទូងកូនស្ពៃ និងការដាំដោយសាបគ្រាប់ផ្ទាល់ ដែលកសិករអាចជ្រើសរើសបានទៅតាមស្ថានភាពដី និងធនធានដែលមានស្រាប់។

ពាក់ព័ន្ធនឹងការថែទាំវិញ បន្ទាប់ពីសាបកូនស្ពៃបានប្រមាណ ៧ ថ្ងៃ គេត្រូវស្រោចបំប៉នជីបរិមាណ ២០ ក្រាម លាយជាមួយទឹក ១៥ លីត្រ ស្រោចឱ្យសព្វ ទើបស្រោចទឹកលាងតាមក្រោយ។ ថែមលើនេះ គេក៏ត្រូវជ្រុំដីឱ្យដីធូរល្អ និងដកស្មៅ ពិសេសដកស្មៅនៅពេលកូនដំណាំមានអាយុ ២៥ ថ្ងៃបន្ទាប់ពីសាបហើយ តែត្រូវផ្អាកការជ្រុំដីចៀសវាងត្រូវឫសដំណាំ។

ឯការស្រោចស្រប់វិញ ស្ពៃខៀវ  ត្រូវការស្រោចទឹកជាប្រចាំ មួយថ្ងៃ ២ ដង ព្រឹកម្ដង និងល្ងាចម្ដង ដែលជាធម្មតាគេចាប់ផ្ដើមស្រោចចាប់ពីពេលបាចគ្រាប់រហូតដល់ដំណាំមានស្លឹក ២ លុះពេលមាន ៣ សន្លឹកឡើងទៅ គេត្រូវបង្កើនការស្រោចទឹករហូតដល់ពេលប្រមូលផលតែម្ដង។

គួរបញ្ជាក់ដែរថា ការដាំដោយប្រើបច្ចេកទេសគ្របថង់ប្លាស្ទិក ជាវិធីមួយដែលអាចជួយឱ្យការដាំដុះទទួលបានជោគជ័យ និងអាចលក់កសិផលបានតម្លៃខ្ពស់ ពិសេសនារដូវវស្សា ដែលអាចការពារទឹក មិនធ្វើឱ្យដំណាំរលួយឫស។

ទន្ទឹមគ្នានេះដែរ ការដាំស្ពៃខៀវក៏អាចជួបនឹងជំងឺពកឫស ជំងឺហ្វុយសារីយ៉ូម ជំងឺរលាកស្លឹក ជំងឺផ្សិតម្សៅ ជំងឺរលួយទន់ ជំងឺរលាកគល់ ជំងឺស្លោកស្លឹក ជំងឺរលួយបណ្ដូល និងជំងឺអុជន៍ពណ៌សជាដើម។ ក្រៅពីនេះ ក៏មានសត្វចង្រៃមួយចំនួន ដែលកសិករគួរយកចិត្តទុកដាក់ គឺសត្វដង្កូវយោលទោង ដង្កូវហ្វូង ដង្កូវបាក់ខ្នង សត្វទាគូ ជាដើម ដែលកសិករអាចប្រើវិធីកម្ចាត់បាន តាមរយៈការដាំដំណាំចម្រុះ ឬប្រើវិធីគីមីផ្សេងៗ។

ចុងក្រោយគឺការប្រមូលផល ដែលកសិករអាចប្រមូលផលបាន បន្ទាប់ពីដាំបានរយៈពេល ៣៥-៤៥ ថ្ងៃ ឬបន្ទាប់ពីស្ទូងហើយពី ២៨-៣៥ ថ្ងៃ គឺនៅពេលដែលស្ពៃខៀវមានចេញផ្កាក្រពុំៗនៅក្នុងបណ្ដូល។ មុនពេលកាត់ ឬដក គេពុំត្រូវស្រោចទឹកនោះទេ ចៀសវាងនាំឱ្យជាំ និងកកិត ធ្វើឱ្យពិបាកលក់នៅលើទីផ្សារ៕