សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ត្បិតថា កសិផលក្នុងស្រុកភាគច្រើនតែងតែជន់ជោរខ្លាំងនៅពេលដល់រដូវប្រមូលផលម្ដងៗ ដែលធ្វើឱ្យតម្លៃលើទីផ្សារធ្លាក់ចុះគួរឱ្យកត់សម្គាល់ ប៉ុន្តែក៏មានក្រុមអ្នកកែច្នៃមួយចំនួនបានចាប់យកឱកាសនារដូវប្រមូលទិន្នផលដ៏ជន់ជោរទាំងនោះមកកែច្នៃជាផលិតផលថ្មីៗអាស្រ័យទៅតាមជំនាញ និងបច្ចេកទេសរបស់សិប្បកម្មរបស់ខ្លួន។ តួយ៉ាង ដូចជាសិប្បកម្មផលិតស្រាចេញពីផ្លែស្វាយមួយកន្លែង មានឈ្មោះថា SKH Natural Plus ស្ថិតនៅក្នុងខេត្តប៉ៃលិន តែងចិញ្ចឹមចិត្តជួយប្រមូលទិញផ្លែស្វាយពីកសិករដែលត្អូញត្អែរថាពិបាកលក់នោះមិនក្រោម១០តោននោះឡើយក្នុង១ឆ្នាំ ដើម្បីផលិតធ្វើជាស្រា មានរសជាតិឆ្ងាញ់។
បើតាមលោក វួច ធុច ជាម្ចាស់សិប្បកម្មខាងលើបានប្រាប់ឱ្យដឹងថា ការផលិតស្រាស្វាយនេះគឺអាចជួយបានទាំងកសិករ និងផ្ដល់ការងារដល់ប្រជាជនក្នុងសហគមន៍ ហើយបន្ទាប់ពីធ្វើការសាកល្បងផលិតប្រមាណ ២០០ដបកន្លងមក ឃើញថាទីផ្សារស្រាស្វាយមានការគាំទ្រល្អគួរសម ខណៈដែលលោកក៏មានគម្រោងបង្កើនការផលិតបន្ថែមទៀតនៅដើមឆ្នាំក្រោយនេះ។
លោកបញ្ជាក់ថា ៖
« មូលហេតុដែលខ្ញុំសម្រេចចិត្តកែច្នៃស្វាយនេះទៅជាស្រា គឺដោយសារតែខ្ញុំឃើញស្វាយនៅក្នុងខេត្តយើងសល់ច្រើន ហើយតម្លៃវិញក៏ទាប ដែលយើងអាចយកមកកែច្នៃបាន។ ដោយឡែក ចំពោះគម្រោងនៃការផលិតវិញ នៅក្នុងឆ្នាំនេះខ្ញុំផលិតតិចតួចប៉ុណ្ណោះ ប៉ុន្តែសម្រាប់ឆ្នាំក្រោយនេះ ខ្ញុំមានគម្រោងផលិតចំនួន ១០តោនស្វាយ ដែលការកែច្នៃនេះបានរួមចំណែកជួយដល់កសិករតាមរយៈធ្វើឱ្យទីផ្សារផ្លែស្វាយមានតម្រូវការ ហើយតម្លៃក៏ទទួលបានភាពសមរម្យមួយផ្នែក ហើយក្រៅពីនេះក៏អាចផ្ដល់ការងារដល់ប្រជាជនក្នុងសហគមន៍ផងដែរ»។
ពាក់ព័ន្ធនឹងបច្ចេកទេសកែច្នៃ និងផលិតជាស្រាវិញ ម្ចាស់សិប្បកម្មខាងលើរៀបរាប់ដូច្នេះថា ៖ «យើងត្រូវការស្វាយដែលទុំល្អ ហើយត្រូវចិតយកតែផ្នែកសាច់ បន្ទុំ និងផ្អាប់ទុកប្រមាណ ៤-៦ខែ ទើបអាចវេចខ្ចប់សម្រាប់ដាក់លក់នៅលើទីផ្សារបាន។ ជាទូទៅ ចំពោះបច្ចេកទេសនៃការបន្ទុំ និងផ្អាប់ទុកនេះ វាមានលក្ខណៈខុសគ្នាពីការបន្ទុំស្រាច្នៃពីផ្លែមៀនបន្តិច ម៉្យាងទៀត ដោយសារតែស្វាយមានសារធាតុអាស៊ីតខ្លាំងជាង ដូច្នេះការចំណាយពេលវេលាគឺតិចជាងការបន្ទុំស្រាមៀន»។
លោក វួច ធុច បានបញ្ជាក់ឱ្យដឹងផងដែរថា ចំពោះផលិតផលស្រាដែលច្នៃចេញពីផ្លែស្វាយកែវរមៀតនេះ នៅពេលដាក់លក់នៅលើទីផ្សារអាចមានតម្លៃចាប់ពី ៨-១២ដុល្លារក្នុងមួយដប ហើយតាមការកត់សម្គាល់ អតិថិជនដែលគាំទ្រភាគច្រើនជាអ្នករស់នៅរាជធានីភ្នំពេញ ជាពិសេសអ្នកដែលចូលចិត្តផលិតផលខ្មែរបង្កើតនៅក្នុងស្រុកតែម្ដង។
ជាមួយគ្នានេះផងដែរ លោក វួច ធុច ក៏បានបង្ហាញពីក្ដីសង្ឃឹមថា នឹងអាចទទួលបានការគាំទ្របន្តទៀតពីអតិថិជន ដោយសារផលិតផលនេះជាការកែច្នៃថ្មីមួយប្រភេទទៀតដែលបានរួមចំណែកជួយដល់កសិករក្នុងស្រុក ហើយបើមានការគាំទ្រច្រើន លោកនឹងបន្តគម្រោងផលិតនូវភេសជ្ជៈមួយចំនួនទៀតដូចជា ទឹកមៀន ឬទឹកស្វាយ បន្ថែមពីលើប្រភេទស្រា ដែលអាចជួយរកទីផ្សារកសិផលក្នុងតំបន់បានកាន់តែច្រើន៕
Account
Security
Favourite Content