ភ្នំពេញ ៖ សហព័ន្ធស្រូវអង្ករកម្ពុជា បានបង្ហាញ​របាយការណ៍របស់ខ្លួនដោយបញ្ជាក់ថា ក្នុងរយៈពេល ៨ខែ ឆ្នាំ២០២៣ កម្ពុជាបាននាំចេញអង្ករចំនួន ៤០១ ៦៩៩ តោន ដែលបង្កើតប្រាក់ចំណូលបានជាង២៧៨ លានដុល្លារអាមេរិក។ ជាមួយគ្នានេះ ប្រទេសកម្ពុជាក៏បាននាំចេញស្រូវចំនួន ២ ៩២៩ ០៤៣ តោនដែលគិតជាទឹកប្រាក់បានប្រមាណជា ៨១៤.១៧ លានដុល្លារ ដែលក្នុងនោះជាង ៥៩% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច។

យោងតាមរបាយការណ៍នេះ អង្ករកម្ពុជាត្រូវបានដឹកជញ្ជូនដោយក្រុមហ៊ុននាំចេញអង្ករចំនួន ៥៥ ក្រុមហ៊ុន ទៅកាន់គោលដៅចំនួន ៥៦ប្រទេស ទាំងក្នុងតំបន់ និងលើពិភពលោក ដែលការនាំចេញគិតចាប់់់់ពីខែមករាដល់ខែសីហា មានចំនួន ៥៨ ភាគរយនៃបរិមាណនាំចេញដែលបានគ្រោងទុក ៧០០ ០០០ តោននៅឆ្នាំ២០២៣នេះ។

ប្រទេសចិន និងហុងកុង បាននាំចូលអង្ករពីកម្ពុជាច្រើនជាងគេមានចំនួន ១៤៣ ៨១៨ តោន គិតជាទឹកប្រាក់​បានចំនួន ៩១.៦៤ លានដុល្លារ ខណៈនាំចេញទៅកាន់ប្រទេសនៅទ្វីបអឺរ៉ុបចំនួន ២៦ប្រទេស បានចំនួន ១៦៤ ៦៨២ តោន គិតជាទឹកប្រាក់បានចំនួន ១១៣.៧៣ លានដុល្លារ, នាំចេញទៅកាន់ប្រទេសសមាជិកអាស៊ានចំនួន ៥ ប្រទេស បានបរិមាណចំនួន ៣៦ ៦៩២ តោន គិតជាទឹកប្រាក់ចំនួន ២៣.៦៤ លានដុល្លារ និងទៅកាន់គោលដៅផ្សេងទៀតនៅអាហ្វ្រិក មជ្ឈឹមបូព៌ា ចំនួន ២២ ប្រទេសបានចំនួន ៥៦ ៥០៧ តោន ដែលគិតជាទឹកប្រាក់បានចំនួន ៤៩.៥៨ លានដុល្លារ។

អង្ករដែលបាននាំចេញរួមមាន អង្ករក្រអូប អង្ករសគ្រាប់វែង អង្ករសម្រូប និងអង្ករសរីរាង្គ។ ចំពោះប្រភេទអង្ករក្រអូបគ្រប់ប្រភេទចំនួន ៨១.៩៣% អង្ករស ចំនួនជិត ១២.៩៩% អង្ករចំហ៊ុយ ៣.៣៣ % អង្ករសរីរាង្គចំនួន ១.៧៣% និងអង្ករសគ្រាប់ខ្លីចំនួន ០.០២% ។ សហព័ន្ធស្រូវអង្ករកម្ពុជា ក៏បានកំណត់គោលដៅប្រកបដោយមហិច្ឆិតាក្នុងការនាំចេញអង្ករឱ្យបានយ៉ាងហោចណាស់មួយលានតោននៅឆ្នាំ២០២៥។

សូមបញ្ជាក់ថា នៅឆ្នាំ២០២២ កម្ពុជាបាននាំចេញអង្ករជាង ៦៣ម៉ឺនតោន ទៅកាន់ប្រទេសចំនួន៥៩ ដែលរកចំណូលបាន ៤១៤លានដុល្លារ ខណៈចំណូលពីការនាំចេញស្រូវមានប្រមាណ ៨៤១លានដុល្លារអាមេរិក។

ថ្មីៗនេះសហព័ន្ធស្រូវអង្ករកម្ពុជា ក៏បានចេញសេចក្តីប្រកាសព័ត៌មានមួយដោយអំពាវនាវដល់កសិករយោគយល់លើការប្រែប្រួលតម្លៃស្រូវ ខណៈតម្លៃអង្ករនៅលើទីផ្សារអន្តរជាតិ ក៏មានស្ថានភាព វិលមករកភាពប្រក្រតីវិញហើយ ដែលធ្វើឱ្យតម្លៃស្រូវនៅកម្ពុជា​មានការធ្លាក់ចុះបន្តិចវិញ ប៉ុន្តែនៅតែស្ថិតក្នុងតម្លៃមួយ ដែលកសិករទទួលបានផលចំណេញ ​។

សហព័ន្ធស្រូវអង្ករកម្ពុជា ​បានលើកឡើងថា បើប្រៀបធៀបនឹងឆ្នាំ២០២២ មានការប្រែប្រួលប្រមាណ ៤០% គឺពីមុនតម្លៃមធ្យម ៩០០ រៀលក្នុងមួយគីឡូក្រាម ឡើងទៅដល់ ១ ៣០០ រៀលក្នុងមួយគីឡូក្រាមនៅវាលស្រែ និងតម្លៃ ១៥០០រៀលក្នុងមួយគីឡូក្រាមនៅព្រំដែនប្រទេសវៀតណាម។

ការឡើងថ្លៃស្រូវនេះ គឺដោយសារការផ្អាកនាំអង្ករសចេញរបស់ប្រទេសឥណ្ឌា និងប្រទេសភូមាជាដើម ដើម្បីសិក្សាឱ្យច្បាស់ពីផលប៉ះពាល់បណ្តាលមកពីឥទ្ធិពលនៃកម្តៅ រាំងស្ងួត អ៊ែលនីនូ (El nino) លើផលិតកម្មស្រូវ និងសន្តិសុខស្បៀងរបស់ប្រទេសខ្លួន។ ប្រទេសដែលពឹងផ្អែកលើការនាំចូលអង្ករ ភ័យខ្លាចពីឥទ្ធិពល អ៊ែលនីនូ (El nino) នេះ ក៏សម្រុកទិញស្រូវអង្ករធ្វើឱ្យតម្លៃស្រូវ និងអង្ករ លើទីផ្សារតំបន់អាស៊ីកើនឡើង ពោលគឺកើនពីតម្លៃជាង ៥០០ដុល្លារ ទៅជាង ៧០០ដុល្លារក្នុងមួយតោន ស្របពេលដែលកម្ពុជាចាប់ផ្តើមប្រមូលផលស្រូវស្រាលដើមរដូវវស្សាមុនប្រទេសក្បែរ​ខាងកម្ពុជាផងដែរ។

សហព័ន្ធស្រូវអង្ករកម្ពុជាបន្ថែមថា នៅក្នុងស្ថានភាពនាពេលបច្ចុប្បន្ននេះ តម្លៃស្រូវសើមនៅវាលស្រែ មានការធ្លាក់ចុះបន្តិចមកត្រឹមចន្លោះ ១ ០៩០ ដល់ ១ ២៥០ រៀលក្នុងគីឡូក្រាមទៅតាមប្រភេទស្រូវ ដែលតម្លៃនេះកសិ​ករនៅមានផលចំណេញបង្គួរ ពីផលិតកម្មដំណាំស្រូវនៅឡើយ។ សហព័ន្ធស្រូវអង្ករកម្ពុជា តាមរយៈសមាជិកទាំងអស់ ដែលជារោងម៉ាស៊ីនកិនស្រូវ បាននឹងកំពុងខិតខំប្រមូលទិញស្រូវពីបងប្អូនប្រជាកសិករ ដើម្បីកុំឱ្យមានជនឆ្លៀតឱកាសនិយម ធ្វើវិទ្ធង្សនាលើតម្លៃដែលធ្វើឱ្យបងប្អូនកសិករយល់ច្រឡំ និងខូចប្រយោជន៍យូរអង្វែងរបស់ខ្លួន៕