ខេត្តព្រះសីហនុ ៖ «ទេសចរណ៍ផ្តល់ឱកាសសម្រាប់ទាំងអស់គ្នា» ជាប្រធានបទនៅក្នុងព្រឹត្តិការណ៍តាំងពិព័រណ៍ទេសចរណ៍ និងពាណិជ្ជកម្មឆ្នាំ២០២៤ ដែលធ្វើឡើងនៅក្រុងព្រះសីហនុ ចាប់ពីថ្ងៃទី២៦-៣០ ខែមីនា ឆ្នាំ២០២៤ ដែលមានរហូតដល់ប្រមាណ ២៥០ស្ដង់ បានបង្ហាញពីភាពល្អប្រសើរនៃវិស័យទេសចរណ៍ ជាពិសេសបានជំរុញឱ្យមានការបង្កើតឡើងនូវផលិតផល និងសេវាកម្មទេសចរណ៍ថ្មីៗបន្ថែមទៀត។

ឯកឧត្តម ទិត ចន្ថា រដ្ឋលេខាធិការប្រចាំការ ក្រសួងទេសចរណ៍ បានថ្លែងនាឱកាសបើកព្រឹត្តិការណ៍ពិព័រណ៍ទេសចរណ៍ និងពាណិជ្ជកម្មខាងលើនេះថា តាមរយៈកម្មវិធីមួយនេះពិតជាមានសារៈសំខាន់ក្នុងការផ្សព្វផ្សាយ ជំរុញ និងទាក់ទាញភ្ញៀវទេសចរជាតិ អន្តរជាតិ ការវិនិយោគពីគ្រប់មជ្ឈដ្ឋាន ជាពិសេសទេសចរធុរកិច្ចជន និងវិនិយោគិនមកពីបណ្តាខេត្តជាប់តំបន់ឆ្នេរនៃប្រទេសទាំង ៣ «កម្ពុជា-ថៃ-វៀតណាម» ។

ឯកឧត្តមក៏បានបង្ហាញពីក្ដីសង្ឃឹមថា តាមរយៈនៃការរៀបចំ “ព្រឹត្តិការណ៍ពិព័រណ៍ទេសចរណ៍ និងពាណិជ្ជកម្ម ឆ្នាំ២០២៤” នៅលើទឹកដីខេត្តព្រះសីហនុ នឹងជួយជំរុញការអភិវឌ្ឍទេសចរណ៍ខេត្តតំបន់ឆ្នេរកាន់តែរីកលូតលាស់ ជំរុញកំណើនសេដ្ឋកិច្ចខេត្ត ក៏ដូចជាសេដ្ឋកិច្ចប្រទេសកម្ពុជាទាំងមូល។

ឯកឧត្តម គួច ចំរើន អភិបាលខេត្តព្រះសីហនុ បានមានប្រសាសន៍ថា ព្រឹត្តិការណ៍ពិព័រណ៍ទេសចរណ៍ និងពាណិជ្ជកម្ម ក្រោមប្រធានបទ «ទេសចរណ៍ផ្តល់ឱកាសសម្រាប់ទាំងអស់គ្នា» ក្នុងគោលបំណងចម្បងមួយចំនួនដូចជា : ទី១- បង្កើនការទាក់ទាញភ្ញៀវទេសចរឱ្យមកសម្រាកកម្សាន្តនៅខេត្តព្រះសីហនុបានកាន់តែច្រើន និងស្នាក់នៅយូរថ្ងៃ ដើម្បីចូលរួមជំរុញកំណើនសេដ្ឋកិច្ច និងលើកកម្ពស់ជីវភាពរបស់ប្រជាពលរដ្ឋ។ ទី២- ជំរុញការវិនិយោគ បង្កើតផលិតផល និងសេវាកម្មទេសចរណ៍ថ្មីៗ ។ ទី៣- ជំរុញការផ្សព្វផ្សាយ និងលើកកម្ពស់តម្លៃវប្បធម៌ជាតិខ្មែរ ។ ទី៤- ពង្រឹងកិច្ចសហប្រតិបត្តិការ ជំរុញការវិនិ​យោគផ្នែកទេសចរណ៍ និងពាណិជ្ជកម្មខេត្តតំបន់ឆ្នេរ នៃប្រទេសកម្ពុជា វៀតណាម និងប្រទេសថៃ ឱ្យកាន់តែរីកចម្រើន ។

ឯកឧត្តម អភិបាលខេត្ត ក៏បានថ្លែងអំណរគុណដល់ក្រសួងទេសចរណ៍ ដែលបានសហការរៀបចំឡើងនូវព្រឹត្តិកា​រណ៍ពិព័រណ៍ទេសចរណ៍ និងពាណិជ្ជកម្មកម្ពុជានេះឡើង អមដោយការតាំងពិព័រណ៍ ការប្រគំតន្ត្រី ការសម្តែងសិល្បៈ បង្ហាញពីសកម្មភាពវប្បធម៌ផ្សេងៗ ជាពិសេសកិច្ចប្រជុំស្ដីពីការជំរុញការវិនិយោគ និងទេស​ចរណ៍ តាមបណ្ដាខេត្តជាប់មាត់សមុទ្រ នៃច្រករបៀងសេដ្ឋកិច្ចកម្ពុជា-វៀតណាម-ថៃ (CVTEC) រយៈពេល០៥ថ្ងៃ គឺចាប់ពីថ្ងៃទី២៦ ដល់ថ្ងៃទី៣០ ខែមីនា ឆ្នាំ២០២៤ ។

សូមបញ្ជាក់ថា ការពង្រឹង និងពង្រីកកិច្ចសហប្រតិបត្តិការច្រករបៀងសេដ្ឋកិច្ចកម្ពុជា វៀតណាម ថៃ (CVTEC) ត្រូវបានប្រារព្ធជាលើកដំបូងនៅទីក្រុងបាងកក នៃព្រះរាជាណាចក្រថៃ និងលើកចុងក្រោយនៅខេត្តព្រះសីហនុ ឆ្នាំ២០២៣ ដែលកិច្ចការនេះ ដើម្បីជំរុញកំណើនពាណិជ្ជកម្ម ការដឹកជញ្ជូន និងទេសចរណ៍ក្នុងខេត្តជាប់ឆ្នេរសមុទ្រប្រទេសទាំងបី ដែលមានខេត្តព្រះសីហនុ កោះកុង កំពត និងខេត្តកែប(កម្ពុជា)នៅខេត្តកាម៉ៅ និងគៀង​យ៉ាង របស់វៀតណាម ព្រមទាំងខេត្តឈុនបុរី រ៉ាក់យ៉ង ចន្ទបុរី និងខេត្តត្រាត នៃព្រះរាជាណាចក្រថៃ ។