សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បើទោះបីជាសហរដ្ឋអាម៉េរិកបានអនុវត្តន៍ពន្ធបដិការ១៩% លើការនាំចូលទំនិញពីកម្ពុជាក៏ដោយ ក៏ការនាំចេញទំនិញពីតំបន់សេដ្ឋកិច្ចពិសេសក្រុងភ្នំពេញទៅកាន់ទីផ្សារសហរដ្ឋអាម៉េរិកបន្តកើនឡើងគួរឱ្យកត់សម្គាល់។ នេះបើតាមការឱ្យដឹងពីមន្រ្តីជាន់ខ្ពស់ក្រសួងពាណិជ្ជកម្ម។
ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានមានប្រសាសន៍ថា ទោះជាអាម៉េរិកអនុវត្តពន្ធបដិការក៏ដោយ ក៏ប៉ុន្តែការនាំទំនិញចេញទៅកាន់ទីផ្សារអាម៉េរិក នៅប្រព្រឹត្តទៅតាមធម្មតា ដោយមិនមានផលប៉ះពាល់ជាអវិជ្ជមានណាមួយតាមរយៈការអនុវត្តពន្ធបដិការនេះឡើយ។
ឯកឧត្តមបញ្ជាក់ថា ចំពោះអ្នកបញ្ជាទិញពីសហរដ្ឋអាម៉េរិកគឺនៅតែមានទំនុកចិត្តមកលើការផលិត ឬសង្វាក់ផលិតកម្មនៅកម្ពុជាដដែល ដោយសារកម្ពុជាគោរពច្បាប់ការងារបានល្អ គោរពសិទ្ធិការងារបានត្រឹមត្រូវ និងបើកលំហរសិទ្ធិនៃការតវ៉ាជាដើម។
ជាមួយគ្នានេះ លោក ហាក់ សេរី អ្នកគ្រប់គ្រងជាន់ខ្ពស់តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) បានមានប្រសាសន៍ថា ការនាំចេញផលិតផលចម្រុះចេញពីតំបន់សេដ្ឋកិច្ចពិសេស RGPPSEZ ទៅកាន់ទីផ្សារអាម៉េរិកនៅតែមានដំណើរការធម្មតា ដោយកាលពីខែសីហា ឆ្នាំ២០២៥ កន្លងទៅនេះ ការនាំចេញសម្រេចបានជាង ១៧៤លានដុល្លារ និងខែកញ្ញា សម្រេចបានជាង ១៧៥ លានដុល្លារ រៀងគ្នា លោកបានបញ្ជាក់ថា ៖
«បើសិនឧទហរណ៍ថា យើងមើលជារួម យើងប្រៀបធៀបកាលពីមុនអនុវត្ត ហើយក្រោយអនុវត្ត ដូចអត់មានអីប្លែកទេ មានន័យថាអត់មានជាលក្ខណៈចុះទៅគំហុកទេ។ គិតចាប់ពីខែ មករា ដល់ ខែកញ្ញា ឆ្នាំ២០២៥ ទោះចំពេលដែលមានស្ថានភាពតានតឹងព្រំដែនផងនោះ តម្លៃនៃការនាំចេញពីតំបន់សេដ្ឋកិច្ចពិសេសក្រុងភ្នំពេញ ទៅកាន់ទីផ្សារសហរដ្ឋអាម៉េរិកមានចំនួន ៤២៣ លានដុល្លារអាម៉េរិក កើនឡើង ២៨.៤៤%»។
របាយការណ៍អគ្គនាយកដ្ឋានគយ និងរដ្ឋាករកម្ពុជា បានបង្ហាញថា ទំហំពាណិជ្ជកម្មរវាងកម្ពុជា និងសហរដ្ឋអាម៉េរិកក្នុងរយៈពេល៩ខែដើមឆ្នាំ២០២៥ មានចំនួនជាង ៩ ៥៦៨ លានដុល្លារ ក្នុងនោះការនាំចេញមានចំនួន ៩ ២៨៤ លានដុល្លារកើនឡើង ២២% ធៀបនឹងរយៈពេលដូចគ្នាឆ្នាំ២០២៤ ដែលមានចំនួនត្រឹម ៧ ៦០៨ លានដុល្លារ។ ចំណែកការនាំចូលពីសហរដ្ឋអាម៉េរិកមានចំនួន ២៨៤ លានដុល្លារ កើនឡើង ៤% ធៀបនឹងរយៈពេល ៩ខែដូចគ្នាកាលពីឆ្នាំ២០២៤ ដែលមានចំនួនប្រមាណជា ១៩៣ លានដុល្លារសហរដ្ឋអាម៉េរិកប៉ុណ្ណោះ៕
Account
Security
Favourite Content