សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNN បានរាយការណ៍ថា ប្រធានាធិបតីសហរដ្ឋអាម៉េរិក លោក Donald Trump បានពង្រីកសង្រ្គាមពាណិជ្ជកម្មទៅដល់វិស័យភាពយន្ត ដោយបានបញ្ជាឲ្យមានការដាក់ពន្ធរហូតដល់ ១០០% លើភាពយន្តទាំងឡាយណាដែលថត ឬផលិតនៅក្រៅប្រទេសអាម៉េរិក។
Trump បានបង្ហោះនៅលើវេទិកាប្រព័ន្ធផ្សព្វផ្សាយសង្គម Truth Social ថា លោកបានណែនាំក្រសួងពាណិជ្ជកម្ម និងតំណាងពាណិជ្ជកម្មសហរដ្ឋអាម៉េរិកឱ្យដាក់ពន្ធ ១០០% លើខ្សែភាពយន្តដែលផលិតនៅក្រៅអាម៉េរិក និងនាំចូលមកផ្សព្វផ្សាយនៅក្នុងប្រទេស។
លោក Trump បានសរសេរថា ៖
«ឧស្សាហកម្មភាពយន្តនៅអាម៉េរិកកំពុងដួលរលំយ៉ាងឆាប់រហ័ស។ ប្រទេសផ្សេងទៀតកំពុងផ្តល់ការលើកទឹកចិត្តគ្រប់បែបយ៉ាងដើម្បីទាញអ្នកផលិតភាពយន្តរបស់យើងចេញឆ្ងាយពីអាម៉េរិក។ ដូច្នេះហើយ ខ្ញុំអនុញ្ញាតឱ្យនាយកដ្ឋានពាណិជ្ជកម្ម និងតំណាងពាណិជ្ជកម្មសហរដ្ឋអាម៉េរិកចាប់ផ្តើមដំឡើងពន្ធ ១០០% ជាបន្ទាន់លើភាពយន្តណាដែលផលិតនៅបរទេស និងនាំចូលមកក្នុងប្រទេស។ យើងចង់បានភាពយន្តដែលផលិតនៅអាម៉េរិក»។
ស្របពេលជាមួយគ្នានេះដែរ ទីកន្លែងសម្រាប់ថតភាពយន្តនៅបរទេសជាច្រើនបានបន្ធូរបន្ថយពន្ធយ៉ាងច្រើន រួមមានស្ទូឌីយោភាពយន្ត និងទូរទស្សន៍ ដើម្បីថតភាពយន្ត និងកម្មវិធីនៅខាងក្រៅហូលីវូដ ដែលបាននាំឱ្យមានផលិតកម្មមួយចំនួនធំផ្លាស់ប្តូរការថតនៅបរទេស។ ជាលទ្ធផល អភិបាលរដ្ឋកាលីហ្វ័រញ៉ា លោក Gavin Newsom បានស្នើសុំឥណទានពន្ធដ៏ធំមួយ ដើម្បីនាំយកការផលិតនៅហូលីវូដឡើងវិញ ខណៈដែលលោក Trump បានសរសេរថា “ហូលីវូដ និងតំបន់ជាច្រើនទៀតនៅក្នុងសហរដ្ឋអាមេរិកកំពុងត្រូវបានបំផ្លិចបំផ្លាញដោយសារការអូសទាញយកប្រជាប្រិយភាព និងប្រជាជាតិដទៃទៀត ហើយវាគឺជាការគំរាមកំហែងសន្តិសុខជាតិ។
យ៉ាងណាមិញ គេមិនច្បាស់ទេថា តើពន្ធបែបនេះនឹងត្រូវដាក់ដោយរបៀបណា ដោយសារភាពយន្តគឺជាកម្មសិទ្ធិបញ្ញា មិនមែនជាទំនិញនោះទេ ហើយវាជាប្រភេទនៃសេវាកម្មដែលបច្ចុប្បន្នមិនជាប់ពន្ធ។ ទោះជាយ៉ាងណាក្តី តំណាងពាណិជ្ជកម្មសហរដ្ឋអាម៉េរិកបានកត់សម្គាល់ថា សេវាកម្មមួយចំនួនអាចស្ថិតនៅក្រោមរបាំងពាណិជ្ជកម្ម។
យ៉ាងណាក៏ដោយ ទោះបីជាហូលីវូដមិនត្រូវបានបំផ្លិចបំផ្លាញក៏ដោយ ប៉ុន្តែការលក់សំបុត្រកុននៅអាម៉េរិកបានធ្លាក់ចុះចាប់តាំងពីមានការរាតត្បាតនៃជំងឺកូវីដ ដោយអ្នកប្រើប្រាស់បានផ្លាស់ប្តូរទម្លាប់មើលភាពយន្តរបស់ពួកគេនៅផ្ទះវិញ។ គួរឲ្យបញ្ជាក់ដែរថា ការលក់សំបុត្រភាពយន្តសរុបរបស់អាម៉េរិកមានចំនួនជិត ១២ ពាន់លានដុល្លារក្នុងឆ្នាំ២០១៨ ប៉ុន្តែបានធ្លាក់ចុះនៅសល់ជាង ២ ពាន់លានដុល្លារប៉ុណ្ណោះក្នុងឆ្នាំ២០២០ ដោយសាររោងកុនជាច្រើនត្រូវបានបិទទ្វារដោយសារការរាតត្បាតនៃជំងឺកូវីដ៕
Account
Security
Favourite Content