គ្រាប់កាហ្វេអាចចាត់ទុកជាធនធានធម្មជាតិដែលត្រូវបានប្រើប្រាស់ច្រើនជាងគេបំផុតទី២របស់ពិភពលោកបន្ទាប់ពីធនធានទឹក។ ជារៀងរាល់ឆ្នាំ កាហ្វេប្រមាណជា ១០លានតោនត្រូវបានផលិតហើយកាកសំណល់ប្រមាណ ៦លានតោនត្រូវបានបោះចោលចូលទៅក្នុងបរិស្ថាន ហើយកាកសំណល់ទាំងនោះបានចូលរួមយ៉ាងសំខាន់ក្នុងការបំផ្លាញបរិយាកាសភពផែនដីតាមរយៈការបញ្ចេញឧស្ម័នមេតាន និងឧស្ម័នផ្ទះកញ្ចក់ផង។

ទោះបីជាយ៉ាងណាក្តី ថ្មីៗនេះអ្នកវិទ្យាសាស្ត្របានរកឃើញនូវរបកគំហើញដ៏អស្ចារ្យមួយដែលអាចផ្លាស់ប្តូរពីកាកសំណល់កាហ្វេអត់ប្រយោជន៍ទាល់តែសោះនោះ ទៅជាវត្ថុធាតុដើមដ៏ចំាំបាច់អាចប្រើប្រាស់បានទាំងក្នុងវិស័យសំណង់ និងជួយកាត់បន្ថយការបំពុលអាកាសចេញពីបរិស្ថានរបស់យើងផង។

ក្រុមអ្នកស្រាវជ្រាវវិទ្យាសាស្ត្រមកពីសកលវិទ្យាល័យអង់គ្លេស RMIT University បានខិតខំរហូតសម្រេចបាននូវការអភិវឌ្ឍថ្មីមួយដែលអាចយកកាកសំណល់កាហ្វេទៅផលិតបានជាម្ស៉ៅម្យ៉ាងអាចប្រើប្រាស់ជំនួសខ្សាច់បានដើម្បីយកទៅធ្វើជាបេតុង និងមានប្រសិទ្ធភាពខ្ពស់ ពោលគឺរឹងម៉ាំជាងបេតុងធម្មតាដល់ទៅ៣០ភាគរយ។ ប្រការនេះ មិនត្រឹមតែអាចជួយកាត់បន្ថយការបំពុលអាកាសចេញពីកាកសំណល់កាហ្វេនោះទេ វាថែមទាំងជួយកាត់បន្ថយការបំពុលអាកាសដែលកើតចេញពីសកម្មភាពនានាដែលពាក់ព័ន្ធជាមួយនឹងការទាញយកវត្ថុធាតុដើមនៅក្នុងវិស័យសំណង់ទៀតផង។

វិធីសាស្ត្រនៃការផលិតជាវត្ថុធាតុដើមចាំបាច់ប្រើប្រាស់នូវម៉ាស៊ីនដែលមានបច្ចេកវិទ្យាខ្ពស់បំផុត ពីព្រោះថាកាកសំណល់កាហ្វេត្រូវចាំបាច់ដុតនៅក្នុងសីតុណ្ហភាពដ៏ខ្ពស់ដល់ ៣៥០អង្សារ ឬហៅជាពាក្យបច្ចេកទេស Pyrolysis ដែលអាចបំប្លែងកាកសំណល់កាហ្វេទៅជាម្ស៉ៅពណ៍ខ្មៅដែលសំបូរទៅដល់សារធាតុកាបូនម្យ៉ាងហៅថា biochar ។ ជាលទ្ធផលនៃការធ្វើតេស្តបានបង្ហាញថា Biochar ត្រឹមតែ១៥ភាគរយនៃបរិមាណខ្សាច់ដែលប្រើសម្រាប់ចាក់បេតុងប៉ុណ្ណោះ ហើយអាចធ្វើឲ្យគុណភាពរបស់បេតុងមានភាពរឹងម៉ាំជាងបេតុងធម្មតាដល់ទៅ៣០ភាគរយ។

Biochar ដែលផលិតចេញពីកាកសំណល់កាហ្វេនេះត្រូវបានគេមើលឃើញថានឹងក្លាយជាបដិវត្តថ្មីសម្រាប់វិស័យសំណង់របស់ពិភពលោក ពីព្រោះថាវាគឺជាប្រភពដ៏មាននិរន្តភាពចេញពីគ្រាប់កាហ្វេដែលពិភពលោកកំពុងប្រើប្រាស់ ។

អ្វីដែលគួរឱ្យរីករាយចំពោះការកែច្នៃកាកសំណល់កាហ្វេបំផុតនៅក្នុងពេលបច្ចុប្បន្ននេះ គឺវាអាចត្រូវបានគេយកទៅប្រើប្រាស់ជាមួយនឹងបច្ចេកទេសដ៏ចាំបាច់ផ្សេងទៀត ដូចជាការផលិតទៅជាជីវៈឥន្ធនៈ biofuel សម្រាប់ប្រើប្រាស់ជាមួយនឹងរថយន្តក្រុង ហើយក្រុមអ្នកវិទ្យាសាស្ត្រខ្លះអាចច្នៃវាទៅជាឧបករណ៍ប្រើប្រាស់ផ្សេងៗរួមទាំងដងវ៉ែនតា ឬអាចផលិតជាឈុតកីឡាច្រើនប្រភេទថែមទៀតផង៕