ភ្នំពេញ ៖ ពូជគ្រាប់ស្វាយចន្ទី M23 ជាពូជដែលមានការពេញនិយមដាំដុះច្រើនជាងគេ ពូជនេះមានគ្រាប់ធំល្អ មានរសជាតិឆ្ងាញ់ និងអាចផ្ដល់​ទិន្នផល​បានខ្ពស់ជាងពូជផ្សេងៗទៀត។ នេះបើតាមការឱ្យដឹងពី ក្រសួងកសិកម្ម រុក្ខាប្រមាញ់ និងនេសាទ។

លោក អួន ស៊ីឡុត ប្រធានសមាគមស្វាយចន្ទីកម្ពុជាបានឱ្យដឹងថា ពូជស្វាយចន្ទីប្រភេទនេះកំពុងមានប្រជាប្រិយភាពក្នុងចំណោមកសិករ​ក្នុង​ស្រុក។ ប៉ុន្តែសម្រាប់ស្វាយចន្ទីពូជ M23 នេះគឺទាមទារការថែទាំខ្ពស់ពីកសិករ ដោយមិនអាចដើរចោលបាននោះទេ។ ពូជប្រភេទនេះផងដែរ មានជាពូជស្រាល (ប្រមូលផលបានលឿន) និងពូជធ្ងន់ (ត្រូវការរយៈ​ពេលយូរ) ដែលជាលក្ខណៈពិសេសខុស​ពីពូជ​ដទៃទៀត ​ដូចជា ពូជ M1 ឬ SM1, M23, IM4, M10, H09, M7 និង SAN1 ជាដើម។

លោក​បាន​បន្ត​ទៀត​ថា ពូជ M23 នេះ មាន​លក្ខណៈ​ធន់​នឹង​អាកាសធាតុ​ជាង​ពូជ​ដទៃ​ទៀត ដោយ​ទិន្នផល M23 ខ្ពស់​ជាង​ពូជ​ដទៃ ៣០​ភាគរយ ដែលទិន្នផល​ជា​មធ្យមអាចទទួលបានប្រមាណ ២​តោន​ក្នុង​ ១ហិកតា ទើប​ធ្វើ​ឱ្យ​កសិករ​និយម​ចូលចិត្ត​ដាំ​ពូជ​នេះជាង​ពូជ​ផ្សេងៗ​ទៀត ខណៈដែលបច្ចុប្បន្ននេះពូជគ្រាប់ស្វាយចន្ទីប្រភេទ M23 បាន និងកំពុងដាំដុះនៅលើផ្ទៃដីប្រមាណជា ៦០% នៃផ្ទៃដីសរុប​ទូទាំង​ប្រទេស។

លោក ហួត ដារ៉ា​ ជាកសិករម្នាក់ដែលដាំដុះពូជស្វាយចន្ទី និងផ្សុំាកូនស្វាយចន្ទី M23 បានរៀបរាប់ឱ្យដឹងពីភាពជោគជ័យនៃការលក់ និងដាំដុះរបស់ខ្លួន នៅលើផ្ទៃដីដាំដុះប្រមាណជា ៦ហិកតា ព្រមទាំងផ្សុំាកូនចន្ទីលក់នៅទូទាំងខេត្តព្រះវិហារ។

កសិកររូបនេះបានបន្តឱ្យដឹងថា ៖

“កសិករមានការនិយមចូលចិត្តទិញពូជនេះយកទៅដាំជាង​ពូជផ្សេងៗ ដែលក្នុងមួយខែៗខ្ញុំអាចរកបាន ៧០០ ទៅ ៨០០ដុល្លារ ពីការលក់ពូជនេះ។”

ដោយមានការសិក្សា និងមានជំនាញផ្សុំាផ្ទាល់ លោកក៏បានស្រាវជ្រាវធ្វើយ៉ាងណាឱ្យកូនចន្ទីដែល​ផ្សុំាបានមានគុណភាពល្អ និងអាចផ្ដល់ទិន្នផលខ្ពស់ដល់កសិករផងដែរ។ សម្រាប់លោកផ្ទាល់ លោកក៏ណែនាំឱ្យប្រជាកសិករប្រើប្រាស់ពូជនេះក្នុងការដាំដុះផងដែរ ថ្វីបើវាមានគ្រាប់ធំ ត្រូវតាម ស្តង់ដារនាំចេញ ហើយងាយស្រួលក្នុងការយកទៅកែច្នៃបន្តទៀត ព្រោះថាគ្រាប់មានរសជាតិ ឆ្ងាញ់។

យោងតាមសេចក្តីព្រាងគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ បានបង្ហាញឲ្យ​ដឹងថា បច្ចុប្បន្នកម្ពុជាមានខេត្តចំនួន១០ ដែលមានផ្ទៃដីដាំដុះស្វាយចន្ទី។ ខេត្តទាំង១០នេះ រួមមាន ខេត្តកំពង់ធំ រតនគិរី ក្រចេះ កំពង់ចាម ព្រះវិហារ ស្ទឹងត្រែង ឧត្តរមានជ័យ ត្បូងឃ្មុំ មណ្ឌលគិរី និងសៀមរាប។ យ៉ាងណាមិញ ផលិតផល​គ្រាប់​ស្វាយចន្ទី​ឆៅ ក្នុង​ពិភពលោក មាន​ការ​កើនឡើង ១២ ដង ក្នុងរយៈពេល ៥០ ឆ្នាំ ចុង​ក្រោយ​នេះ ពោល​គឺ​ចាប់​ពី​តិច​ជាង ៣០០ ០០០ តោន ក្នុងឆ្នាំ ១៩៦១ ដល់ ៣,៧ លាន តោន ក្នុងឆ្នាំ ២០០៨។

ជាការកត់សម្គាល់ ការដាំដុះមាន​ការ​កើនឡើង​នៅ​ប៉ុន្មាន​ទសវត្សរ៍​ចុងក្រោយ​នេះ ហើយ​ផលិតផល​ស្ទើរតែ​កើនឡើង​ទ្វេ​ដង​ពី​ឆ្នាំ ២០០០ ដល់ ២០០៨ ដោយសារ​ការ​កើនឡើង ២៧ ភាគរយ នូវ​ផ្ទៃ​ដីដាំ​ដុះ​ក្នុង​ពិភពលោក ហើយ​ទិន្នផល​ជា​មធ្យម​ក្នុង​ពិភពលោក​កើន​ឡើង​ជាង ៥០ ភាគរយ។ នេះបើតាម​ក្រសួង កសិកម្ម រុក្ឋាប្រមាញ់ និងនេសាទ។

គួររំលឹកផងដែរថា នៅ​ក្នុង​ឆ្នាំ ២០២២ កម្ពុជា​នាំចេញ​គ្រាប់​ស្វាយចន្ទី​ឆៅ​ទៅ​ទីផ្សារ​អន្តជាតិ ៦៧​ម៉ឺនតោន គិតជា​ទឹកប្រាក់ ១​ពាន់ ៧៧ លាន​ដុល្លារ​អាមេរិក ក្នុង​នោះ​ប្រទេស​ដែល​នាំចូល​គ្រាប់​ស្វាយ​ចន្ទី​ពី​កម្ពុជា មាន​ជា​អាទិ៍ ប្រទេស វៀតណាម ជប៉ុន និង ចិន ខណៈ​ប្រទេស​ផ្សេងៗ​ទៀត​ក៏​កំពុង​តែ​សម្លឹង​មើល​ឱកាស​ក្នុង​ការ​នាំចូល​គ្រាប់​ស្វាយចន្ទី​កម្ពុជា​ទៅ​កាន់​ទីផ្សារ​ប្រទេស​ខ្លួនដែរ៕