សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ របាយការណ៍ពីអគ្គនាយកដ្ឋានគយ និងរដ្ឋាករកម្ពុជា ដែលទើបចេញផ្សាយកាលពីថ្ងៃទី១១ ខែធ្នូ បានឱ្យដឹងថា ក្នុងរយៈពេល១១ខែ ឆ្នាំ២០២៥ គិតចាប់ពីខែមករា ដល់ខែវិច្ឆិកា ឆ្នាំ២០២៥ ពាណិជ្ជកម្មរវាងកម្ពុជា និងសហរដ្ឋអាម៉េរិក មានទំហំជាង ១១.៨៧ពាន់លានដុល្លារ កើនឡើងជាង ២៧.៧% ធៀបនឹងរយៈពេលដូចគ្នាកាលពីឆ្នាំ២០២៤ ដែលមានទំហំត្រឹម ៩.៣ពាន់លានដុល្លារ ដោយក្នុងនោះ ការនាំចូលពីសហរដ្ឋអាម៉េរិក មានតម្លៃជាង ៣៦៧លានដុល្លារ កើនឡើង៥០.៣% បើធៀបនឹងរយៈពេលដូចគ្នាកាលពីឆ្នាំ២០២៤ មានតម្លៃជាង ២៤៤លានដុល្លារ។ ដោយឡែកគិតតែក្នុងវិច្ឆិកា ឆ្នាំ២០២៥ កម្ពុជានាំចេញទៅសហរដ្ឋអាម៉េរិក ក្នុងតម្លៃ ១.១ពាន់លានដុល្លារ កើនឡើង៣៣.៦% បើធៀបនឹងឆ្នាំ២០២៤ ដែលមានតម្លៃជាង៨២៨លានដុល្លារ ខណៈសហរដ្ឋអាមេរិកនាំចូលមកវិញមានតម្លៃជាង៤១.២លានដុល្លារ កើនឡើង៥៥% បើធៀបនឹងឆ្នាំ២០២៤ ដែលមានតម្លៃជាង២៦លានដុល្លារ។
សហរដ្ឋអាម៉េរិក នៅតែជាទីផ្សារចម្បងសម្រាប់កម្ពុជា ហើយទំនិញសំខាន់ៗ ដែលកម្ពុជានាំចេញទៅរួមមានផលិតផលសម្លៀកបំពាក់ កាបូបធ្វើដំណើរ ស្បែកជើង និងគ្រឿងបង្គុំជាដើម។ ចំណែកកម្ពុជា នាំចូលពីអាម៉េរិកវិញ មានដូចជា រថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត។
សូមជម្រាបថា ក្រោមការខិតខំប្រឹងប្រែងរបស់រាជរដ្ឋាភិបាលដែលដឹកនាំដោយសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ធ្វើឱ្យការចរចាពន្ធបដិកាជាមួយសហរដ្ឋអាម៉េរិក សម្រេចបាលទ្ធផលល្អ ដោយលោក ដូណាល់ ត្រាំ ប្រធានាធិបតីម៉េរិក បានសម្រេចទម្លាក់អត្រាពន្ធបដិកាសម្រាប់ការនាំចូលទំនិញពីកម្ពុជាពី ៤៩% មកនៅ ១៩%ប៉ុណ្ណោះ ខណៈកម្ពុជាទម្លាក់ពន្ធគយលើទំនិញអាម៉េរិកដល់ ០% ដែលចាប់អនុវត្តន៍តាំងពីថ្ងៃទី១ ខែសីហា ឆ្នាំ២០២៥មកម្លេះ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា៖ កម្ពុជា គឺជាប្រទេសទី១ ក្នុងពិភពលោក ដែលបានចុះកិច្ចព្រមព្រៀងពាណិជ្ជកម្មបដិការជាផ្លូវការជាមួយសហរដ្ឋអាម៉េរិក ។ នេះបង្ហាញពីភាពប្រាកដប្រជា និងបង្កើនទំនុកចិត្តសម្រាប់ការវិនិយោគ និងការនាំចេញទៅកាន់ទីផ្សារដ៏ធំរបស់អាម៉េរិកផងដែរ៕
គួរបញ្ជាក់ដែរថា យោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា ក្នុងរយៈពេល១១ខែ ឆ្នាំ២០២៥ កម្ពុជានាំចេញទំនិញ ទៅកាន់ទីផ្សារអន្តរជាតិ គិតទឹកប្រាក់ជាង ២៧ពាន់លានដុល្លារ កើនឡើង១៤% បើធៀបរយៈពេលដូចគ្នា កាលពីឆ្នាំ២០២៤ មានចំនួនប្រមាណជាង ២៤ពាន់លានដុល្លារ៕
Account
Security
Favourite Content