សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាការពិត ធ្យូងអាចរាប់ថាជាតម្រូវការប្រចាំថ្ងៃមួយរបស់ប្រជាជនដែរ ប៉ុន្តែដើម្បីអាចបង្កើតចេញជាធ្យូងបាន គេត្រូវប្រមូលឈើយកទៅដុត ដែលសកម្មភាពនេះតិច ឬច្រើន នឹងអាចប៉ះពាល់ដល់ព្រៃឈើ។ ជំនួសឱ្យការយកឈើទៅដុត បុរសម្នាក់បានប្រមូលយកត្រឡោកដូងដែលគេកោសយកសាច់រួចទៅដុតឱ្យចេញជាធ្យូងអនាម័យ។ ធ្យូងអនាម័យនេះផងដែរ មិនត្រឹមតែរួមចំណែកកាត់បន្ថយប្រើប្រាស់ឈើប៉ុណ្ណោះទេ ប៉ុន្តែក៏រួមចំណែកជួយដល់សុខមាលភាពអ្នកប្រើប្រាស់ផងដែរ។
លោក ជុំ វិចិត្រ ជានាយកប្រតិបត្តិក្រុមហ៊ុន KGC ដែលជាក្រុមហ៊ុនផលិតធ្យូងអនាម័យ និងមានវត្តមានក្នុងទីផ្សារតាំងតែពីឆ្នាំ២០០៨ មកម្លេះ។ ចាប់ផ្ដើមដំបូងជាមួយនឹងគម្រោងរបស់អង្គការក្រៅរដ្ឋាភិបាល លោក ជុំ វិចិត្រ និងដៃគូសហការមួយរូបទៀត នៅតែចង់ឃើញសិប្បកម្មផលិតធ្យូងអាចដំណើរការទៅបានក្នុងរូបភាពជាក្រុមហ៊ុនឯកជន។
រហូតមកដល់បច្ចុប្បន្ននេះ សិប្បកម្មរបស់លោកបានប្រមូលត្រលោកដូងជាមធ្យមប្រមាណ ជា ២០០តោនក្នុងមួយខែ ដើម្បីយកទៅផលិតជាធ្យូងអនាម័យ។ ជាចំនួនមួយច្រើនសមល្មមឱ្យលោកផ្ដល់ឱកាសការងារដល់ប្រជាជនដែលជាអ្នករស់នៅលើគំនរសម្រាប់នៅតំបន់ស្ទឹងមានជ័យ។
លោក ជុំ វិចិត្រ បានឱ្យដឹងថា៖
«អាជីវកម្មយើងបានរួមចំណែកជួយសង្គមក្នុងរូបភាពច្រើនមែនទែន ធ្យូងដែលយើងផលិតបាននេះមានគុណភាពល្អ មិនប៉ះពាល់ដល់អ្នកប្រើប្រាស់ ហើយកម្មករនៅក្នុងសិប្បកម្មក៏យើងយកអ្នកដែលធ្លាប់រស់នៅលើគំនរសម្រាមដែរ។ ម្យ៉ាងទៀត នៅពេលដែលឪពុកម្ដាយមានការងារធ្វើត្រឹមត្រូវ កូនៗរបស់ពួកគាត់ក៏មាន ឱកាសបានចូលរៀនផងដែរ»។
ដោយឡែក សម្រាប់វត្ថុធាតុដើមវិញ លោក ជុំ វិចិត្របានឱ្យដឹងថា លោកច្រើនតែប្រមូលទិញពីអាជីវករនៅតាមផ្សារ ដើម្បីយកមកកិនបំបែកមុននឹងដាក់ដុតឱ្យទៅជាធ្យូង។ រីឯតម្លៃទៀតសោត ក៏មិនជាលើសពីធ្យូងធម្មតាដែរ ផ្ទុយទៅវិញធ្យូងអនាម័យនេះមិនមានផ្សែង មិនមានផ្កាភ្លើង ថែមទាំងងំបានយូរទៀតផង ដែលអាចផ្ដល់ផលចំណេញដល់អ្នកប្រើប្រាស់ ទាំងថវិកា និងពេលវេលា។
ម្ចាស់អាជីវកម្មរូបនេះបានបន្តគូសបញ្ជាក់ឱ្យដឹងទៀតថា៖
«ក្នុងការប្រើប្រាស់ធ្យូងអនាម័យ១គីឡូ គឺស្មើនឹងការជួយសន្សំសំចៃឈើ៧គីឡូ ដោយមិនដឹងខ្លួន។»
ដោយឈរលើគោលការណ៍ជួយសង្គមបែបនេះ អាជីវកម្មរបស់លោកបានទទួលនូវការលើកទឹកចិត្តពីរដ្ឋាភិបាល តាមរយៈការបន្ធូរបន្ថយពន្ធ និងមានការបើកផ្លូវសម្រាប់នាំចេញទៅទីផ្សារក្រៅប្រទេសទៀតផង។
ផលជះបែបវិជ្ជមានទៅដល់សង្គម និងសេដ្ឋកិច្ចនេះផងដែរ ដែលជំរុញឱ្យអាជីវកម្មខាងលើជាប់ជាអាជីវកម្មបរិយាបន្ន។
គួរបញ្ជាក់ថា អាជីវកម្មបរិយាបន្នសំដៅលើអាជីវកម្មដែលផ្ដល់ប្រយោជន៍ដល់ភាគីពាក់ព័ន្ធទាំង៣គឺ រដ្ឋាភិបាល ម្ចាស់អាជីវកម្មផ្ទាល់ និងសហគមន៍។ គំរូអាជីវកម្មថ្មីនេះ កំពុងត្រូវបានពិភពលោកនិយាយជារួម និងកម្ពុជានិយាយដោយឡែក ជំរុញឱ្យមានកាន់តែច្រើនបន្ថែមទៀត៕
Account
Security
Favourite Content