សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា មនុស្សរាប់ពាន់នាក់បានចូលរួមពិធីរំលឹកខួបនៃការទម្លាក់គ្រាប់បែកបរមាណូរយៈពេល ៨០ ឆ្នាំនៅទីក្រុងហ៊ីរ៉ូស៊ីម៉ា ប្រទេសជប៉ុន នៅថ្ងៃពុធ សប្ដាហ៍នេះ ខណៈដែលអភិបាលក្រុងបានព្រមានមេដឹកនាំពិភពលោកអំពីការប្រើប្រាស់គ្រាប់នុយក្លេអ៊ែនាសព្វថ្ងៃនេះ។
នៅថ្ងៃពុធ សប្ដាហ៍នេះ អ្នកតំណាងមកពីប្រទេស និងដែនដីចំនួន ១២០ បានចូលរួមក្នុងពិធីរំលឹកខួប ៨០ ឆ្នាំនេះផងដែរ។ អភិបាលក្រុងរបស់ហ៊ីរ៉ូស៊ីម៉ា Kazumi Matsui បានអំពាវនាវឱ្យមេដឹកនាពិភពលោកនានាសិក្សាពីករណីទីក្រុងហ៊ីរ៉ូស៊ីម៉ា និងណាហ្គាសាគីទុកជាមេរៀន ហើយព្រមានអំពីផលវិបាកនៃនិន្នាការពិភពលោកឆ្ពោះទៅរកការកសាងយោធា។
លោក Kazumi Matsui បានលើកឡើងថា ៖
«ក្នុងចំណោមមេដឹកនាំនយោបាយរបស់ពិភពលោក អ្នកខ្លះមានជំនឿកាន់តែខ្លាំងឡើងថា ពួកគេត្រូវមានអាវុធនុយក្លេអ៊ែរដើម្បីការពារប្រទេសរបស់ពួកគេ។ ស្ថានភាពនេះមិនត្រឹមតែធ្វើឱ្យបាត់បង់នូវមេរៀន ឬ បទពិសោធន៍ដែលសហគមន៍អន្តរជាតិបានរៀនពីប្រវត្តិសាស្ត្រសោកនាដកម្មពីអតីតកាលប៉ុណ្ណោះទេ ប៉ុន្តែថែមទាំងធ្វើឱ្យខូចយ៉ាងធ្ងន់ធ្ងរដល់ក្របខ័ណ្ឌដែលត្រូវបានកសាងឡើងសម្រាប់សន្តិភាព។ ចំពោះមេដឹកនាំទាំងអស់ជុំវិញពិភពលោក សូមមកទស្សនាទីក្រុងហ៊ីរ៉ូស៊ីម៉ា នោះនឹងបានឃើញផ្ទាល់ពីឥទ្ធិពលនៃការទម្លាក់គ្រាប់បែកបរមាណូ»។
Yoshikazu Horie ជាអ្នកទេសចរណ៍អាយុ ៧១ ឆ្នាំបានបង្ហាញអារម្មណ៍ស្រដៀងគ្នានេះថា ៖
«វាកាន់តែមានអារម្មណ៍ថា ប្រវត្តិសាស្ត្រកំពុងកើតឡើងដដែលៗ។ រឿងដ៏អាក្រក់កំពុងកើតឡើងនៅអឺរ៉ុប សូម្បីតែនៅក្នុងអាស៊ី វាគួរឱ្យខ្លាចណាស់។ ខ្ញុំមានចៅហើយ ខ្ញុំចង់បានសន្តិភាព ទើបពួកគេអាចរស់នៅបានដោយមានក្តីសុខ»។
គួរឲ្យបញ្ជាក់ដែរថា ជប៉ុន គឺជាប្រទេសតែមួយគត់ដែលបានទទួលរងការវាយប្រហារនុយក្លេអ៊ែរ ហើយការទម្លាក់គ្រាប់បែកបរមាណូរបស់អាម៉េរិក គឺជាលើកទីមួយដែលបានកើតឡើងនៅក្នុងសង្គ្រាម។ នេះគឺជាមេរៀនជូរចត់មួយនៅក្នុងប្រវត្តិសាស្រ្តរបស់ជប៉ុន ហើយជារឿយៗប្រទេសនេះតែងតែបង្ហាញពីការប្តេជ្ញាចិត្តរបស់ខ្លួនចំពោះការរំសាយអាវុធនុយក្លេអ៊ែរ។
កាលពីថ្ងៃទី ៦ ខែសីហាឆ្នាំ ១៩៤៥ អាម៉េរិកបានទម្លាក់គ្រាប់បែកបរមាណូឈ្មោះថា “Little Boy” ទៅលើទីក្រុងហ៊ីរ៉ូស៊ីម៉ាភាគខាងលិចរបស់ប្រទេសជប៉ុន និងបានសម្លាប់មនុស្សប្រហែល ៧៨ ០០០ នាក់ភ្លាមៗ។ គ្រាប់បែកនេះបញ្ចេញកំដៅឡើងដល់ ៤ ០០០ អង្សាសេ និងកម្រិតវិទ្យុសកម្មខ្លាំងដែលបានសម្លាប់មនុស្សរាប់ម៉ឺននាក់បន្ថែមទៀតក្នុងអំឡុងពេលនោះ។ គួរឲ្យបញ្ជាក់ដែរថា ទីក្រុងហ៊ីរ៉ូស៊ីម៉ា គឺជាទីស្នាក់ការកណ្តាលនៃអង្គភាពយោធាមួយចំនួន និងជាមូលដ្ឋានផ្គត់ផ្គង់ដ៏សំខាន់ក្នុងអំឡុងសង្គ្រាមលោកលើកទី២ ។ ក្រោយមក អាម៉េរិកបានទម្លាក់គ្រាប់បែកជាលើកទី២ មកលើជប៉ុន ដែលជាគ្រាប់បែកផ្លាតូនីញ៉ូមមកលើទីក្រុងណាហ្គាសាគី៕
Account
Security
Favourite Content