បរទេស ៖ ការនាំចេញរបស់ចិននៅក្នុងខែមិថុនា កើនឡើងក្នុងល្បឿនលឿនរហូតដល់ ២៧% បើធៀបនឹងរយៈពេលដូចគ្នាកាលពីឆ្នាំមុន ដែលជំរុញដោយសារការផ្ទុះឡើងនៃតម្រូវការបច្ចេកវិទ្យាបញ្ញាសិប្បនិម្មិត (AI) នេះបើយោងតាមការរាយការណ៍ពី Euro News។

កាលពីថ្ងៃអង្គារ ទិន្នន័យចេញផ្សាយដោយទីភ្នាក់ងារគយចិនបានឱ្យដឹងថា កំណើននៃការនាំចេញក្នុងខែមិថុនាបានកើនឡើង ២៧ ភាគរយធៀបនឹងឆ្នាំមុន និងកើនឡើងពី ១៩,៤ ភាគរយនៅក្នុងខែឧសភា។ ទន្ទឹមនឹងនេះ ទាំងការនាំចេញ និងការនាំចូល កើនឡើងខ្ពស់ជាងការព្យាករណ៍របស់អ្នកសេដ្ឋកិច្ច។ ជាលទ្ធផល ចិនមានអតិរេកពាណិជ្ជកម្មចំនួន ១២៥,៦ ពាន់លានដុល្លារក្នុងខែមិថុនា ដែលកើនឡើងពី ១០៥,៤ ពាន់លានដុល្លារនៅក្នុងខែឧសភា។

លោក Julian Evans-Pritchard ប្រធានផ្នែកសេដ្ឋកិច្ចចិននៅស្ថាប័ន Capital Economics បានលើកឡើងថា ទំហំពាណិជ្ជកម្មនៅក្នុងខែមិថុនា បានឆ្លុះបញ្ចាំងពីការហក់ឡើងនៃតម្លៃឈីបពាក់កណ្តាលចម្លង ( Semiconductor) នាពេលថ្មីៗនេះ ដែលត្រូវបានជំរុញដោយការរីកចម្រើននៃបញ្ញាសិប្បនិម្មិត AI។ យ៉ាងណាក៏ដោយ ទោះបីជាមិនរាប់បញ្ចូលកត្តាទាំងនោះក៏ដោយ ក៏តម្រូវការបរទេសលើទំនិញរបស់ចិននៅតែមានភាពរឹងមាំដដែល។ លើសពីនេះ ភាពរឹងមាំនៅក្នុងវិស័យផលិតកម្មសម្រាប់ការនាំចេញនេះបានជួយប៉ះប៉ូវដល់ភាពទន់ខ្សោយនៃការចំណាយ និងការវិនិយោគក្នុងស្រុក ដែលបណ្តាលមកពីវិបត្តិអចលនទ្រព្យ។  បើគិតចាប់តាំងពីខែមករាដល់ខែមិថុនា ការនាំចេញរបស់ចិនបានកើនឡើង ១៧,៦ ភាគរយ និងការនាំចូលកើនឡើង ២៦,៦ ភាគរយ ធៀបនឹងរយៈពេលដូចគ្នាកាលពីឆ្នាំ២០២៥។

យ៉ាងណាមិញ ក្រុមអ្នកកំណត់គោលនយោបាយរបស់អាម៉េរិក និងអឺរ៉ុប ជារឿយៗបង្ហាញក្តីព្រួយបារម្ភចំពោះការកើនឡើងនៃឱនភាពពាណិជ្ជកម្មជាមួយចិន ដោយបានកំណត់ការរឹតបន្តឹងនានាលើការនាំចូលពីចិន។ ជាមួយគ្នានេះ ដើម្បីជៀសវាងពីការរឹតបន្តឹង និងពន្ធគយខ្ពស់ពីលោកខាងលិច ក្រុមហ៊ុនចិនជាច្រើនកំពុងផ្លាស់ប្តូររោងចក្រទៅកាន់តំបន់ផ្សេងៗ និងបង្កើនការនាំចេញបន្ថែមទៀតទៅកាន់អាស៊ីអាគ្នេយ៍ អាមេរិកឡាទីន និងអាហ្វ្រិក។ នៅក្នុងខែមិថុនា ការនាំចេញទៅកាន់អាស៊ីអាគ្នេយ៍កើនឡើងជិត ៣៥ ភាគរយ ខណៈការនាំចេញទៅកាន់សហភាពអឺរ៉ុប និងអាម៉េរិកឡាទីនកើនឡើងជាង ១៨ ភាគរយបើធៀបនឹងរយៈពេលដូចគ្នាកាលពីឆ្នាំ២០២៥។ បន្ថែមពីនេះ ការនាំចេញទៅកាន់អាម៉េរិកកើនឡើងជិត ១៤ ភាគរយធៀបនឹងរយៈពេលដូចគ្នាកាលពីឆ្នាំមុន។

កាលពីសប្តាហ៍មុន មូលនិធិរូបិយវត្ថុអន្តរជាតិ (IMF) បានដំឡើងការព្យាករណ៍លើកំណើនប្រចាំឆ្នាំរបស់ចិនបន្ថែម ០,២ ភាគរយ ពោលគឺកើនដល់ ៤,៦ ភាគរយ។ នៅក្នុងឆ្នាំ២០២៦ នេះ ចិនបានកំណត់គោលដៅកំណើនសេដ្ឋកិច្ចប្រចាំឆ្នាំរបស់ខ្លួនចន្លោះពី ៤,៥ ភាគរយទៅ ៥ ភាគរយ។ ទន្ទឹមនឹងនេះ ថ្នាក់ដឹកនាំចិនបានបន្តស្វែងរកវិធីជំរុញការចំណាយរបស់អ្នកប្រើប្រាស់ក្នុងស្រុកតាមរយៈគំនិតផ្តួចផ្តើមផ្សេងៗដូចជា ការផ្តល់កិច្ចឧបត្ថម្ភធនសម្រាប់ការទិញរថយន្ត និងឧបករណ៍ប្រើប្រាស់ក្នុងផ្ទះ។ ទោះជាយ៉ាងណាក្តី ពលរដ្ឋចិនភាគច្រើននៅតែមានអារម្មណ៍ថា មានសម្ពាធពីសេដ្ឋកិច្ចដែលកំពុងតែដើរយឺត និងព្យាយាមជៀសវាងការចំណាយលើទំនិញតម្លៃថ្លៃ៕។