បរទេស ៖ លុយគ្រីបតូ (Cryptocurrencies) ឬលុយឌីជីថល បានក្លាយទៅជាប្រធានបទដ៏ចម្រូងចម្រាសរវាងអ្នកមានជំនឿចិត្តលើទីផ្សារជួញដូរ និងអ្នកមិនមានទំនុកចិត្តលើលុយប្រភេទនេះអស់រយៈពេលជាច្រើនឆ្នាំមកហើយ។ ទោះបីជាយ៉ាងណាក្តី ប្រសិនបើអ្នកមិនទាន់បានដឹង ឬស្រាវជ្រាវខ្លះអំពីការពិត និងប្រវត្តិរបស់លុយគ្រីបតូទាំងនោះទេ ប្រហែលជាអ្នកមានការភ្ញាក់ផ្អើលខ្លាំងណាស់ថាវាមានកំណើនគួរឲ្យភ្ញាក់ផ្អើលចាប់តាំងតែពីត្រូវបានបង្កើតឡើងដំបូង។

មកទល់បច្ចុប្បន្ន ចំនួននៃប្រភេទលុយគ្រីបតួបានកើនឡើងទៅដល់ជាង ២៣ ០០០ ដែលក្នុងនោះ Bitcoin គឺជាលុយគ្រីបតូដំបូងគេដែលត្រូវបានកកើតឡើងតាំងតែពីឆ្នាំ២០០៩ដោយជនជាតិជប៉ុនម្នាក់មានឈ្មោះថា Satochi Nakamoto។ ធៀបទៅនឹងកាលពីំមួយទសវត្សរ៍មុន លុយគ្រីបតូនៅលើទីផ្សារមានចំនួនត្រឹមតែ៧ប៉ុណ្ណោះ។ ប៉ុន្តែ តើអ្នកដឹងទេថា មូលហេតុអ្វីបានជាលុយគ្រីបតូត្រូវបានបង្កើតឡើងក្នុងចំនួនយ៉ាងច្រើនបែបនេះ ហើយហេតុអ្វីបានជាលុយគ្រីបតូខ្លះទទួលបានភាពជោគជ័យមានតម្លៃខ្ពស់ក្នុងទីផ្សារជួញដូរ ហើយខ្លះមិនទទួលបានជោគជ័យ?

ពន្យល់ឲ្យងាយស្រួល តាមរយៈអត្ថបទដែលធ្លាប់បានចេញផ្សាយនៅលើគេហទំព័រជាច្រើន ក៏ដូចជាការស្រាវជ្រាវដោយ CoinMarketCap ផងដែរនោះបានសរសេរថាដោយសារតែលុយគ្រីបតូមិនមានរបាំងនយោបាយ របាំងបច្ចេកទេស ដើម្បីទិញលក់ និងបង្កើតឡើង ហើយមនុស្សគ្រប់គ្នាអាចបង្កើតវាបានតាមការចង់បានដូចជាការបង្កើតគេហទំព័រដែរ ប៉ុន្តែសំខាន់នោះថា តើអ្នកនឹងអាចទទួលបានការទុកចិត្តពីអ្នកវិនិយោគដោយរបៀបណាដើម្បីឲ្យពួកគេទិញយកលុយគ្រីបតូទាំងនោះពីអ្នកបាន។ បច្ចុប្បន្នគេអាចបង្កើតលុយគ្រីបតូដោយមិនចាំបាច់មានជំនាញអាយធីឡើយតាមរយៈវេបសាយ Fiverr ហើយតម្លៃនៃការបង្កើតអាចចាប់ផ្តើមពីតិចជាង២០ដុល្លារប៉ុណ្ណោះ។

ប្រភពដដែលបានពន្យល់ទៀតថា ទោះបីជាយ៉ាងណាក្តី ក្នុងចំណោមលុយគ្រីបតូដ៏ច្រើនលើសលប់ទាំងនោះមានខ្លះមិនទាន់ទទួលបានភាពជោគជ័យនោះឡើយដោយខ្វះចំណុចដ៏សំខាន់មួយគឺគោលដៅឬគោលបំណងនៃការបង្កើតខណៈដែលលុយគ្រីបតូដែលជោគជ័យភាគច្រើនគឺត្រូវបានបង្កើតឡើងជាមួយនឹងគោលដៅច្បាស់ដោយក្នុងនោះមានដូចជា Bitcoin, Ethereum, Tetherនិង BNB ជាដើមដែលលុយគ្រីបតូទាំងនេះមានគោលដៅស្រដៀងគ្នាគឺជួយគាំទ្រនិងធ្វើឲ្យល្អប្រសើរឡើងនៃការដោះដូរហិរញ្ញវត្ថុនៅលើបច្ចេកវិទ្យា blockchain។

នៅពេលដែលបច្ចេកវិទ្យាខ្លាំងដែលផ្តល់ភាពងាយស្រួលដល់អ្នកអភិវឌ្ឍក្នុងការបង្កើតលុយគ្រីបតូច្រើនពេកហើយគោលដៅនៃអ្នកវិនិយោគចង់ទទួលបានប្រាក់ចំណេញឬ ROI (Return on Investment)ឆាប់រហ័សពេកវាបានធ្វើឲ្យមានបញ្ហាខ្លះនៅក្នុងទីផ្សារជួញដូរហើយជាពិសេសគឺធ្វើឲ្យលុយគ្រីបតូដែលគ្មានផែនការគោលដៅច្បាស់លាស់មិនអាចទទួលភាពជោគជ័យនិងសូម្បីតែត្រូវបានគេស្គាល់នោះឡើយ។

គួរឲ្យដឹងដែរថា Bitcoin ដែលគេស្កាល់ថាជាលុយគ្រីបតូដំបូងបំផុតរបស់ពិភពលោកនោះបច្ចុប្បន្នកំពុងទទួលបានការទុកចិត្តយ៉ាងខ្លាំងក្លាពីសំណាក់ក្រុមអ្នកវិនិយោហើយបើយោងតាមTechpodia បានព្យាករណ៍អំពីកំណើនឡើងយ៉ាងខ្លាំងនៃតម្លៃ Bitcoin ដែលនឹងអាចកើនឡើងទៅដល់៨,៥ម៉ឺនដុល្លារនៅក្នុងឆ្នាំ២០២៤នេះហើយបន្តកើនឡើងទៅដល់១០ម៉ឺននៅឆ្នាំ២០២៥ទោះបីជាយ៉ាងនឹងធ្លាក់បន្តិចមក៩ម៉ឺនដុល្លារនៅក្នុងឆ្នាំ២០២៦មុនពេលដែលវាអាចហក់ងើបឡើងវិញទៅដល់១៦ម៉ឺនដុល្លារនៅត្រឹមឆ្នាំ២០៣០៕