ភ្នំពេញ ៖ បច្ចុប្បន្ន សេវាឥណទាន ឬហិរញ្ញវត្ថុផ្លូវការ ដែលផ្តល់ដោយគ្រឹះស្ថានធនាគារ និងហិរញ្ញវត្ថុ (គ្រឹះស្ថានមីក្រូហិរញ្ញវត្ថុ) ស្ថិតក្រោមការគ្រប់គ្រងរបស់ធនាគារជាតិនៃកម្ពុជា បាននិងកំពុងរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចជាតិ ពិសេសជាប្រភពទុនសម្រាប់ប្រជាជន ម្ចាស់អាជីវកម្ម និងក្រុមហ៊ុនឯកជន ក្នុងការបង្កើត និងពង្រីកមុខរបរ ឬអាជីវកម្ម។

សេវាឥណទាន គឺសេវាហិរញ្ញវត្ថុដែលម្ចាស់បំណុលព្រមព្រៀងផ្តល់ឥណទានជាប្រាក់ទៅឱ្យកូនបំណុល ហើយកូនបំណុលព្រមព្រៀងទទួលយកឥណទាននោះ ដោយកូនបំណុលមានកាតព្វកិច្ចបង់សងត្រឡប់នូវប្រាក់ដើម ការប្រាក់ ព្រមទាំងសោហ៊ុយ និងកម្រៃសេវាផ្សេងៗ ដែលបានចែងក្នុងកិច្ចសន្យាឥណទាន។

គ្រឹះស្ថានធនាគារ និងហិរញ្ញវត្ថុ ដែលទទួលបានអជ្ញាបណ្ណពីធនាគារជាតិនៃកម្ពុជាក្នុងការផ្តល់សេវាឥណទាន រួមមាន ៖ ធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុ និងគ្រឹះស្ថានឥណទានជនបទ។ ដោយឡែក គ្រឹះស្ថានភតិសន្យាហិរញ្ញវត្ថុ ទទួលបានអជ្ញាបណ្ណពីធនាគារជាតិនៃកម្ពុជា ដើម្បីផ្តល់សេវាកម្មភតិសន្យាហិរញ្ញវត្ថុ។

ប្រភេទសេវាឥណទានដែលកំពុងមានវត្តមាន និងកំពុងពេញនិយមផ្តល់ឱ្យដោយគ្រឹះស្ថានធនាគារ និងហិរញ្ញវត្ថុទាំងនោះ រួមមាន ៖

ឥណទានផ្ទាល់ខ្លួន ៖ ជាប្រភេទឥណទាន និងបណ្ណឥណទាន ដែលផ្តល់ឱ្យអតិថិជនជាឯកត្តបុគ្គល ដើម្បីបំពេញតម្រូវការប្រើប្រាស់ផ្ទាល់ខ្លួន ឬសម្រាប់គ្រួសារ ដូចជា ទិញសម្ភារៈប្រើប្រាស់ ទិញយានយន្ត បន្តការសិក្សា ព្យាបាលជំងឺ ជាដើម។

ឥណទានសម្រាប់ការសាងសង់ ៖ ជាប្រភេទឥណទានដែលផ្តល់ឱ្យអតិថិជនជាឯកត្តបគ្គុល ឬ ក្រុមហ៊ុន ដើម្បបម្រើដល់ការសាងសង់ ជួសជុល កែលម្អ ឬ ធ្វើឱ្យប្រសើរឡើងចំពោះលំនៅដ្ឋាន ឬអគារ។

ឥណទានអចលនទ្រព្យ ៖ ជាប្រភេទឥណទាន ដែលផ្តល់ដល់អតិថិជនជាឯកត្តបុគ្គល ឬ ក្រុមហ៊ុន ដើម្បីទិញអចលនទ្រព្យ ដូចជា ដីធ្លី អគារ ឬ ផ្ទះ សម្រាប់ប្រើប្រាស់ ឬ រក្សាទុកសម្រាប់ការវិនិយោគ។

ឥណទានជាក្រុម ៖ ជាប្រភេទឥណទាន ដែលផ្តល់ដល់អតិថិជនជាក្រុមចាប់ពី ២ រហូតដល់ ៥ នាក់ ដើម្បីប្រើប្រាស់តាមតម្រូវការរបស់សមាជិកក្នុងក្រុម។

ឥណទានសាជីវកម្ម ៖ ជាប្រភេទឥណទានអាជីវកម្ម ដែលផ្តល់ដល់ក្រុមហ៊ុនសាជីវកម្ម ដើម្បីប្រើប្រាស់ក្នុងគោលបំណងដំណើរការ ឬពង្រីកអាជីវកម្ម ដែលរូមបញ្ចូលទាំងឥណទានអភិវឌ្ឍនអាជីវកម្ម ឥណទានវិបារូបន៍ ឥណទានសម្រាប់ការធានាលើការនាំចេញ នាំំចូល និងឥណទានពាណិជ្ជកម្មជាដើម។

ឥណទានសហគ្រាសធុនមីក្រូ តូច និងធម្យម ៖ ជាប្រភេទឥណទានអាជីវកម្ម ដែលផ្តល់ដល់សហគ្រាសធុនមីក្រូ តូច និងធម្យម ឬឯកត្តបុគ្គល ដើម្បីបង្កើតដំណើរការទ្រទ្រង់ ឬ ពង្រីកសហគ្រាសអាជីវកម្ម។

ឥណទានកសិកម្ម ៖ ជាប្រភេទឥណទាន ដែលផ្តល់ដល់កសិករ និងពាណិជ្ជករក្នុងវិស័យកសិកម្ម ដើម្បីគាំទ្រដល់ផលិតកម្មកសិកម្ម និងធ្វើឱ្យប្រសើរឡើងនូវជីវភាពរស់នៅរបស់ប្រជាកសិករ។

ប្រភេទឥណទាន ដែលផ្តល់ដោយគ្រឹះស្ថានធនាគារ និងហិរញ្ញវត្ថុ មានភាពសម្បូរបែបសម្រាប់បម្រើដល់គោលបំណងផ្សេងៗគ្នា ដូច្នេះមុននឹងសម្រេចចិត្តជ្រើសរើសប្រភេទឥណទានណាមួយ លោកអ្នកត្រូវដឹងឱ្យបានច្បាស់អំពីគោលបំណងប្រើប្រាស់ឥណទាន ទំហំតម្រូវការឥណទាន ស្ថានភាពហិរញ្ញវត្ថុ និងលទ្ធភាពសងរបស់ខ្លួនឯង៕