ភ្នំពេញ ៖ ឯកឧត្តមកិត្តិទេសាភិបា​លប​ណ្ឌិត​ ហ៊ុន ម៉ាណែត បានទទួលជួបជាមួយ ឯកឧត្តម ឆុង វ៉ាងគឺន (Chung Hwang-Keun) រដ្ឋមន្ត្រី​ក​សិ​ក​ម្ម​ ស្បៀង និងកិច្ចការជនបទនៃសាធារណរដ្ឋកូរ៉េ  កាលពីថ្ងៃទី២៨ ខែសីហា ឆ្នាំ២០២៣ ដោយទស្សនកិច្ចនេះបង្ហាញអំពីកិច្ចសហប្រតិបត្តិការជិតស្និទ្ធរវាងប្រទេសទាំងពីរនៅក្នុងវិស័យកសិ​កម្ម និងវិស័យផ្សេងៗទៀត ខណៈដែលនាយករដ្ឋមន្រ្តីកម្ពុជា បានស្នើភាគីកូរ៉េជួយជំរុញការវិនិយោគមកកម្ពុជា ជាពិ​សេ​ស​នៅក្នុងវិស័យ​កសិ​កម្មសម្រាប់បម្រើឱ្យការនាំចេញ។

ឯកឧត្តមកិតិ្តទេសាភិបាលបណ្ឌិត ហ៊ុន ម៉ាណែត បានស្វាគមន៍នូវដំណើរទស្សនកិច្ចរបស់ឯកឧត្តម ឆុង វ៉ាងគឺន  និងបានសម្តែងនូវអំណរគុណចំពោះឯកឧត្តម និងជាពិសេស ឯកឧត្តមប្រធានាធិបតីសាធារណរដ្ឋកូរ៉េ ដែលបានផ្ញើលិខិតអបអរសាទរចំពោះ ឯកឧត្តមកិតិ្តទេសាភិបាលបណ្ឌិត ត្រូវបានជ្រើសតាំងជានាយករដ្ឋមន្រ្តីនៃនីតិកាលទី ៧ នៃរដ្ឋសភា និងបានអរគុណចំពោះភាគីកូរ៉េ ដែលផ្តល់សេវាគាំពារដល់កម្មករគ្រប់ប្រទេស ដោយរាប់ទាំងពលករកម្ពុជាផងដែរ ដែលតែងផ្តល់ការគាំទ្រ និងយកអាសារដល់ពលករកម្ពុជានៅកូរ៉េ តាមរយៈមណ្ឌលគាំពារការងារ។ឯកឧត្តមនាយករដ្ឋមន្រ្តី ក៏បានបង្ហាញផងដែរអំពីជំហរគាំទ្ររបស់កម្ពុជា ចំពោះបេក្ខភាពកូរ៉េ ក្នុងការធ្វើជាម្ចាស់ផ្ទះរៀបចំពិព័រណ៍ពិភពលោក ឆ្នាំ២០៣០ នៅទីក្រុងប៊ូសាន។

ឯកឧត្តម ឆុង វ៉ាងគឺន បានថ្លែងអំ​ណរ​គុណចំ​ពោះការ​ស្វាគ​មន៍​យ៉ា​ង​ក​ក់ក្តៅរបស់​ឯកឧត្តមកិតិ្តទេសាភិបាលបណ្ឌិត និងបា​នស​ម្តែង​នូវ​ការ​អប​អរ​សាទ​រដ​ល់ឯ​កឧ​ត្ត​មកិតិ្តទេសាភិបាលបណ្ឌិត ដែលត្រូវបានជ្រើសតាំងជានាយករដ្ឋមន្រ្តី។ ឯ​កឧ​ត្តម​ក៏បា​នគូ​ស​ប​ញ្ជាក់អំពីភាពជាដៃគូដ៏ជិតស្និទ្ធរវាងប្រទេសទាំងពីរ ទាំ​ងក្នុ​ងន័​យកិ​ច្ចស​ហប្រ​តិប​ត្តិកា​រអ​ន្ត​រ​ជា​​តិ និងការផ្តល់ជំនួយអភិវឌ្ឍន៍ផ្លូវការ បន្ទាប់ពីទំនាក់ទំនងរវាងប្រទេសទាំងពីរ ត្រូ​វបា​នផ្សា​រ​ភ្ជា​ប់ឡើងវិញចាប់ពីចុងទសវត្សរ៍៩០។

ឯកឧត្តមក៏បានកត់សម្គាល់ផងដែរអំពីសក្តានុពលដ៏ធំធេងរបស់កម្ពុជា ដូចជាក​ត្តាធ​នធា​នធម្មជាតិ, កត្តាប្រជាសាស្រ្ត និងជាពិសេស ការដឹ​កនាំរ​បស់ឯ​កឧត្ត​មកិតិ្ត​ទេសា​ភិបា​ល​ប​ណ្ឌិ​ត ដែលនឹងធ្វើឱ្យវិស័យកសិកម្ម ក៏ដូចជាវិស័យសំខាន់ៗដទៃទៀត មាន​វឌ្ឍ​នភា​ពល្អ​ប្រ​សើ​រ នាពេលអនាគតខាងមុខ។

ភាគីទាំងពីរ ក៏បានឯកភាព ក្នុង​កា​របន្តពង្រឹង និងពង្រី​កប​ន្ថែម​ទៀត​នូវ​កិច្ច​សហ​ប្រតិ​ប​ត្តិ​​ការ និង​ពាណិ​ជ្ជក​ម្មរ​វាង​ប្រទេ​សទាំ​ងពីរ ហើយឯកឧត្តម ឆុង វ៉ាងគឺន មា​នជំ​នឿ​យ៉ា​​ងមុ​តមាំ​ថា​ ក្រោមការដឹកនាំជាប្រវត្តិសាស្រ្តរបស់ឯកឧត្តមកិតិ្តទេសាភិបាលបណ្ឌិត កម្ពុ​ជា​នឹ​​​ង​កា​ន់​តែ​រី​ក​ចម្រើនលើគ្រប់វិស័យ។

បណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិ នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជាបានគូសបញ្ជាក់ពីជំនួបនេះថា ជាសញ្ញាមួយល្អបន្ថែមទៀតសម្រាប់ជំនួបរាជរដ្ឋាភិបាលថ្មី ក្នុងការជួបជា​មួយនឹងរដ្ឋមន្ត្រីកសិកម្មនៃប្រទេសកូរ៉េ ដែលធ្វើឱ្យកិច្ចសហប្រតិបត្តិការ ទំនាក់ទំនងរវាងប្រទេសកម្ពុជា-កូរ៉េសម្រាប់ការងារវិស័យពាណិជ្ជកម្ម កាន់តែល្អប្រសើរថែមទៀត ។

លោកបណ្ឌិតបានកត់សម្គាល់ថា ទី១-ទំហំពាណិជ្ជកម្មមានសន្ទុះកើនឡើងបន្តិចដែរ ជាមួយនឹងក្របខ័ណ្ឌឱសថ និងទំនាក់ទំនងទ្វេភាគី ​យើងសង្កេតឃើញថាភាគីកូរ៉េ ក៏មានការផ្តល់ជំនួយអភិវឌ្ឍន៍ផ្លូវការ និងជំនួយ​មនុស្សធម៌ផ្សេងៗរបស់ភាគីកូរ៉េមកកម្ពុជា ក្នុងការកសាងហេដ្ឋារចនាសម្ពន្ធផ្លូវ ស្ពាន ថ្នល់ និងសេវាកម្មផ្សេងៗ។

ទី២-យើងនឹងជំរុញឱ្យមានកិច្ចព្រមព្រៀងពាណិជ្ជកម្មសេរីផ្លូវការ ដោយយើងខ្វះនូវការអនុវត្ត ដែលយើងបានចុះហត្ថលេខាលើកិច្ចព្រមព្រៀងរួចហើយ ដើម្បីជំរុញពាណិជ្ជកម្ម បង្កើនការនាំចេញទៅកាន់ប្រទេសកូរ៉េ និងថែមទាំងជំរុញដល់អ្នកវិនិយោគកូរ៉េឱ្យមកបោះទុនបន្ថែមនៅកម្ពុជា ព្រោះមានវិនិយោគទុនកូរ៉េ ជាច្រើនហើយ ​ដែលបានមកវិនិយោគនៅកម្ពុជា គឺយើងត្រូវផ្តោតបន្ថែមទៅលើឧស្សាហកម្មធុនមធ្យម ធុនធំ និងវិស័យអេឡិចត្រូនិច ដែលជាទីផ្សារលក់ដើជាដើម។

ទី៣-យើងគួរបង្កើនទេសចរណ៍កូរ៉េ ឱ្យមកកាន់ប្រទេសកម្ពុជាជាថ្មី និងបង្កើនឡើងវិញ ដោយទេសចរជនជាតិកូរ៉េធ្លាប់នាំមុខផងដែរនៅកម្ពុជា និងតាមរយៈការបង្កើនទំនាក់ទំនងទ្វភាគី និងកិច្ចការពាណិជ្ជកម្ម យើងនិងទទួលបាន​អំពីសក្តានុពលដ៏ធំធេងរបស់កម្ពុជា ដូចជាកត្តាធនធានធម្មជាតិ, កត្តាប្រ​ជា​សាស្រ្ត ជាពិសេសការដឹកនាំរបស់ឯកឧត្តមកិតិ្តទេសាភិបាលបណ្ឌិត ដែលនឹងធ្វើឱ្យវិស័យ​កសិកម្ម ក៏ដូចជាវិស័យសំខាន់ៗដទៃទៀត មានវឌ្ឍនភាពល្អប្រសើរ នាពេលអនា​គតខាងមុខ កម្ពុជានឹងកាន់តែរីកចម្រើនលើគ្រប់វិស័យ៕