សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានលើកឡើងថា គោលបំណងដ៏ពិសិដ្ឋរបស់ប្រមុខរាជរដ្ឋាភិបាលកម្ពុជាគឺចង់ឱ្យប្រជាពលរដ្ឋគ្រប់រូប គ្រប់គ្រួសារមានលំនៅឋានរស់នៅសមរម្យទាំងអស់គ្នា។
ភ្នំពេញ ៖ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានជួបសំណេះសំណាលជាមួយប្រជាពលរដ្ឋដែលជាអតិថិជនរបស់បុរី ឡេង ណាវ៉ាត្រាគម្រោងផ្លូវជាតិលេខ៦អា កាលពីព្រឹកថ្ងៃទី ១៧ ខែកុម្ភៈ ឆ្នាំ២០២៥ នាទីស្ដីការក្រសួង បន្ទាប់ពីការដោះស្រាយដោយជោគជ័យអស់ជាច្រើនវគ្គកន្លងមក ។
នៅក្នុងកាសនោះដែរ ឯកឧត្តមឧបនាយករដ្ឋមន្ត្រី បានបញ្ជាក់ថា បញ្ហាជាប់គាំងដែលអាចដោះស្រាយបានលុះត្រាតែមានការឯកភាពគ្នា ដូច្នេះអ្នកដែលបានឯកភាពទទួលយកបណ្ណកម្មសិទ្ធិគឺត្រូវទទួលបាននូវវិញ្ញាបនបត្រសម្គាល់ម្ចាស់អចលនវត្ថុនាពេលនេះ ចំណែកឯអ្នកដែលមិនទាន់ទទួលបានវិញ្ញាបនបត្រសម្គាល់ម្ចាស់ចលនវត្ថុ ត្រូវមានស្មារតីសហការចូលរួមជាមួយគ្នា ទាំងខាងបុរី ក្រសួង និងប្រជាពលរដ្ឋដែលជាអតិថិជនរបស់បុរី ដើម្បីដោះស្រាយបញ្ហាជាប់គាំង និងសម្រេចបានលទ្ធផលល្អប្រសើរបន្តទៀត។
ឯកឧត្តមបានបន្ថែមថា ៖
«ចំពោះប្រជាពលរដ្ឋជាអតិថិជនបុរីដែលមិនទាន់បានសាងសង់ផ្ទះនៅក្នុងបុរីឡេងណាវ៉ាត់ត្រា ៦A ហើយចង់រស់នៅក្នុងទីនោះដែរ ខាងក្រសួង នឹងជួយសម្របសម្រួលជូន ទាំងខាងអតិថិជន និងខាងបុរី ដើម្បីធ្វើយ៉ាងណាដោះស្រាយការងារនេះឱ្យដំណើរការទៅមុខ»។
ឯកឧត្តម ឧបនាយករដ្ឋមន្ត្រី បានបញ្ជាក់បន្ថែមថា ៖
«បញ្ហាចម្បងដែលត្រូវរួមគ្នាគិតគូរនោះ គឺដោយសារនេះជាភូមិថ្មីដែលប្រជាពលរដ្ឋជាអតិថិជនបុរីទាំងអស់ត្រូវរៀនរស់នៅជាមួយគ្នា ដោយអ្នកខ្លះជាមន្ត្រីរាជការស៊ីវិល ជាអាជីវករ ឬកងកម្លាំងប្រដាប់អាវុធ ដូច្នេះត្រូវរៀបចំឱ្យមានតំណាងរបស់ខ្លួនដើម្បីងាយស្រួលធ្វើការងារដោះស្រាយបញ្ហាក៏ដូចជាចូលរួមសហការជាមួយបុរី និងអាជ្ញាធរភូមិឃុំ ក្នុងការថែទាំប្រព័ន្ធផ្លូវ លូបង្ហូរទឹកកខ្វក់ សន្តិសុខ អនាម័យ សំរាម អគ្គិសនី ភ្លើងបំភ្លឺសាធារណៈ ថែទាំសោភណភាព ដាំដើមឈើ ជាដើម ដើម្បីធ្វើយ៉ាងណាកសាងទីកន្លែងថ្មីដែលយើងរស់នៅជាមួយគ្នានេះអោយមានសោភ័ណភាព អនាម័យ បរិស្ថាន និងងាយស្រួលរស់នៅបន្ថែមទៀត»។
ឯកឧត្តម សាយ សំអាល់ បានសន្យាថា នឹងជួយសម្របសម្រួលដល់ប្រជាពលរដ្ឋដែលជាអតិថិជនបុរីក្នុងការទៅរកសេវាធនាគារ ឬមីក្រូហិរញ្ញវត្ថុ ដែលត្រឹមត្រូវ និងអាចសម្របសម្រួលលក្ខខណ្ឌនានាក្នុងការខ្ចីប្រាក់បានល្អប្រសើរថែមទៀតផង។
ឯកឧត្តម ក៏បានលើកឡើងនូវបំណងដ៏ពិសិដ្ឋរបស់ប្រមុខរាជរដ្ឋាភិបាលកម្ពុជាទាក់ទិននឹងបញ្ហាលំនៅឋាននេះ ដោយសម្តេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត តែងតែជំរុញដល់ឯកឧត្តមឱ្យខិតខំប្រឹងប្រែងដោះស្រាយសម្របសម្រួលទោះក្នុងកម្រិតណាក៏ដោយ ត្រូវធ្វើយ៉ាងណាឱ្យប្រជាពលរដ្ឋកម្ពុជាគ្រប់រូប គ្រប់គ្រួសារ មានលំនៅឋានរស់នៅសមរម្យ មានការងារធ្វើមានប្រាក់ចំណូល មានម្ហូបអាហារហូបចុកគ្រប់គ្រាន់ រស់នៅប្រកបដោយសេចក្តីសុខសុភមង្គល និងកូនចៅទទួលបានការសិក្សាអប់រំគ្រប់ៗគ្នា ដូច្នេះ ចាប់ពីពេលនេះតទៅមុខទៀតប្រជាពលរដ្ឋជាអតិថិជនបុរី ឡេងណាវ៉ាត់ត្រា ៦A ទាំងអស់ ត្រូវចូលរួមសហការធ្វើយ៉ាងណាឱ្យផ្ទះសម្បែងដែលខ្លួនទទួលបាននាពេលនេះក្លាយជាទ្រនំសុភមង្គល រស់នៅជួបជុំគ្រួសារប្រកបដោយសេចក្តីសុខ ក្លាយជាភូមិឋានក្សេមក្សាន្ត ចេះជួយយកអាសារគ្នាទៅវិញទៅមក ជាគុណតម្លៃដ៏ល្អដែលគួរតែប្រកាន់យកសម្រាប់សង្គមជាតិ ៕
Account
Security
Favourite Content