សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ដោយមានការគាំទ្រពីប្រទេសអូស្ត្រាលី តាមរយៈមជ្ឈមណ្ឌលអូស្ត្រាលី សម្រាប់ការស្រាវជ្រាវកសិកម្មអន្តរជាតិ (ACIAR) ប្រទេសកម្ពុជា ឥណ្ឌូណេស៊ី និងអូស្ត្រាលី បានរួមកម្លាំងគ្នាជំរុញអភិវឌ្ឍកសិដ្ឋានចិញ្ចឹមត្រីទឹកប្រៃប្រកបដោយចីរភាពនៅកម្ពុជា។
យោងតាមការចេញផ្សាយរបស់ស្ថានទូតអូស្រ្តាលី ប្រចាំនៅកម្ពុជា នៅថ្ងៃទី០៦ ខែសីហា ឆ្នាំ២០២៥ បានលើកឡើងថា ជាមួយនឹងការដឹកនំាគម្រោងដោយសកលវិទ្យាល័យ Sunshine Coast ភាពជាដៃគូត្រីភាគីនេះ មានគោលដៅជួយកសាងជំនាញរបស់មន្ត្រីជំនាញនៃរដ្ឋបាលជលផលរបស់ប្រទេសកម្ពុជាលើជំំនាញសំខាន់ៗ ដូចជា បច្ចេកទេសរៀបចំចំណីត្រី និងការគ្រប់គ្រងជំងឺឆ្លង ដើម្បីបង្កើនសមត្ថភាពក្នុងស្រុក និងសន្តិសុខស្បៀង ដែលគំនិតផ្តួចផ្តើមនេះបានបង្កើនការផលិតកូនត្រីស្ពងក្នុងស្រុក ដោយបានជួយកាត់បន្ថយការពឹងផ្អែកលើត្រីនាំចូល។
នេះជាសកម្មភាពពិតនៃការចែករំលែកផ្លាស់ប្តូរចំណេះដឹងជាមួយប្រទេសក្នុងតំបន់ ដែលបានធើ្វឡើងរវាងអ្នកវិទ្យាសាស្ត្រឥណ្ឌូណេស៊ី ដែលទទួលបានការពង្រឹងសមត្ថភាព ពីគម្រោងស្រាវជ្រាវមុនៗរបស់ ACIAR ទៅកាន់អ្នកជំនាញរបស់កម្ពុជា ដើម្បីជំរុញវិស័យវារីវប្បកម្មទឹកប្រៃឱ្យកាន់តែមានភាពធន់។
ឯកឧត្តម ទិត ឌីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងក្នុងទិវាមច្ឆាជាតិ ២០២៥ កន្លងទៅថា ដើម្បីធានាដល់ការផ្តគ់ផ្គង់ក្នុងស្រុក និងកាត់បន្ថយការនាំចូល ក្រសួងកសិកម្មបាននិងកំពុងជំរុញការអភិវឌ្ឍន៍វិស័យវារីវប្បកម្មទាំងទឹកសាប និងសមុទ្រទឹកប្រៃ ដោយក្នុងនោះ ក្រសួងបានបង្កាត់ពូជត្រីច្រើនប្រភេទ ទាំងត្រីទឹកសាប និងត្រីទឹកប្រៃ មានដូចជា ត្រីខ្យា ត្រីគ្រំ ត្រីតុកែ ក្តាមសេះ និងក្តាមថ្ម ជាដើម។
នៅឯតំបន់មាត់សមុទ្រប្រទេសកម្ពុជា ក្រសួងកសិកម្មបានចាត់មន្រ្តីរដ្ឋបាលផល និងន្រ្តីជំនាញ ចុះបង្រៀនដល់ប្រជានេសាទពីវិធីសាស្រ្តបង្កាត់ និងភ្ញាស់ពាក់កណ្តាលសិប្បនិម្មិតស្ថិតនៅក្នុងខេត្តកែប និងកោះកុង តាមរយៈកម្មវិធីបង្កើនផលស្តុកក្តាមសេះនៅតំបន់ឆ្នេរ និងលើកទឹកចិត្តឱ្យប្រជានេសាទ លែងមេក្ដាមសេះមានពង ១៥០០ក្បាល ដើម្បីបង្កើនផលស្តុកក្តាមសេះក្នុងដែនសមុទ្រកម្ពុជា។ ជាមួយគ្នានេះក្រសួងកសិកម្ម ក៏បានដាក់ពង្រាយប្រអប់ជម្រកសិប្បនិម្មិតជាង១ ៣០០ប្រអប់ នៅក្នុងសមុទ្រ ដើម្បីបង្កើនជម្រកសត្វ និងត្រី និងទប់ស្កាត់ការនេសាទក្នុងតំបន់ទីជម្រកសំខាន់ៗ។ លើសពីនេះក្រសួងក៏បានបំពាក់ឧបករណ៍តាមដាន (VMS) លើនាវានេសាទជិត១៥០០គ្រឿង ដើម្បីត្រួតពិនិត្យសកម្មភាពនេសាទក្នុងតំបន់គ្រប់គ្រងជលផលសមុទ្រ។
គួរំលឹកថា នៅឆ្នាំ២០២៤កន្លងទៅ ផលនេសាទសមុទ្រកម្ពុជាសម្រេចបានជិត១៤ម៉ឺនតោន កើនឡើង១១ភាគរយ និងផលនេសាទទឹកសាបទទួលបានជិត ៤៧ម៉ឺនតោន កើនឡើង៩,៥ភាគរយ ធៀបនឹងឆ្នាំ២០២៣។ ចំណែកផលវារីវប្បកម្មសម្រេចបាន ៣២ម៉ឺនតោន កើនឡើង ២% ៕
Account
Security
Favourite Content