បរទេស ៖ យោងតាមប្រភពព័ត៌មានពី Bloomberg បានរាយការណ៍ថា ចិនកំពុងរៀបចំផែនការពង្រីកការជីកយករ៉ែទង់ដែងដ៏ធំមួយនៅក្នុងប្រទេសស៊ែប៊ី ដោយសារលោហៈធាតុ គឺជាកត្តាសំខាន់សម្រាប់ការផ្លាស់ប្តូរថាមពលស្អាតពិភពលោក ហើយតម្រូវការនឹងកើនឡើងលើសពីការផ្គត់ផ្គង់។

ក្រុមហ៊ុន Zijin Mining Group ដែលជាក្រុមហ៊ុនរុករករ៉ែមាសដ៏ធំបំផុតរបស់ប្រទេសចិន និងជាអ្នកផលិតទង់ដែងកំពូលមួយរបស់ប្រទេសនេះ គ្រោងនឹងពង្រីកការទាញយកទង់ដែងនៅឯអណ្តូងរ៉ែទង់ដែង និងមាស Cukaru Peki របស់ខ្លួន ដែលនៅភាគខាងកើតប្រទេសស៊ែប៊ី។ ក្រុមហ៊ុននេះបានបើកដំណើរការអណ្តូងរ៉ែ Cukaru Peki ប្រហែល ២ ឆ្នាំមុន ជាមួយនឹងការវិនិយោគ ៦៧៨ លានដុល្លារសម្រាប់ចាប់ផ្តើមប្រតិបត្តិការ។ ឥឡូវនេះ ចិនចង់ខួងបន្ថែម ជិតពីរគីឡូម៉ែត្រថែមទៀត ដើម្បីយកមកធ្វើទុនបម្រុងបន្ថែមទៀត។

អណ្តូងរ៉ែនេះមានទីតាំងនៅតំបន់ Bor ភាគខាងកើត ដោយត្រូវបានបែងចែកទៅជាតំបន់ខាងលើ និងតំបន់ខាងក្រោម។ កាលពីឆ្នាំមុនកន្លងទៅនេះ ផលិតកម្មទង់ដែងនៅតំបន់ខាងលើបានឈានដល់ ១១១ ០០០ តោន និង ផលិតកម្មមាស ១៥២ ០០០ អោន។ គេប៉ាន់ប្រមាណថា អណ្តូងរ៉ែនេះមានសមត្ថភាពផលិតទង់ដែងជាង ៩ ម៉ឹនតោន និង មាស ២,៥ តោនក្នុងមួយដងៗ ជាមួយនឹងទិន្នផលនៃ​ផលិតកម្មទង់ដែងអាចឡើងខ្ពស់បំផុត ១៣៥ ០០០ តោន និង មាស ៦,‌១ តោន។

នៅពេលដែលតំបន់ទាំងពីរឈានដល់សមត្ថភាពផលិតពេញលេញ អណ្តូងរ៉ែ Cukaru Peki អាចនឹងជំរុញប្រទេសស៊ែប៊ីទៅជាអ្នកផលិតទង់ដែងធំជាងគេទី ២ របស់អឺរ៉ុប។ ទន្ទឹមនឹងនេះ ការប្រណាំងប្រជែងក្នុងការផលិតសម្ភារៈសំខាន់ៗសម្រាប់ការផ្លាស់ប្តូរថាមពលបៃតងមានភាពកាន់តែខ្លាំងក្លានៅជុំវិញពិភពលោក ដោយប្រទេសចិនបានក្លាយជាអ្នកផ្គត់ផ្គង់កំពូលនៃសារធាតុរ៉ែសំខាន់ៗនៅលើពិភពលោក។ គួរឲ្យបញ្ជាក់ផងដែរថា ទង់ដែងត្រូវបានប្រើប្រាស់នៅក្នុងទួរប៊ីនខ្យល់ បណ្តាញអគ្គិសនី និងរថយន្តអគ្គិសនី។ លើសពីនេះ ទង់ដែង និងដែកគឺជាទ្រព្យសម្បត្តិនាំចេញដ៏សំខាន់របស់ប្រទេសស៊ែប៊ី ដោយឥឡូវនេះ ក្រុមហ៊ុនចិនបានក្លាយជាអ្នកនាំចេញកំពូលពីប្រទេសស៊ែប៊ី។ ក្រសួងហិរញ្ញវត្ថុសែប៊ី បានប្រកាសថា តម្លៃសរុបនៃការនាំចេញរបស់អ្នកនាំចេញធំបំផុតទាំង ១៥ ក្នុងរយៈពេល ៧ ខែដំបូងនៃឆ្នាំនេះមានចំនួន ៤,២ ពាន់លានអឺរ៉ូ (៤,៥ ពាន់លានដុល្លារអាមេរិក)។

លោក Branko Rakocevic មន្ត្រីជាន់ខ្ពស់របស់ស៊ែប៊ីដែលនៅអណ្តូងរ៉ែនោះ និយាយថា ដើម្បីជីកយករ៉ែបន្ថែមទៀត គឺវាត្រូវការការវិនិយោគបន្ថែមប្រហែល ៣,៥ ពាន់លានដុល្លារទៅ ៣,៨ ពាន់លានដុល្លារ។ បច្ចុប្បន្នេះ ទង់ដែងគឺស្ថិតនៅក្នុងតម្រូវការរបស់ពិភពលោកជានិច្ច ដែលត្រូវការការវិនិយោគរយៈពេលវែង និង ទីផ្សារមានស្ថិរភាពគ្រប់គ្រាន់។

យោងតាមក្រុមហ៊ុនប្រឹក្សា McKinsey បានបង្ហាញថា ការផ្លាស់ប្តូររបស់ពិភពលោកទៅកាន់សេដ្ឋកិច្ចបៃតងនឹងជំរុញតម្រូវការទង់ដែងប្រចាំឆ្នាំដល់ ៣៦,៦ លានតោននៅឆ្នាំ ២០៣១ ។ គេព្យាករណ៍ថា ការផ្គត់ផ្គង់នឹងកើនឡើងប្រហែល ៣០,‌១ លានតោននៅឆ្នាំ ២០៣១ បើធៀបនឹងការផ្គត់ផ្គត់ទង់ដែងបច្ចុប្បន្នមានចំនួន ២២ លានតោន៕