ភ្នំពេញ៖ តំណាងគណៈកម្មាធិការបណ្តាញសហគ្រិនស្រ្តីអាស៊ាន (CamWen) នៅកម្ពុជា នឹងរៀបចំព្រឹត្តិការណ៍ដ៏ធំលំដាប់ថ្នាក់តំបន់អាស៊ាន the Pinnacle Entrepreneur Forum 2025 នៅថ្ងៃទី២១ ខែវិច្ឆិកា ឆ្នាំ២០២៥ នាសណ្ឋាគារ សូហ្វីតែល ភ្នំពេញភូគីត្រា អមដោយកម្មវិធីប្រគល់ពាន់រង្វាន់សហគ្រិនស្រ្តីឆ្នើមអាស៊ាន។

នៅក្នុងព្រឹត្តិការណ៍ដ៏អស្ចារ្យនេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា នឹងអញ្ជើញជាអធិបតីនៃ”វេទិកាសហគ្រិនស្រ្តីកំពូលអាស៊ាន” តំណាងដ៏ខ្ពង់ខ្ពស់បំផុត សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលប្រារព្ធធ្វើឡើងក្រោមប្រធានបទ «The World Prospers when We Collaborate» ព្រមទាំងសហគ្រិនស្រ្តីមកពីបណ្តាប្រទេសនានាជាង១០០០នាក់ នឹងចូលរួមក្នុងវេទិកាដ៏សំខាន់នេះ។

លោកជំទាវទន្តបណ្ឌិត អេង លីគួង ប្រធានបណ្តាញសហគ្រិនស្ត្រីអាស៊ាន (AWEN) និងជាប្រធានបណ្តាញសហគ្រិនស្ត្រីកម្ពុជា (CamWEN) បានមានប្រសាសន៍ថា៖ កម្មវិធី AS​E​A​N​ Women Entrepreneurs Network Award (AWEN Award) ត្រូវបានបង្កើតឡើងក្នុងគោលបំណងតំណាងឱ្យស្ត្រីក្នុងវិស័យសេដ្ឋកិច្ចទាំងអស់ ដែលនៅក្នុងរដ្ឋជាសមាជិកអាស៊ាន ផ្ដោតទៅលើ ការបង្កើតវេទិកាក្នុងតំបន់, ការគាំទ្រសហគ្រិនស្ត្រីអាស៊ាន ឱ្យមានលទ្ធភាពទទួលបានហិរញ្ញវត្ថុកាន់តែប្រសើរ ជាពិសេស ផ្តល់ឱកាសឲ្យសហគ្រិនទាំងនេះបង្កើតជាបណ្ដាញសហគមន៍យ៉ាងរឹងមាំ ក៏ដូចជាបង្កើតមូលនិធិសម្រាប់គំនិតអាជីវកម្មច្នៃប្រឌិតនានាឱ្យទទួលបានជោគជ័យ។

លោកជំទាវបានបន្តលើកឡើងថា៖

«ការរៀបចំខ្លួនធ្វើជាម្ចាស់ផ្ទះសម្រាប់ព្រឹត្តិការណ៍អន្តរជាតិមួយនេះ ពិតជាមានសារសំខាន់ណាស់សម្រាប់ទាំងមុខមាត់ប្រទេសជាតិ និងទាំងសម្រាប់កភាពទាក់ទាញប្រយោជន៍ជូនជនរួមជាតិទាំងមូល»។

លោកជំទាវសង្ឃឹម និងជឿជាក់យ៉ាងមុតមាំថា ព្រឹត្តិការណ៍ដ៏មានសារៈសំខាន់មួយនេះនឹងក្លាយទៅជាកាតាលីករ ក៏ដូចជា Platform អន្តរជាតិដ៏សំខាន់មួយសម្រាប់ចូលរួមចំណែកជួយជ្រោមជ្រែង និងគាំទ្រទៅដល់រាជរដ្ឋាភិបាល ដែលកំពុងដឹកនាំដោយសម្តេចបវរធិបតី ហ៊ុន ម៉ាណែត និងជាការគាំទ្រយ៉ាងសំខាន់ទៅដល់គោលនយោបាយអាស៊ាន និងអន្តរជាតិ នៅក្នុងការលើកកម្ពស់ និងជំរុញសក្តានុពលរបស់ស្ត្រីនៅក្នុងវិស័យជំនួញនានា ដើម្បីភាពរីកចំរើនលូតលាស់ទៅលើសេដ្ឋកិច្ច និងការអភិវឌ្ឍន៍សង្គម ប្រកប​ដោយចិរភាព និងវឌ្ឍនភាព។

Pinnacle Entrepreneur Forum នឹងក្លាយទៅជាវេទិកាប្រចាំឆ្នាំមួយនៅកម្ពុជាសម្រាប់សហគ្រិនស្ត្រីនៅក្នុងបណ្តាប្រទេសសមាជិកអាស៊ានទាំងអស់ក្នុងការផ្សារភ្ជាប់ និងបង្កើនទំនាក់ទំនង កិច្ចសហប្រតិបត្តិការផ្សេងៗ តាមរយៈការចូលរួមក្នុងវេទិកាប្រចាំឆ្នាំ ហើយក៏ជាវេទិកានៃការជជែកវែកញែក ពិភាក្សាស៊ីជម្រៅពីសំណាក់បុគ្គលពាក់ព័ន្ធសំខាន់ៗ អំពីទិដ្ឋភាពទូទៅនៃបរិយាកាសធុរកិច្ច សេដ្ឋកិច្ច និងវិស័យពាក់ព័ន្ធ សម្រាប់ប្រជាជាតិអាស៊ាន។ វេទិកានេះផងដែរ នឹងផ្តល់នូវចំណេះដឹង ព័ត៌មានពាក់ព័ន្ធសំខាន់ៗសម្រាប់ធុរជន សហគ្រិន ស្ថាប័ន និងអ្នកពាក់ព័ន្ធនានា សម្រាប់យកទៅធ្វើជាប្រយោជន៍ក្នុងប្រតិបត្តិការធុរកិច្ច ឬកិច្ចការសម្រាប់ប្រទេស ក៏ដូចជាស្ថាប័នរបស់ខ្លួន។

គួររំលឹកថា កម្ពុជា កាលពីឆ្នាំ២០២៤ ក៏បានធ្វើជាម្ចាស់ផ្ទះវេទិកា ASEAN Women Entrepreneurs នេះប្រកបដោយជោគជ័យផងដែរ ដោយមានសហគ្រិនជាង៥០០នាក់ចូលរួម។ ពិធីប្រគល់ពានរង្វាន់ AWEN ជាវេទិកាសកលដ៏មានកិត្យានុភាព ដើម្បីទទួលស្គាល់ និងអបអរសាទរសមិទ្ធផលរបស់សហគ្រិនស្ត្រីមកពីជុំវិញពិភពលោក។

ដោយឡែក បណ្តាញសហគ្រិនស្ត្រីកម្ពុជា (CamWEN) គឺជាបណ្តាញដ៏រស់រវើកនៃសហគ្រិនស្ត្រីនៅកម្ពុជា ដែលឈានមុខគេ ក្នុងភាពជាអ្នកដឹកនាំ បណ្តុះបណ្តាល និងការតស៊ូមតិសម្រាប់អាជីវកម្មដែលដឹកនាំដោយស្ត្រី។ បណ្តាញសហគ្រិនស្ត្រីអាស៊ាន (AWEN) គឺជាវេទិកាថ្នាក់តំបន់ដែលបង្រួបបង្រួមសហគ្រិនស្ត្រីទូទាំងអាស៊ាន ផ្តល់អំណាចភាពជាអ្នកដឹកនាំរបស់ស្ត្រី និងលើកកម្ពស់កំណើនសេដ្ឋកិច្ចុ៕