សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កំពង់ស្ពឺ នៅតែជាខេត្តដែលមានសក្ដានុពល និងទាក់ទាញគម្រោងវិនិយោគបានច្រើនជាងគេក្នុងចំណោមបណ្ដារាជធានី-ខេត្តទាំង២៥ ទូទាំងប្រទេសកម្ពុជា ជាក់ស្ដែងក្នុងរយៈពេល៧ខែ ក្នុងឆ្នាំ ២០២៦នេះ ខេត្តមួយនេះទទួលបានគម្រោងវិនិយោគរហូតដល់ ៧៥គម្រោង និងអាចបង្កើតការងារជូនប្រជាពលរដ្ឋបានរាប់ម៉ឺននាក់ ។
បើតាមរបាយការណ៍របស់គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ក្នុងរយៈពេល៧ខែ ដើមឆ្នាំ២០២៦នេះ គណៈកម្មាធិការវិនិយោគកម្ពុជាបានអនុម័តគម្រោងវិនិយោគសរុបចំនួន ៣០៩គម្រោង ជាមួយនឹងដើមទុនវិនិយោគប្រមាណ ៥,២ពាន់លានដុល្លារអាម៉េរិក ហើយក្នុងនោះសម្រាប់តែខេត្តកំពង់ស្ពឺ ស្រូបទាញគម្រោងវិនិយោគបានចំនួន ៧៥គម្រោងទៅហើយ និងបានក្លាយជាខេត្តជាប់លេខ១ ដែលទទួលបានគម្រោងវិនិយោគច្រើនជាងគេក្នុងពេល៧ខែនេះ ។
បើតាមរបាយការណ៍បានបង្ហាញថា ការវិនិយោគនៅក្នុងខេត្តកំពង់ស្ពឺភាគច្រើនផ្ដោតលើវិស័យឧស្សាហកម្ម និងកសិ-ឧស្សាហកម្ម រួមមានរោងចក្រកាត់ដេរ សម្លៀកបំពាក់ ស្បែកជើង ផលិតផលធ្វើដំណើរ ដោយប្រភពទុនវិនិយោគភាគច្រើនមកពីប្រទេសចិន កូរ៉េខាងត្បូង និងបណ្ដាប្រទេសក្នុងតំបន់អាស៊ី ព្រមទាំងវិនិយោគទុនក្នុងស្រុកផងដែរ ។
គួរបញ្ជាក់ថា ដើម្បីអាចទាក់ទាញវិនិយោគិនទាំងក្នុង និងក្រៅប្រទេសមកបណ្ដាក់ទុននៅក្នុងខេត្តកំពង់ស្ពឺបានកាន់តែច្រើនបន្ថែមទៀត រាជរដ្ឋាភិបាល តាមរយៈក្រសួងរៀបចំដែនដី នគរូបនីយកម្ម និងសំណង់ គ្រោងរៀបចំក្រុងច្បារមន ឱ្យក្លាយជាមជ្ឈមណ្ឌលឧស្សាហកម្ម ពាណិជ្ជកម្ម និងសេវាកម្ម ដោយកែលម្អ បង្កើនសោភ័ណភាព រៀបចំហេដ្ឋារចនាសម្ព័ន្ធក្នុងក្រុងមួយនេះឱ្យកាន់តែទំនើប កាត់បន្ថយការកកស្ទះចរាចរណ៍ក្នុងក្រុង និងរៀបចំសួនច្បារសម្រាប់ពលរដ្ឋលំហែកាយ និងហាត់ប្រាណនាពេលសម្រាកពីការនឿយហត់ប្រកបអាជីវកម្ម ក៏ដូចជាការងារផងដែរ។
អ្នកឧកញ៉ា សំ សុខនឿន ប្រធានក្រុមប្រឹក្សាភិបាលសម្ព័ន្ធក្រុមហ៊ុន SAM SN Group បានមានប្រសាសន៍ថា កំពង់ស្ពឺ ជាខេត្តដែលទាក់ទាញមួយសម្រាប់ការវិនិយោគនានា ព្រោះខេត្តនេះ ស្ថិតនៅមិនឆ្ងាយពីរាជធានីភ្នំពេញ មានផ្លូវល្បឿនលឿនឆ្លងកាត់ និងមានផ្លូវជាតិសំខាន់ៗជាច្រើនតភ្ជាប់ខេត្តមួយនេះ ដូចជា ផ្លូវជាតិលេខ៣ ផ្លូវជាតិលេខ៤១ ផ្លូវជាតិលេខ៥១ និងផ្លូវជាតិលេខ៤ ភ្ជាប់ទៅកំពង់ផែ ខេត្តកោះកុង និងកំពង់ផែទឹកជ្រៅខេត្តព្រះសីហនុជាដើម ។
អ្នកឧកញ៉ាបន្តថា ៖
«តម្លៃដីធ្លីនៅក្នុងខេត្តកំពង់ស្ពឺ ក៏ឃើញថានៅមានភាពល្អប្រសើរមិនថ្លៃពេក និងមិនទាបពេក ដែលសមល្មមសម្រាប់វិនិយោគិនមានបំណងស្វែងរកទីតាំងសម្រាប់ការវិនិយោគ សាងសង់រោងចក្រ ឃ្លាំងស្តុកទំនិញ ក៏ដូចជាការវិនិយោគលើវិស័យកសិកម្ម»។
អ្នកឧកញ៉ាបានបន្ថែមថា ក្នុងមួយរយៈពេលចុងក្រោយនេះ ខេត្តកំពង់ស្ពឺនៅតែបន្តទាក់ទាញលើគម្រោងវិនិយោគជាច្រើនទៀត ដូចជា តំបន់សេដ្ឋកិច្ចពិសេសលើទំហំផ្ទៃដីជាង៥០០ហិកតារបស់ក្រុមហ៊ុន OCIC និងគម្រោងរោងចក្រផលិតសម្ភារៈអេឡិចនិត្រូនិកសម្រាប់នាំចេញមួយចំនួនទៀត ។
លោក ឌឹត ចណ្ណា អគ្គនាយកក្រុមហ៊ុនអចលនទ្រព្យ ឡាក់គី បានលើកឡើងថា ការវិនិយោគលើវិស័យឧស្សាហកម្ម បានជំរុញឱ្មានយតម្រូវការអចលនទ្រព្យ ដូចជាដីធ្លី សម្រាប់សង់ឃ្លាំង រោងចក្រ ជាដើម ។ យ៉ាងណាក៏ដោយ តម្រូវការដីធ្លីសម្រាប់បម្រើក្នុងវិស័យឧស្សាហកម្ម ផ្ដោតលើតំបន់ដែលនៅជាយក្រុង ឬតំបន់ដែលតម្លៃដីនៅទាបក្នុងរង្វង់ប្រមាណ ១០ដុល្លារក្នុងមួយម៉ែត្រការ៉េប៉ុណ្ណោះ ៕
Account
Security
Favourite Content