សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ របាយការណ៍របស់ក្រសួងពាណិជ្ជកម្មបានបង្ហាញថា ប្រទេសកម្ពុជាបាននាំចេញទំនិញមានតម្លៃ ៦,៣៤ ពាន់លានដុល្លារទៅកាន់ប្រទេសសមាជិកភាពនៃកិច្ចព្រមព្រៀងដៃគូសេដ្ឋកិច្ចគ្រប់ជ្រុយជ្រោយក្នុងតំបន់ (RCEP) កាលពីឆ្នាំ ២០២២ បានកើនឡើង ៧ ភាគរយ ធៀបនឹងរយៈដូចគ្នាកាលពីឆ្នាំមុន។
របាយការណ៍បានបានបង្ហាញទៀតថា ការនាំចូលរបស់ប្រទេសពីបណ្តាប្រទេស RCEP មានចំនួនសរុប ២៤,៦៨ ពាន់លានដុល្លារអាមេរិក កើនឡើង ៣ ភាគរយ ធៀបនឹងឆ្នាំ ២០២១។
ទំហំពាណិជ្ជកម្មរបស់កម្ពុជាជាមួយប្រទេសជាសមាជិក RCEP មានទំហំទឹកប្រាក់សរុបដល់ ៣១ ពាន់លានដុល្លារ ក្នុងឆ្នាំ ២០២២ ដែលកើនឡើង ៤ ភាគរយពីឆ្នាំទៅមួយឆ្នាំ ដោយប្រទេសដៃគូពាណិជ្ជកម្មកំពូលរបស់កម្ពុជា គឺចិន វៀតណាម ថៃ សិង្ហបុរី និងជប៉ុន។
ដោយបានចូលជាធរមាននៅថ្ងៃទី ១ ខែមករា ឆ្នាំ ២០២២ កិច្ចព្រមព្រៀង RCEP មានប្រទេសចំនួន ១៥ នៅអាស៊ីប៉ាស៊ីហ្វិក រួមទាំងប្រទេសសមាជិកអាស៊ានចំនួន ១០ គឺប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម។ ឯដៃគូពាណិជ្ជកម្មចំនួនប្រាំរបស់ពួកគេគឺ ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។
ក្នុងនាមជាប្លុកពាណិជ្ជកម្មធំបំផុតរបស់ពិភពលោក កិច្ចព្រមព្រៀងពាណិជ្ជកម្ម RCEP មានផលិតផលសរុបក្នុងស្រុកសរុបចំនួន ២៦,២ ទ្រីលានដុល្លារ ដែលតំណាងឱ្យប្រហែល ៣០ ភាគរយនៃផលិតផលក្នុងស្រុកសរុបពិភពលោក ២៨ ភាគរយនៃពាណិជ្ជកម្មពិភពលោក និង ៣២.៥ ភាគរយ នៃការវិនិយោគពិភពលោក។
អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា ឯកឧត្តម ប៉ែន សុវិជាតិ បានឱ្យដឹងថា កំណើនពាណិជ្ជកម្មរបស់កម្ពុជាជាមួយប្រទេស RCEP ផ្សេងទៀត មានកម្រិតមធ្យម ដោយសារកម្ពុជា និងប្រទេសដទៃទៀតទើបតែបានងើបឡើងវិញពីជំងឺរាតត្បាតកូវីដ-១៩។
ឯកឧត្តម បានគូសបញ្ជាក់ថា ប្រទេសកម្ពុជាគឺជាខ្សែសង្វាក់ផ្គត់ផ្គង់មួយ ក្នុងចំណោមខ្សែសង្វាក់ផ្គត់ផ្គង់នៅលើពិភពលោក ក្នុងការនាំចេញសម្លៀកបំពាក់ ស្បែកជើង គ្រឿងអេឡិចត្រូនិក និងអគ្គិសនី និងផលិតផលកសិកម្ម។
ឯកឧត្តម បានថ្លែងថា ចាប់តាំងពីចូលជាធរមាន ការនាំចេញរបស់កម្ពុជាទៅកាន់ទីផ្សារអន្តរជាតិ ជាពិសេសទៅកាន់ប្រទេសសមាជិក RCEP បានកើនឡើងខ្លាំង។ ឯកឧត្តម បានឱ្យដឹងថា៖
“យើងជឿថាកំណើននឹងខ្ពស់ជាងនៅឆ្នាំនេះ និងលើសពីនេះ។ RCEP គឺជាកាតាលីករសម្រាប់កំណើនពាណិជ្ជកម្មរយៈពេលវែង និងនិរន្តរភាពរបស់យើង ហើយវាគឺជាមេដែកដើម្បីទាក់ទាញការវិនិយោគផ្ទាល់ពីបរទេសកាន់តែច្រើនមកកាន់ប្រទេសរបស់យើង”
សូមបញ្ជាក់ថា កិច្ចព្រមព្រៀង RCEP បានផ្តល់នូវកិច្ចសហប្រតិបត្តិការដែលមានផលប្រយោជន៍ទៅវិញទៅមក និងលទ្ធផលឈ្នះឈ្នះសម្រាប់ប្រទេសដែលចូលរួមទាំងអស់។ កិច្ចព្រមព្រៀង RCEP មិនត្រឹមតែជួយសម្រួលដល់លំហូរសេរី នៃពាណិជ្ជកម្មប៉ុណ្ណោះទេ ប៉ុន្តែថែមទាំងបានលើកកម្ពស់ការរួមបញ្ចូលនៃខ្សែច្រវ៉ាក់ឧស្សាហកម្ម និងការផ្គត់ផ្គង់ក្នុងតំបន់។ កិច្ចព្រមព្រៀងនេះរំពឹងនឹងជួយទាក់ទាញសហគ្រាសបរទេសឱ្យពង្រីកវត្តមានរបស់ពួកគេនៅក្នុងប្រទេសកម្ពុជា និងប្រទេសសមាជិកផ្សេងទៀត។
ឯកឧត្តម សុវិជាតិ បានថ្លែអថា៖
“កិច្ចព្រមព្រៀងពាណិជ្ជកម្មសេរីដ៏ធំបំផុតរបស់ពិភពលោកនេះ នឹងជួយកម្ពុជាបញ្ចប់ពីឋានៈជាប្រទេសអភិវឌ្ឍន៍តិចតួចរបស់ខ្លួននៅឆ្នាំ២០២៨ និងការសម្រេចបាននូវគោលដៅរបស់ខ្លួនក្នុងការក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០៕”
Account
Security
Favourite Content