ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ នាថ្ងៃទី២ ខែមីនា ឆ្នាំ២០២៦ បានរៀបចំកម្មវិធី «វេទិកាកសិកម្មកម្ពុជា» ដែលមានការចូលរួមពីសំណាក់វិស័យឯកជន តំណាងក្រសួង ស្ថាប័នពាក់ព័ន្ធនៃរាជរដ្ឋាភិបាល ក្រុមការងារពាក់ព័ន្ធនៃក្រសួងកសិកម្ម រុក្ខាប្រមាញ់ និងនេសាទ តំណាងក្រុមហ៊ុន សមាគមឯកជន និងអ្នកពាក់ព័ន្ធដើម្បីពិគ្រោះ ពិភាក្សា រួមគ្នាដោះស្រាយបញ្ហា និងត្រៀមវិធានការសម្រាប់ជំរុញ និងគាំទ្រដល់វិស័យកសិកម្មកម្ពុជា ក្រោមអធិបតី ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាសហប្រធានក្រុមការងារ “ក” និង ក្រុមការងារ “ឈ” តំណាងផ្នែករដ្ឋាភិបាល ។

ឧកញ៉ាបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា និងជាអនុសហប្រធានក្រុមការងារ “ក” “ផ្នែកកសិកម្ម និងកសិឧស្សាហកម្ម” ផ្នែកឯកជន បានប្រាប់ AMS Economy នារសៀលថ្ងៃទី៣ ខែមីនា ថា៖ ក្នុងវេទិកានេះ វិស័យឯកជនអាចលើកពីបញ្ហាប្រឈម និងធាតុចូល ដើម្បីជំរុញវិស័យកសិកម្ម ។​ វិស័យឯកជន មានឱកាសបានលើកយកភាពខ្វះចន្លោះនៃការគ្រប់គ្រងក្នុងវិស័យ​កសិកម្ម បញ្ហាប្រឈមរបស់វិស័យឯកជន ជូនទៅឯកឧត្តមរដ្ឋមន្ត្រីក្រសួងកសិកម្មបាន។

អ្នកឧកញ៉ា ហ៊ុន ឡាក់ ប្រធានក្រុមហ៊ុន TROPICAM F & V បានឱ្យ AMS Economy ដឹងថា៖ វេទិកាកសិកម្មនេះ ជាការបើកឱកាសដល់អ្នកពាក់ព័ន្ធទាំងអស់ចូលរួមមតិយោបល់ ក៏ដូចជាសំណើ និងសំណូមពរដល់ឯកឧត្តមរដ្ឋមន្ត្រី ជាពិសេសទៅដល់ស្ថាប័នមានសក្តានុពល និងប្រជាពលរដ្ឋអាស្រ័យលើវិស័យកសិកម្ម។ វេទិកានេះមានសារៈសំខាន់ និងផ្តល់អត្ថប្រយោជន៍ដល់អ្នកពាក់ព័ន្ធ។ ប្រសិនបើការផ្តល់ធាតុចូលសំខាន់ៗអាចជ្រាបទៅដល់ថ្នាក់ដឹកនាំ និងរដ្ឋាភិបាល ហើយទទួលការឆ្លើយតបជាវិជ្ជមាននោះ សង្ឃឹមថាវេទិកាក្រោយៗទៀត នឹងមានការចូលរួមកាន់តែផុលផុស។

សូមជម្រាបជូនថា ក្នុងឆ្នាំ២០២៥ វិស័យកសិកម្មបានចូលរួមចំណែកប្រមាណ ១៦.១% (គិតជាតម្លៃបច្ចុប្បន្ន)​ ក្នុងផលិតផលសរុបក្នុងស្រុកដោយមានការផ្លាស់ប្តូរឆ្នាំគោល ២០០០ មកឆ្នាំ២០១៤ និងគិតជាតម្លៃថេរ វិស័យកសិកម្មបានចូលរួមចំណែកប្រមាណ ១៣.៦% នៃផលិតផលសរុបក្នុងស្រុកនាឆ្នាំ២០២៥។

យ៉ាងណាក៏ដោយ បើទោះបីជាការចូលរួមចំណែករបស់វិស័យកសិកម្មមានការប្រែប្រួលពីមួយឆ្នាំទៅមួយឆ្នាំយ៉ាងនេះក្តី តែតម្លៃបន្ថែមសរុបនៃវិស័យកសិកម្ម (Gross Value Added in Agriculture) មានការកើនឡើងជារៀងរាល់ឆ្នាំពី ២០ ៣៨០ ពាន់លានរៀលនៅឆ្នាំ២០១៦ ដល់ ៣៣ ១៤៩ ពាន់លានរៀលនៅឆ្នាំ២០២៥៕