ភ្នំពេញ ៖ ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍លើកទី២ ត្រូវបានបិទ​បញ្ចប់នៅថ្ងៃទី២៦ ខែមីនា ឆ្នាំ២០​​២៤ ជាមួយនឹងការអបអរសាទរដ៏ក្លៀវក្លានៃកិច្ចសហប្រតិបត្តិការ ភាពច្នៃប្រតិដ្ឋ និងក្តីសង្ឃឹមសម្រាប់អនា​គតផ្នែកវិទ្យាសាស្ត្ររបស់កម្ពុជា។ នេះជាអត្ថន័យនៃសេចក្តីថ្លែងក្នុងពិធីបិទទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍លើកទី២របស់ ឯកឧត្តម ហែម វណ្ណឌី រដ្ឋមន្ត្រី​​ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលបានឆ្លុះបញ្ចាំងពីសមិទ្ធផល​នៃព្រឹត្តិ​ការណ៍នេះ និងបានបញ្ជាក់ពីមហិច្ឆតាក្នុងការជំរុញការរីកចម្រើនផ្នែកវិទ្យាសាស្ត្រ និងបច្ចេកវិទ្យារបស់ជាតិ។

ឯកឧត្តម រដ្ឋមន្ត្រី បានកោតសរសើរចំពោះកិច្ចខិតខំប្រឹងប្រែងរួមគ្នាក្នុងការរៀបចំព្រឹត្តិការណ៍នេះដោយមានការចូលរួមពីគ្រប់ផ្នែក និងគ្រប់ជំនាញ និងបានទទួលស្គាល់នូវការរួមចំណែករបស់ក្រសួង ឧត្តមសិក្សា ស្រាវជ្រាវ និងនវានុវត្តន៍នៃប្រទេសថៃ និងវិទ្យាស្ថានកូរ៉េសម្រាប់ការអភិវឌ្ឍឧស្សាហកម្មរ៉ូបូត នៃសាធារណរដ្ឋកូរ៉េផងដែរ។

ក្រោមប្រធានបទ “សហគ្រាសធុនតូច និងមធ្យមឆ្ពោះទៅវិទ្យាសាស្ត្រ បច្ចេកវិទ្យា និងនវានុវត្តន៍” ព្រឹត្តិការណ៍រយៈពេលបីថ្ងៃនេះបានបង្ហាញការធ្វើពិសោធន៍វិទ្យាសាស្ត្រ បញ្ញាសប្បនិម្មិត (AI) ឧបករណ៍វទ្យាសាស្ត្រ និង​បច្ចេ​កវិទ្យារ៉ូបូត ព្រមទាំងគំនិតនវានុវត្តន៍នានា ក្នុងគោលដៅជំរុញកំណើននៃសហគ្រាសធុនតូច និង​មធ្យម ដើម្បីឱ្យពួកគេរួមចំណែកកាន់តែប្រសើរដល់ការអភិវឌ្ឍសង្គម-សេដ្ឋកិច្ចរបស់កម្ពុជា។

ក្នុងការជំរុញការចូលរួម ក្រសួងបានរៀបចំ​មធ្យោបាយដឹកជញ្ជូនសម្រាប់ម្ចាស់សហគ្រាសធុនតូច និង​មធ្យម​មក​ពីទូទាំងប្រទេស និងសិស្សានុសិស្សមកពីតាមសាលានានាក្នុងរាជធានីភ្នំពេញ មកកាន់ស្តង់​ពិព័រណ៌ ដោយបានផ្តល់​ជូនអ្នកចូលរួមទាំងនោះនូវបទពិសោធន៍ទំនាក់ទំនងផ្ទាល់ជាមួយវិទ្យាសាស្ត្រ និងបច្ចេក​វិទ្យាទំនើប។

តាមរយៈព្រឹត្តិការណ៍ បីថ្ងៃនេះ មានអ្នកចូលរួមទស្សនាចំនួន ៣១,២៦៨ នាក់ ដែលក្នុងនោះមានសាធារណជនទូទៅប្រមាណ៣៨% ម្ចាស់សហគ្រាសធុនតូច និងមធ្យមប្រមាណ៣៥%  សិស្សនិស្សិត ១៧% និងអ្នកស្រាវ​ជ្រាវ និងស្រឡាញ់វិស័យវិទ្យាសាស្រ្តប្រមាណ១០%។

ទន្ទឹមនឹងនោះ ឯកឧត្តមបានគូសបញ្ជាក់ពីសារៈសំខាន់នៃការលើកកម្ពស់វប្បធម៌នវានុវត្តន៍ និងបានកោត​សរសើរ​ចំពោះ​គំនិតផ្តួចផ្តើមដើម្បីបណ្តុះទឹកចិត្តឱ្យសិស្សានុសិស្សមកពីតាមបណ្តាសាលារៀនជាច្រើន បានចូលរួម តាមរយៈការលេងហ្គេមអប់រំ និងសកម្មភាពវិទ្យាសាស្ត្រនានា។ ពិព័រណ៌វិទ្យាសាស្ត្រក៏ផ្តោត​លើ​តួនាទី​ដ៏សំខាន់នៃការអប់រំក្នុងការថែបំប៉ន និងបណ្តុះអ្នកវិទ្យាសាស្ត្រ និងនវានុវត្តន៍ករជំនាន់ក្រោយ។

ឯកឧត្តម ហែម វណ្ណឌី បានបញ្ជាក់ថា៖

«ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍លើកទី២ បានបញ្ចប់ ក៏ប៉ុន្តែកាលានុវត្តភាពនានាកំពុងរង់ចាំយើងនាពេលអនាគតដ៏ខ្លីខាងមុខ។ នវានុវត្តន៍ពិតជាគ្មានដែនកំណត់ ហើយសមិទ្ធផលដែលយើងអាចសម្រេចរួមគ្នាក៏គ្មានដែនកំណត់ដែរ។ ថ្ងៃនេះគឺជាជំហានដ៏សំខាន់មួយទៀត ទៅកាន់ដំណើរគ្មានទីបញ្ចប់នៃការបង្កើតពិភព លោកដ៏ល្អប្រសើរមួយ សម្រាប់យុវជនជំនាន់ក្រោយរបស់យើង»។

ឯកឧត្តមរដ្ឋមន្ត្រី បានបញ្ជាក់ពីការប្តេជ្ញាចិត្តរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រុម​ប្រឹក្សាជាតិវិទ្យាសាស្ត្រ បច្ចេកវិទ្យា និងនវានុវត្តន៍ ក្នុងការជំរុញការរីកចម្រើន​ក្នុង​វិស័យនេះ។ ជាមួយនឹងចក្ខុវិស័យនៃការប្រែក្លាយកម្ពុជាទៅជាប្រទេស​ចំណូលខ្ពស់នៅឆ្នាំ២០៥០ ឯកឧត្តមរដ្ឋមន្ត្រី​បានសង្កត់ធ្ងន់លើនិរន្តរភាពនៃការបន្តសម្ទុះស្រាវជ្រាវផ្នែកវិទ្យាសាស្ត្រ និងនវានុវត្តន៍បច្ចេកវិទ្យា។

ឯកឧត្តម ហែម វណ្ណឌី ក៏​បាន​ថ្លែង​អំណរគុណចំពោះការគាំទ្រយ៉ាងពេញទំហឹងរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងការខិតខំប្រឹងប្រែង​រួមគ្នារបស់ថ្នាក់ដឹកនាំ និងមន្ត្រី​រាជការ វិស័យឯកជន ដៃគូអភិវឌ្ឍន៍ អ្នកអប់រំ អ្នកវិទ្យាសាស្ត្រ អ្នកស្ម័គ្រចិត្ត និងសិស្សានុសិស្ស ដែលបានរួមចំណែក​ដល់ភាពជោគជ័យនៃព្រឹត្តិការណ៍នេះ៕