សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បំពង់បឺតផលិតពីអង្ករធម្មជាតិ ១០០ ភាគរយ ដែលផលិតដោយកូនខ្មែរ កំពុងទទួលបានការគាំទ្រកាន់តែច្រើនពីអតិថិជនក្នុងស្រុក និងទីផ្សារក្រៅប្រទេស ខណៈផលិតផលនេះអាចប្រើជំនួសបំពង់បឺតជ័រ និងអាចទទួលទានបាន បន្ទាប់ពីប្រើប្រាស់រួច។
លោក ធឿន លីន នាយកប្រតិបត្តិរោងចក្រផលិតបំពង់បឺតអង្ករ TK & D Manufacturing បានមានប្រសាសន៍ថា បំពង់បឺតនេះផលិតចេញពីអង្ករសុទ្ធ ១០០ ភាគរយ ដោយមិនលាយសារធាតុគីមីសម្រាប់រក្សាទុកឱ្យបានយូរ និងមិនលាយជាមួយគ្រឿងផ្សំផ្សេងៗដើម្បីបន្ថែមរសជាតិ ដែលលោកថា មិនប៉ះពាល់ដល់សុខភាពអ្នកប្រើប្រាស់។
លោកបានថ្លែងថា អតិថិជនអាចទទួលទានបំពង់បឺតនេះបានដូចជានំកញ្ចប់ បន្ទាប់ពីទទួលទានកាហ្វេ ឬភេសជ្ជៈរួច ដោយមិនប៉ះពាល់ដល់សុខភាព និងបរិស្ថាន ខុសពីបំពង់បឺតជ័រដែលកំពុងត្រូវបានប្រើប្រាស់នៅតាមហាងលក់ភេសជ្ជៈមួយចំនួន។
លោក ធឿន លីន បានឱ្យដឹងថា នៅដំណាក់កាលដំបូងនៃការផលិត អតិថិជនមិនទាន់ស្គាល់ផលិតផលនេះច្រើននៅឡើយទេ។ ប៉ុន្តែបន្ទាប់ពីដំណើរការ និងចរាចរលើទីផ្សារបានមួយរយៈ អតិថិជនបានចាប់ផ្តើមស្គាល់ជាបន្តបន្ទាប់ និងមានការគាំទ្រកាន់តែច្រើន ទាំងក្នុង និងក្រៅប្រទេស ដែលជំរុញឱ្យការផលិតមានកំណើនពីមួយឆ្នាំទៅមួយឆ្នាំ។
ក្រៅពីចែកចាយនៅទូទាំង ២៥រាជធានី-ខេត្តក្នុងប្រទេសកម្ពុជា បំពង់បឺតផលិតពីអង្ករនេះ ក៏មានអតិថិជនបញ្ជាទិញសម្រាប់នាំចេញទៅទីផ្សារក្រៅប្រទេសជាបន្តបន្ទាប់ រួមមាន អូស្ត្រាលី អាមេរិក កាណាដា កូរ៉េ និងប៉ូឡូញ។
បច្ចុប្បន្ន រោងចក្រមានសមត្ថភាពផលិតបំពង់បឺតជាមធ្យមប្រមាណ ១,៨លានដើមក្នុងមួយថ្ងៃ ដើម្បីបំពេញតម្រូវការរបស់អតិថិជន។ ផលិតផលនេះមានតម្លៃខ្ពស់ជាងបំពង់បឺតជ័របន្តិច ដោយមួយកេសមាន ២,៥០០ដើម តម្លៃ ១១៦ដុល្លារ។ ទោះជាយ៉ាងណា បើគិតតាមតម្លៃលក់រាយដល់អតិថិជន ភាពខុសគ្នាពីបំពង់បឺតជ័រមិនដល់ ១០០រៀលក្នុងមួយដើមនោះទេ។
លោកបានលើកឡើងថា អ្នកលក់កាហ្វេ និងភេសជ្ជៈគួរប្រើបំពង់បឺតអង្ករនេះ ដើម្បីបង្កើនភាពទាក់ទាញដល់អតិថិជន ខណៈផលិតផលអាចទទួលទានជាមួយកាហ្វេ ឬភេសជ្ជៈបានផងដែរ។
លោក ធឿន លីន បានបន្ថែមថា នៅពេលអ្នកលក់កាហ្វេ ឬភេសជ្ជៈផ្សេងៗប្រើបំពង់បឺតអង្ករនេះ នឹងអាចទទួលបានការគាំទ្រពីអតិថិជនកាន់តែច្រើន ដោយសារអតិថិជនអាចទទួលទានបំពង់បឺតជាមួយភេសជ្ជៈ ដើម្បីបន្ថែមរសជាតិ ហើយអាចជំរុញឱ្យអតិថិជនត្រឡប់មកទិញម្តងទៀត។
ទាក់ទងនឹងសុវត្ថិភាពផលិតផល លោកបានឱ្យដឹងថា៖
“រោងចក្របានយកចិត្តទុកដាក់ខ្ពស់លើសុខភាព និងបរិស្ថាន ចាប់តាំងពីដំណាក់កាលប្រមូលទិញអង្ករពីកសិករ រហូតដល់ដំណើរការផលិត ការត្រួតពិនិត្យផលិតផលសម្រេច និងការស្តុកទុក។ ដំណើរការទាំងនេះត្រូវបានត្រួតពិនិត្យដោយស្ថាប័នជំនាញក្នុង និងក្រៅប្រទេស។”
សម្រាប់ដំណើរការផលិត ជំហានដំបូង រោងចក្រកែច្នៃអង្ករឱ្យទៅជាម្សៅ បន្ទាប់មកបញ្ចូលទៅក្នុងខ្សែសង្វាក់ផលិតកម្ម ដើម្បីកែច្នៃម្សៅអង្ករទៅជាបំពង់បឺត។ បន្ទាប់ពីនោះ បំពង់បឺតត្រូវបានយកទៅសម្ងួត មុននឹងក្លាយជាផលិតផលសម្រេច ដែលអាចប្រើប្រាស់ និងអាចទទួលទានបាន។
រោងចក្រផលិតបំពង់បឺតអង្ករនេះ បានចាប់ផ្តើមផលិតតាំងពីឆ្នាំ ២០២០ ស្ថិតលើផ្ទៃដីជាង ១ហិកតា ក្នុងភូមិតាកែវក្រោម ឃុំបឹងកន្ទួត ស្រុកក្រគរ ខេត្តពោធិ៍សាត់។ រោងចក្រនេះបានរួមចំណែកផ្តល់ការងារដល់ប្រជាពលរដ្ឋខ្មែរប្រមាណជាង ៤០នាក់ និងជួយទិញអង្ករពីប្រជាពលរដ្ឋប្រមាណ ៧០០តោនក្នុងមួយឆ្នាំ ដែលជាការចូលរួមលើកកម្ពស់ជីវភាពកសិករ និងសេដ្ឋកិច្ចជាតិ៕
Account
Security
Favourite Content