សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ភ្ជុំបិណ្ឌ ជាពិធីបុណ្យដែលមានរយៈពេលវែងជាងគេដោយរាប់ចាប់ពីថ្ងៃ ១រោច ដល់ថ្ងៃ ១៤រោច ខែភទ្របទ ជាពិធីដាក់បិណ្ឌ និងថ្ងៃទី១៥រោច ជាថ្ងៃភ្ជុំបិណ្ឌ ដោយនៅក្នុងឱកាសនេះ ប្រជាជនខ្មែរ ដែលជាពុទ្ធបរិស័ទ ឬអ្នកកាន់សាសនាព្រះពុទ្ធ តែងមានទម្លាប់ធ្វើម្ហូប បាយ សម្លរ នំ ចំណី ទៅប្រគេនព្រះសង្ឃ យ៉ាងសន្ធឹកសន្ធាប់។ នៅក្នុងរយៈពេលនេះដែរ តម្រូវការនៃការប្រើប្រាស់សម្ភារៈប្រើប្រាស់ ក៏ដូចជាបន្លែ ត្រី សាច់ ក៏កើតមានផងដែរ ដែលអាជីវករ ក៏ដូចជាកសិករទាំងឡាយ គប្បីត្រៀមខ្លួនឱ្យបានរួចរាល់ក្នុងការផ្គត់ផ្គង់ឱ្យគ្រប់តាមតម្រូវការរបស់អតិថិជន។
ពាក់ព័ន្ធនឹងករណីនេះ ឯកឧត្តម បណ្ឌិត សួង ណយ អនុប្រធានគណៈកម្មាធិការជាតិជំរុញចលនាភូមិមួយផលិតផលមួយនៃទីស្ដីការគណៈរដ្ឋមន្ដ្រីបានលើកឡើងថា ជាទម្លាប់ហើយដែលរាល់ពេលរដូវភ្ជុំបិណ្ឌ ប្រជាជនខ្មែរនិយមគាំទ្រផលិតផលខ្មែរ ដូចជា បន្លែ ផ្លែឈើ ត្រីសាច់ ដើម្បីចម្អិនម្ហូបអាហារជូនចាស់ៗផង និងរៀបចំចង្ហាន់សម្រាប់ប្រគេនព្រះសង្ឃនៅតាមវត្តអារាមផង។ ក្រៅពីម្ហូបអាហារ គេក៏មានប្រគេនជាទេយ្យទាន ដែលជាគ្រឿងភេសជ្ជៈ និងអាហារក្រៀមផ្សេងៗផងដែរ។
ក្នុងនាមជាអ្នកជំនាញដែលធ្វើការជាមួយអាជីវករលក់ផលិតផលខ្មែរ ឯកឧត្តមបណ្ឌិតបានគូសបញ្ជាក់ថា៖
«ចំពោះម្ចាស់អាជីវកម្មក៏ដូចជាអ្នកផលិត ត្រូវប្រមូលត្រៀមទុកនូវផលិតផល កសិផលខ្លួនឯងទៅតាមតម្រូវការ ចាប់តាំងពីបិណ្ឌទី១ ដល់ភ្ជុំបិណ្ឌ ពោល គឺរយៈពេល ១៥ថ្ងៃតែម្ដង ជាពិសេសអ្នកដែលមានវត្ថុធាតុដើមដែលអាចច្នៃជាផលិតផលសម្រេច និងអាចយកទៅប្រគេណព្រះសង្ឃបាន គួរតែរៀបចំឱ្យបានល្អ»។
ឆ្លើយតបនឹងតម្រូវការជាក់ស្ដែងរបស់អតិថិជនក្នុងឱកាសពិធីបុណ្យភ្ជុំបិណ្ឌ អ្នកស្រី ធឿន ស្រីនី ជាម្ចាស់សិប្បកម្មកែច្នៃត្រី ធឿន ស្រីនី បានត្រៀមរួចជាស្រេចនូវផលិតផលរបស់ខ្លួន ដោយរំពឹងថានឹងទទួលបានការគាំទ្រពីប្រជាពលរដ្ឋក្នុងស្រុកច្រើន។
អ្នកស្រីបានបន្តឱ្យដឹងយ៉ាងដូច្នេះថា៖
«សម្រាប់ឱកាសបុណ្យភ្ជុំបិណ្ឌនេះ យើងបានត្រៀមទុកផលិតផលដូចជាត្រីងៀត ប្រភេទត្រីរ៉ស់ និងត្រីឆ្ដោរ ប្រមាណ ២០ភាគរយលើសធម្មតា ដើម្បីទុកលក់កំឡុងពេលភ្ជុំបិណ្ឌ ជាពិសេសចាប់ពីបិណ្ឌ១៣ ដែលមានបងប្អូនយើងចាប់ផ្ដើមឈប់សម្រាកពីការងារ និងត្រឡប់មកលេងស្រុកដែលអាចទិញយកទៅទុកទទួលទានក្នុងគ្រួសារផង និងចម្អិនជាចង្ហាន់សម្រាប់ប្រគេនព្រះសង្ឃផងដែរ»។
ឈរជើងនៅលើទីផ្សារបានប្រមាណជា ១០ឆ្នាំមកនេះ សិប្បកម្មកែច្នៃត្រីងៀត ប្រហុក ផ្អក ធឿន ស្រីនី បានកសាងកេរ្តិ៍ឈ្មោះ តាមរយៈការរក្សាបាននូវរសជាតិ ជាពិសេសគឺសម្រេចបាននូវស្តង់ដារសម្រាប់នាំចូលទៅលក់ក្នុងបណ្ដាផ្សារទំនើបនៅទីក្រុងភ្នំពេញ។ ដោប្រើបច្ចេកវិទ្យាផ្ទះសម្ងួតសម្រាប់សម្ងួតត្រីកែច្នៃរបស់ខ្លួនប្រកបទៅដោយគុណភាពខ្ពស់ និងអនាម័យផងនោះ អ្នកស្រី ធឿន ស្រីនី មានជំនឿជឿជាក់ថា ខ្លួនអាចផ្គត់ផ្គង់ទាន់តាមតម្រូវការកម្មង់ទិញរបស់អតិថិជននៅក្នុងអំឡុងពេលនៃពិធីបុណ្យកាន់បិណ្ឌ និងភ្ជុំបិណ្ឌខាងមុខនេះ។
ចុងក្រោយ អ្នកស្រី ស្រីនី ក៏សូមថ្លែងអំណរគុណដល់អតិថិជនដែលតែងតែគាំទ្រផលិតផលរបស់អ្នកស្រី និងផលិតផលកែច្នៃក្នុងស្រុកផ្សេងទៀត ដែលជាសកម្មភាពមួយចូលរួមជួយដល់សេដ្ឋកិច្ចក្នុងស្រុក និងលើកកម្ពស់ជីវភាពក្រុមអ្នកផលិត និងអ្នកពាក់ព័ន្ធក្នុងខ្សែចង្វាក់ផលិតកម្មជាច្រើននាក់ផ្សេងទៀត៕
Account
Security
Favourite Content