សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជាការពិតណាស់ ដើម្បីអាចទាញយកប្រយោជន៍ចេញពីបរិវត្តកម្មសេដ្ឋកិច្ច និងសង្គមឌីជីថលបាន ប្រទេសមួយត្រូវមានធនធានដែលមានចំណេះដឹង និងជំនាញឌីជីថល។ ប៉ុន្តែ សម្រាប់កម្ពុជា ដែលជាប្រទេសមួយក្នុងតំបន់នាពេលបច្ចុប្បន្ននេះ ចំណេះដឹងរបស់ប្រជាជនទៅលើជំនាញឌីជីថលនេះភាគច្រើននៅមានកម្រិតនៅឡើយ។
បើតាមទិន្នន័យពីគោលនយោបាយសេដ្ឋកិច្ច និងសង្គមឌីជីថលកម្ពុជា ឆ្នាំ២០២១ – ២០២៣៥ បានឱ្យដឹងថា បច្ចុប្បន្នកម្ពុជាមានធនធានមនុស្សដែលជាអ្នកមានទេពកោសល្យឌីជីថលប្រមាណ ៥០ ០០០ នាក់ ខណៈដែលកម្លាំងពលកម្មនៅក្នុងវិស័យ ICT ភាគច្រើនផ្សេងទៀតមានជំនាញកម្រិតមធ្យម ហើយមិនទាន់មានលក្ខណៈប្រមូលផ្តុំ និងមិនស៊ីជម្រៅតាមឯកទេសនៅឡើយ ។
តាមរយៈទិន្នន័យនេះ កម្ពុជាត្រូវមានភារកិច្ចពង្រឹងធនធានមនុស្សរបស់ខ្លួនបន្តទៀត ដើម្បីជាការធានាថា ប្រជាជនកម្ពុជាមិនត្រូវបានគេបំភ្លេចចោលនៅក្នុងសម័យកាលឌីជីថល។
ជាក់ស្ដែង ក្នុងការបង្កើតនូវធនធានមនុស្សឌីជីថល ក៏ដូចជាជំរុញនូវការប្រើប្រាស់ឌីជីថលក្នុងចំណោ មពលរដ្ឋកម្ពុជា រដ្ឋាភិបាលបានផ្ដោតការយកចិត្តទុកដាក់លើការទាក់ទាញធនធានមនុស្សមានទេពកោសល្យឌីជីថល ដែលធនធានប្រភេទនេះ គឺជាតួអង្គដ៏សំខាន់នៅក្នុងបរិការណ៍នៃបរិវត្តកម្មឌីជីថល ដែលចូលរួមធានាបាននូវការបង្កើតថ្មី និងនវានុវត្តន៍ រាប់ទាំងការបង្កើតធុរកិច្ចថ្មីៗ ការដោះស្រាយបញ្ហាបានឆាប់រហ័សក្នុងប្រព័ន្ធ ICT និងកិច្ចការពារសុវត្ថិភាពនៃប្រព័ន្ធទាំងមូល។
ទោះជាយ៉ាងណា បច្ចុប្បន្ននេះអត្រានិស្សិតចុះឈ្មោះចូលរៀនលើជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ក្នុងកម្រិតឧត្តមសិក្សាមានប្រមាណត្រឹម ២៧,១% តែប៉ុណ្ណោះ ខណៈដែលប្រមាណ ០,០៣% ផ្សេងទៀតបានចុះឈ្មោះចូលរៀនក្នុងកម្មវិធីអប់រំបណ្តុះបណ្តាលបច្ចេកទេស និងវិជ្ជាជីវៈ។
ការណ៍នេះបានបង្ហាញឱ្យឃើញថា ធនធានមនុស្សដែលមានជំនាញឌីជីថលនៅកម្ពុជា នៅមិនទាន់អាចឆ្លើយតបទៅនឹងតម្រូវការជំនាញជាក់ស្ដែងនៅក្នុងទីផ្សារ ជាពិសេសជំនាញដែលជាមូលដ្ឋាន ក្នុងការអភិវឌ្ឍការកសាងសេដ្ឋកិច្ច និងសង្គមឌីជីថល។
បើទោះជាយ៉ាងនេះក្ដី កម្ពុជាក៏កំពុងតែខិតខំប្រឹងប្រែងក្នុងកសាងធនធានឌីជីថលដោយក្នុងរយៈពេលប៉ុន្មានឆ្នាំចុងក្រោយនេះ មានការបង្កើតឡើងនូវមូលនិធិអភិវឌ្ឍន៍ជំនាញ មូលនិធិអភិវឌ្ឍន៍សហគ្រិនភាព មជ្ឈមណ្ឌលបណ្ដុះធុរកិច្ចថ្មីតេជោ និងមជ្ឈមណ្ឌល ICT ជាដើម ។ បន្ថែមពីលើនេះ វិស័យឯកជន បាន និងកំពុងចូលរួមក្នុងកិច្ចការអភិវឌ្ឍន៍ធនធានមនុស្សឌីជីថលផងដែរ។ ជាក់ស្ដែង នាពេលកន្លងមកក្រុមហ៊ុនទូរគមនាគមន៍នានា បានសហការជាមួយនឹងរាជរដ្ឋាភិបាលក្នុងការបង្កើតមូលនិធិកសាងសមត្ថភាពស្រាវជ្រាវ និងអភិវឌ្ឍន៍លើវិស័យទូរគមនាគមន៍ និង ICT ។
មូលនិធិនេះបានរួមចំណែកយ៉ាងច្រើនក្នុងការកសាងសមត្ថភាព និងជំនាញឌីជីថលសម្រាប់យុវជន តាមរយៈកម្មវិធីផ្ដល់អាហារូបករណ៍សិក្សាផ្នែកបច្ចេកវិទ្យាព័ត៌មាន ការបំពាក់បរិក្ខារ បច្ចេកវិទ្យានៅតាមសាលារៀន ព្រឹត្តិការណ៍ផ្សព្វផ្សាយ និងប្រកួតប្រជែងលើផ្នែកបច្ចេកវិទ្យាជាដើម។ ទោះជាយ៉ាងនេះ ការកសាងធនធានមនុស្សជាកិច្ចការរយៈពេលវែងដែលត្រូវការ ទាំងការបណ្តុះបណ្តាល ការប្រែក្លាយប្រជាពលរដ្ឋកម្ពុជាឱ្យទៅជាពលរដ្ឋឌីជីថល។
ក្នុងការចាប់យកបច្ចេកវិទ្យាឌីជីថល មកប្រើប្រាស់សម្រាប់ជីវិតរស់នៅប្រចាំថ្ងៃប្រកបដោយ ប្រសិទ្ធភាព និងការទទួលខុសត្រូវខ្ពស់ទៀតសោត ប្រជាពលរដ្ឋគ្រប់រូបត្រូវមានចំណេះដឹង និងជំនាញទន់ចាំបាច់ដើម្បីជំរុញឱ្យការធ្វើអន្តរកម្មនៅក្នុងប្រព័ន្ធអេកូឡូស៊ីនៃសេដ្ឋកិច្ច និងសង្គមឌីជីថលកាន់តែមានសក្តិសិទ្ធិភាព។
បើតាមទិន្នន័យចេញពីគោលនយោបាយដដែលនេះ បច្ចុប្បន្នអត្រាអក្ខរកម្មមូលដ្ឋាននៃប្រជាជនកម្ពុជាដែលមានអាយុច្រើនជាង ១៥ឆ្នាំ មានប្រមាណ ៨០,៥% ដែលអត្រានេះបានវាស់វែងនូវសមត្ថភាពក្នុងការអាន ការសរសេរ និងការគណនាលេខនព្វន្តសាមញ្ញ ដែលនេះជាមូលដ្ឋានក្នុងការអភិវឌ្ឍពលរដ្ឋឌីជីថល ។
ប្រជាពលរដ្ឋកម្ពុជាប្រមាណតែ ៣០% ប៉ុណ្ណោះមានជំនាញឌីជីថលកម្រិតមូលដ្ឋាន ដែលជាសមត្ថភាពអាចប្រើប្រាស់ប្រព័ន្ធឌីជីថល សម្រាប់ការស្វែងរកនៅលើបណ្តាញអ៊ីនធឺណិត ការភ្ជាប់ទំនាក់ទំនង និងការចែករំលែកព័ត៌មានជាដើម៕
Account
Security
Favourite Content