សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិស័យថាមពលអគ្គិសនីនៅក្នុងប្រទេសកម្ពុជាត្រូវបានវិនិយោគ និងអភិវឌ្ឍន៍ជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ ដែលបានធ្វើឱ្យកម្ពុជាប្រែក្លាយពីប្រទេសពឹងលើការនាំចូលថាមពលទាំងស្រុងមកជាប្រទេសដែលអាចផ្គត់ផ្គង់ខ្លួនឯងបានពេញលេញ ហើយឈានទៅដល់ការលក់ចេញទៅក្រៅប្រទេសទៀតផង ។ យ៉ាងណាក្ដី ការអភិវឌ្ឍវិស័យថាមពលនៅកម្ពុជានៅតែបន្ត ដោយក្នុងរយៈពេល៦ខែដើមឆ្នាំ២០២៥នេះ កម្ពុជាបានអនុម័តគម្រោងក្នុងវិស័យថាមពលចំនួន ៧គម្រោងដែលមានអានុភាពសរុប ៧០០មេហ្គាវ៉ាត់ ក្នុងទំហំទុនសរុបប្រមាណ ១,២ពាន់លានដុល្លារ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) ដែលចេញផ្សាយសម្រាប់ឆមាសទី១ ឆ្នាំ២០២៥ បានឱ្យដឹង គម្រោងវិនិយោគថាមពលដែលក្រុមប្រឹក្សាអភិវឌ្ឍន៍កម្ពុជាបានអនុម័តក្នុងឆមាសទី១ ឆ្នាំនេះ មានគម្រោងវិនិយោគវារីអគ្គិសនីចំនួន១គម្រោង មានអានុភាព១៥០មេហ្គាវ៉ាត់ មានទុនវិនិយោគ៤៤២លានដុល្លារអាម៉េរិក គម្រោងវិនិយោគថាពលអគ្គិសនីដើរដោយពន្លឺព្រះអាទិត្យចំនួន៤គម្រោង មានអានុភាព ៤៥០មេហ្គាវ៉ាត់ និងមានទុនវិនិយោគចំនួន២០៩លានដុល្លារអាម៉េរិក ។
គម្រោងវិនិយោគក្នុងវិស័យថាមពលអគ្គិសនីមួយទៀតដែលក្រុមប្រឹក្សាអភិវឌ្ឍន៍កម្ពុជាអនុម័តជាគម្រោងមិនធ្លាប់មាននៅកម្ពុជា គឺគម្រោងវិនិយោគស្ថានីយ៍ផលិតអគ្គិសនីដើរដោយថាមពលខ្យល់ដែលមានចំនួន២គម្រោង មានអនុភាព៣០០មេហ្គាវ៉ាត់ ស្ថិតនៅខេត្តមណ្ឌលគិរី និងមានទុនវិនិយោគចំនួន ៤៣០លានដុល្លារអាម៉េរិក ។
សូមរម្លឹកថា ទាក់ទងនឹងវិស័យថាមពលអគ្គិសនីនេះដែរ កម្ពុជាមានឯករាជ្យភាពដោយខ្លួនឯងបើទោះបីជាមិនមានការនាំចូលពីប្រទេសជិតខាង ក៏កម្ពុជាអាចមានសមត្ថភាពក្នុងការផ្គត់ផ្គង់ដោយខ្លួនឯងដែរ ជាក់ស្ដែងបន្ទាប់ពីមានបញ្ហាព្រំដែនជាមួយភាគីថៃ ភាគីថៃបានគំរាមផ្ដាច់ការផ្គត់ផ្គង់ភ្លើងមកកម្ពុជា តែកម្ពុជាក៏បានផ្ដាច់ឈប់ទិញភ្លើងពីប្រទេសមុន ។ ភ្លាមៗក្រោយកម្ពុជាប្រកាសឈប់ទិញភ្លើងពីថៃ អាជ្ញាធរអគ្គិសនីកម្ពុជាបានបញ្ជូនភ្លើងទៅកាន់តំបន់ដែលធ្លាប់ប្រើភ្លើងពីក្រៅប្រទេសដើម្បីផ្គត់ផ្គង់ទីនោះ ហើយកម្ពុជានៅតែអាចមានផ្គត់ផ្គង់ដោយខ្លួនឯងបានគ្រប់គ្រាន់ផងដែរ ។
សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជាបានផ្ដល់ជាយោបល់ដល់រាជរដ្ឋាភិបាលកម្ពុជាថា ចាប់ពីពេលនេះទៅថ្ងៃអនាគត មិនគួរទិញភ្លើងអគ្គិសនីពីប្រទេសថៃនោះទេ ពីព្រោះរាល់ដងឱ្យតែមានបញ្ហាពាក់ព័ន្ធនឹងព្រំដែន ថៃតែងតែគំរាមផ្ដាច់ភ្លើង ផ្ដាច់ប្រេងឥន្ធនៈ ដូច្នេះ បើសិនជាកកម្ពុជានៅតែបន្តពឹងលើទំនិញទាំង២នេះ នៅថ្ងៃខាងមុខថៃនឹងគំរាមកម្ពុជាទៀត ។
គួរបញ្ជាក់ថា ទាក់ទិននឹងការវិនិយោគនៅក្នុងប្រទេសកម្ពុជា ក្នុងរយៈពេល៦ខែដើមឆ្នាំ២០២៥នេះ កម្ពុជា បានអនុម័តគម្រោងវិនិយោគសរុបចំនួន ៣៧៣គម្រោង ដែលមានទឹកប្រាក់វិនិយោគសរុបចំនួន៥,៨ពាន់លានដុល្លារអាម៉េរិក បើធៀបនឹងរយៈពេលដូចគ្នាក្នុងឆ្នាំ២០២៤កន្លងទៅ មានការកើនឡើងប្រមាណ ៣៧ភាគរយ ៕
Account
Security
Favourite Content