សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សម្រាប់រយៈពេល២ថ្ងៃនៃចុងប្ដាហ៍កន្លងទៅនេះក្នុងឱកាសបុណ្យឆ្លងឆ្នាំសកល ២០២២-២០២៣ មានទេសចរសរុបប្រមាណ ២លាននាក់បានចេញដើរកម្សាន្តនៅតាមតំបន់ទេសចរណ៍ៗនានានៅទូទាំងប្រទេស រាប់ទាំងតំបន់ឆ្នេរមាត់សមុទ្រ ដូចជាក្រុងព្រះសីហនុ កំពត់ កែប កោះកុង និងទេសចរណ៍ធម្មជាតិស្ថិតនៅខេត្តមណ្ឌលគីរី រតនគីរី ស្ទឹងត្រែង សៀមរាប បាត់ដំបងជាដើម។
តាមរយៈរបាយការណ៍ដែលចេញដោយក្រសួងទេសចរណ៍នៅព្រឹកថ្ងៃទី០២ ខែមករា ឆ្នាំ២០២៣នេះបានបង្ហាញថា កំណើននៃចំនួនទេសចរចេញដើកម្សាន្តនាឱកាសបុណ្យឆ្លងឆ្នាំសកល២០២២-២០២៣ មានសរុបចំនួន ២,០២២,៩២០នាក់ ក្នុងនោះភ្ញៀវជាតិ ២,០០៦,១១៧នាក់ និងភ្ញៀវបរទេស១៦,៨០៣នាក់ កើនឡើងប្រមាណ ៧៦.៦៥% ធៀបនឹងពិធីឆ្លងឆ្នាំសកលឆ្នាំ២០២១-២០២២។
សម្រាប់គោលដៅទេសចរណ៍សំខាន់ៗក្នុងរយៈពេល២ថ្ងៃកន្លងទៅនេះរួមមាន៖
* រាជធានីភ្នំពេញ ៤៥៥,៨៣២នាក់
* ខេត្តព្រះសីហនុ ៣៣៨,៥៥២នាក់
* ខេត្តសៀមរាប ៣៣៧,៧៦៩នាក់
* ខេត្តកំពត ៣៣០,៦៥៩នាក់
* ខេត្តបាត់ដំបង ១៥៨,១១០នាក់
* ខេត្តកែប ៨៨,៣៥៦នាក់
* ខេត្តត្បូងឃ្មុំ ៨៤,៦៨៣នាក់
* ខេត្តកំពង់ចាម ៧៦,៩០១នាក់។
សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅព្រឹកថ្ងៃទី០២ ខែមករា ឆ្នាំ២០២៣ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់សម្ពោធបើកការដ្ឋានសាងសង់ស្ពានឆ្លងទន្លេមេគង្គខេត្តក្រចេះបានមានប្រសាសន៍ថា កត្តាសុខសន្តិភាព គឺពិតជាមានសារសំខាន់ និងភាពចាំបាច់បំផុតសម្រាប់កិច្ចអភិវឌ្ឍន៍ ទាំងផ្នែកហេដ្ឋារចនាសម្ព័ន្ធនៅទូទាំងប្រទេស ទាំងផ្នែកសេដ្ឋកិច្ច។
សម្ដេចតេជោបានបន្តថា ដោយសារតែកត្តាសន្តិភាពទើបធ្វើកម្ពុជាមានអ្វីៗដូចសព្វថ្ងៃ ជាពិសេសប្រជាជនមានលទ្ធភាពគ្រប់គ្រាន់ក្នុងកិច្ចប្រកបមុខរបរការងារផ្សេងៗ និងមានជីវភាពល្អប្រសើរ ហើយមានភាពរីករាយក្នុងការរស់នៅប្រចាំថ្ងៃ។ ជាក់ស្ដែង នៅក្នុងឱកាសនៃពិធីបុណ្យឆ្លងឆ្នាំ២០២២-២០២៣ ប្រជាជនចេញដើរកម្សាន្តនៅតាមតំបន់ទេសចរណ៍នានាទាំងនៅតំបន់ឆ្នេរសមុទ្រ ទាំងនៅតំបន់បណ្តាខេត្តដូចជា មណ្ឌលគីរី រតនៈគីរី កំពត កែប សៀមរាប កោះកុង និងខេត្តមួយចំនួនទៀតសរុបប្រមាណ២លាននាក់ ដោយចំនួននេះនៅមិនទាន់គិតពីចំនួនអ្នកដែលឆ្លងឆ្នាំនៅតាមផ្ទះនៅឡើយ។ ដូច្នេះ មានន័យថា កត្តាសន្តិភាព គឺជាមូលដ្ឋានចាំបាច់បំផុត។
គួរបញ្ជាក់ដែរថា ចំពោះរាជធានីភ្នំពេញមានប្រជាពលរដ្ឋប្រមាណជាង៤៥ម៉ឺននាក់ បានដើរកម្សាន្តនៅគោលដៅសំខាន់ៗ ដូចជានៅតំបន់កោះពេជ្រ មាត់ទន្លេមុខព្រះបរមរាជវាំង តំបន់កម្សាន្តជ្រោយចង្វារ តំបន់វិមានឈ្នះឈ្នះ ពហុកីឡដ្ឋានមេរតកតេជោជាដើម។ គោលដៅទេសចរណ៍នានាទូទាំងប្រទេសសុទ្ធតែទទួលបានចំនួនភ្ញៀវទេសចរយ៉ាងផុសផុល។ បន្ទប់សណ្ឋាគារ ផ្ទះសំណាក់ រីស៊ត និងបឹងហ្កាឡូ ត្រូវបានភ្ញៀវកក់ស្ទើរពេញ១០០%។
ដោយឡែក ប្រជាពលរដ្ឋមួយចំនួនបានជ្រើសរើសយកការជួបជុំនៅតាមគេហដ្ឋាន (ហូបចុក ច្រៀងកម្សាន្តជាលក្ខណៈគ្រួសារ និងមិត្តភក្តិ)។ ខ្លះទៀតបានចេញទៅដើរកម្សាន្ត និងជួបជុំឆ្លងឆ្នាំនៅតាមភោជនីយដ្ឋាន កន្លែងកម្សាន្តមនុស្សពេញវ័យ និង Sky Bar ជាដើម៕
Account
Security
Favourite Content