សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបគណៈប្រតិភូធនាគារពិភពលោក ដឹកនាំដោយលោកស្រី Maria Angelica Sotomayor ប្រធានផ្នែកអនុវត្តវិស័យទឹកស្អាតសម្រាប់តំបន់អាស៊ីបូព៌ា និងប៉ាស៊ីហ្វិក ព្រមទាំងបានពិភាក្សាអំពីគម្រោងទឹកស្អាតដែលកំពុងអនុវត្ត និងការពង្រីកការគាំទ្របន្ថែមទៀតសម្រាប់វិស័យទឹកស្អាតនៅកម្ពុជា។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានកោតសរសើរដល់ធនាគារពិភពលោក ដែលបន្តគាំទ្រកម្ពុជា ទាំងផ្នែកហិរញ្ញប្បទាន និងផ្តល់ជំនួយបច្ចេកទេសលើក្របខ័ណ្ឌច្បាប់ និងគោលនយោបាយ ជាពិសេស លើដំណោះស្រាយចំពោះការប្រែប្រួលអាកាសធាតុសម្រាប់និរន្តរភាព និងភាពចាំបាច់ក្នុងការកែលម្អនិយតកម្ម និងហេដ្ឋារចនាសម្ព័ន្ធវិស័យទឹកស្អាត។
ឯកឧត្តមរដ្ឋមន្ត្រីបានស្វាគមន៍ចំពោះគំនិតផ្តួចផ្តើមនេះ និងបានស្នើឱ្យធនាគារពិភពលោក ពិចារណាកែសម្រួលលក្ខខណ្ឌលទ្ធកម្មមួយចំនួន ដើម្បីគាំទ្រឱ្យឧស្សាហកម្មក្នុងស្រុកអាចចូលរួមផ្គត់ផ្គង់សម្រាប់ការអភិវឌ្ឍវិស័យទឹកស្អាត។
ឯកឧត្តមបានលើកឡើងថា៖
«យើងត្រូវបន្តគាំទ្រឧស្សាហកម្មក្នុងស្រុក រួមទាំងឧស្សាហកម្មផលិតទុយោ ម៉ាស៊ីបូមទឹក និងឧបករណ៍ផ្សេងៗទៀត។ បច្ចុប្បន្ន រោងចក្រក្នុងស្រុករបស់យើងមួយចំនួនមានស្តង់ដាអន្តរជាតិ ហើយពួកគេអាចរួមចំណែកសំខាន់ក្នុងវិស័យនេះ»។
លោកស្រី Sotomayor ប្រធានផ្នែកអនុវត្តវិស័យទឹកស្អាតសម្រាប់តំបន់អាស៊ីបូព៌ា និងប៉ាស៊ីហ្វិក បានបង្ហាញការប្តេជ្ញាយ៉ាងមុតមាំរបស់ធនាគារពិភពលោកចំពោះវិស័យទឹកស្អាតនៅកម្ពុជា ដោយសន្យាផ្តល់ជំនួយបច្ចេកទេសបន្ថែម និងចែករំលែកបទពិសោធ និងឧត្តមានុវត្តន៍សាកលរបស់ខ្លួនជាមួយកម្ពុជាទាក់ទងនឹងការរៀបចំក្របខ័ណ្ឌនិយតកមុ្មវិស័យប្រកបដោយប្រសិទ្ធភាព។
លោកស្រីក៏បានជម្រាបជូនផងដែរថា ធនាគារទើបបានអនុម័តអភិក្រមកម្មវិធីពហុដំណាក់កាលថ្មីសម្រាប់រយៈពេល១០ឆ្នាំ ហើយស្វាគមន៍ការចូលរួមរបស់កម្ពុជាក្នុងកម្មវិធីថ្នាក់តំបន់នេះ ដោយផ្តោតលើការគាំទ្រការអភិវឌ្ឍវិស័យទឹកស្អាតរយៈពេលវែង។ សូមបញ្ជាក់ដែរថា គណៈប្រតិភូធនាគារពិភពលោក ដែលដឹកនាំដោយលោកស្រី Maria Angelica Sotomayor កំពុងបំពេញបេសកកម្មការងារនៅកម្ពុជាក្នុងសប្តាហ៍នេះ ហើយនឹងចុះទស្សនកិច្ចរោងចក្រផលិតទឹកស្អាតរបស់រដ្ឋាករទឹកស្ទោង-តាំងក្រសាំង ដែលផ្តល់ហិរញ្ញប្បទានដោយធនាគារពិភពលោក៕
Account
Security
Favourite Content