សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNN បានរាយការណ៍ថា ចិនបានបញ្ចូលឧបករណ៍ប្រើប្រាស់ក្នុងផ្ទះបន្ថែមទៀតទៅក្នុងបញ្ជីផលិតផលនៃគម្រោងពាណិជ្ជកម្មអ្នកប្រើប្រាស់ ជាមួយនឹងការឧបត្ថម្ភធន ឬ ការបញ្ចុះតម្លៃរហូតដល់ ២០ ភាគរយ ក្នុងកិច្ចខិតខំប្រឹងប្រែងដើម្បីស្តារតម្រូវការក្នុងវិស័យគ្រួសារដែលធ្លាក់ចុះ។
យោងតាមឯកសារដែលចេញដោយអ្នករៀបចំផែនការរដ្ឋ និងក្រសួងហិរញ្ញវត្ថុរបស់ចិន បានឲ្យដឹងថា ចង្ក្រានមីក្រូវ៉េវ ម៉ាស៊ីនចម្រោះទឹក ម៉ាស៊ីនលាងចាន និងចង្ក្រានបាយ នឹងត្រូវបានរួមបញ្ចូលនៅក្នុងគម្រោងពាណិជ្ជកម្មសម្រាប់គ្រឿងប្រើប្រាស់ក្នុងផ្ទះនៅឆ្នាំនេះ។ ពលរដ្ឋទិញសម្ភារៈទាំងនេះអាចទទួលបានការឧបត្ថម្ភធនពីរដ្ឋ ឬការបញ្ចុះតម្លៃរហូតដល់ ២០ ភាគរយ។ បន្ថែមពីនេះ ទូរសព្ទដៃ ថេប្លេត នាឡិកាឆ្លាតវៃ និងខ្សែដៃឆ្លាតវៃដែលមានតម្លៃក្រោម ៦ ០០០ យ័ន (៨១៨ ដុល្លារ) អាចទទួលបានការឧបត្ថម្ភធនពីរដ្ឋ ឬ ការបញ្ចុះតម្លៃ ១៥ ភាគរយ។ យ៉ាងណាក្ដី ទោះបីជាសេចក្តីថ្លែងការណ៍នេះមិនបានបញ្ជាក់ពីការចំណាយសរុបចំពោះការលើកទឹកចិត្តនោះក៏ដោយ ប៉ុន្តែរហូតមកដល់ពេលនេះ រដ្ឋាភិបាលចិនបានបែងចែក ៨១ ពាន់លានយ័ន (១១,០៤ ពាន់លានដុល្លារ) សម្រាប់ការធ្វើពាណិជ្ជកម្មទំនិញប្រើប្រាស់ដើម្បីជំរុញការប្រើប្រាស់នៅឆ្នាំ២០២៥ ។
វិធានការថ្មីនេះគឺជាផ្នែកមួយនៃផែនការទូលំទូលាយរបស់ចិនដើម្បីជំរុញកំណើនសេដ្ឋកិច្ចក្នុងឆ្នាំ២០២៥ ដោយសារវិបត្តិអចលនទ្រព្យធ្វើឲ្យចំនួនអ្នកប្រើប្រាស់ធ្លាក់ចុះធ្ងន់ធ្ងរ និងប៉ះពាល់ដល់ការចំណាយគ្រួសារ។ ជាលទ្ធផល សេដ្ឋកិច្ចចិនត្រូវបានរងផលប៉ះពាល់ ដោយអ្នកសេដ្ឋកិច្ច និងទីប្រឹក្សាគោលនយោបាយបានជំរុញឱ្យមានសកម្មភាពជាបន្ទាន់ដើម្បីលើកទឹកចិត្តដល់ការចំណាយរបស់គ្រួសារ។ លោក Xu Tianchen សេដ្ឋវិទូជាន់ខ្ពស់នៅ Economist Intelligence Unit រំពឹងថា ការឧបត្ថម្ភធនពីរដ្ឋជាសរុបនឹងកើនឡើងទ្វេដងដល់ ៣០០ ពាន់លានយ័នក្នុងឆ្នាំ ២០២៥ ។ យ៉ាងណាមិញ ទីក្រុងប៉េកាំងមិនមានបំណងឧបត្ថម្ភធនដល់អ្នកមានដែលចំណាយលើអីវ៉ាន់ថ្លៃៗនោះទេ ប៉ុន្តែមានការឧបត្ថម្ភធន ៥០០ យ័នលើទូរស័ព្ទ និងថេបប្លេត។
កាលពីឆ្នាំមុន ចិនបានបញ្ជេញប្រហែល ១៥០ ពាន់លានយ័នពីប័ណ្ណរតនាគារពិសេស ១ ទ្រីលានយន់ ដើម្បីឧបត្ថម្ភធនលើការទិញសម្ភារៈថ្មីៗមកជំនួសគ្រឿងប្រើប្រាស់ចាស់ៗដូចជា រថយន្ត កង់ និងទំនិញផ្សេងៗទៀត។ ជាលទ្ធផល យុទ្ធនាការទទួលបានផលវិជ្ជមាន។ លោក Li Gang មន្ត្រីមកពីក្រសួងពាណិជ្ជកម្មលើកឡើងថា យុទ្ធនាការនេះបានជំរុញការលក់រថយន្តបានចំនួន ៩២០ ពាន់លានយន់ (១២៥,៤ ពាន់លានដុល្លារ) និង ការលក់គ្រឿងប្រើប្រាស់ក្នុងផ្ទះបាន ២៤០ ពាន់លានយ័ន (៣២,៧៣ ពាន់លានដុល្លារ) ក្នុងឆ្នាំ ២០២៤ ។
កាលពីសប្តាហ៍មុន មន្ត្រីរៀបចំផែនការរដ្ឋម្នាក់ លើកឡើងថា ចិននឹងបង្កើនមូលនិធិក្នុងទំហំធំពីប័ណ្ណរតនាគារដែលមានរយៈពេលយូរបំផុតនៅឆ្នាំ ២០២៥ ដើម្បីជំរុញការទិញអីវ៉ាន់ថ្មី និងគម្រោងពាណិជ្ជកម្មទំនិញប្រើប្រាស់។ ។ គ្រឿងបរិក្ខារដែលប្រើប្រាស់ក្នុងវិស័យព័ត៌មានវិទ្យា និងវិស័យកសិកម្មនឹងត្រូវបានដាក់បញ្ចូលក្នុងយុទ្ធនាការនេះ ជាមួយនឹងការផ្តោតលើឧបករណ៍ទំនើប ឆ្លាតវៃ និងបៃតង។ តួលេខនៃការផ្តល់មូលនិធិសម្រាប់គម្រោងនេះនឹងត្រូវបានចេញផ្សាយក្នុងអំឡុងពេលកិច្ចប្រជុំសភាប្រចាំឆ្នាំនៅក្នុងខែមីនាខាងមុខនេះ។ កាលពីឆ្នាំមុន ចិនបានកំណត់ថវិកាសរុបចំនួន ៣០០ ពាន់លានយ័នសម្រាប់គំនិតផ្តួចផ្តើមទាំងនេះ។
ទន្ទឹមនឹងនេះ មេដឹកនាំកំពូលៗរបស់ចិនបានប្តេជ្ញាថានឹងជំរុញការប្រើប្រាស់យ៉ាងខ្លាំងក្លា និងពង្រីកតម្រូវការក្នុងស្រុកគ្រប់ទិសដៅនៅឆ្នាំនេះ។ លើសពីនេះ បុគ្គលិករដ្ឋាភិបាលរាប់លាននាក់នៅទូទាំងប្រទេសចិនត្រូវបានផ្តល់ការដំឡើងប្រាក់ឈ្នួល ដែលជាផ្នែកនៃកិច្ចខិតខំប្រឹងប្រែងដើម្បីបង្កើនការប្រើប្រាស់។ លោក Lynn Song ប្រធានសេដ្ឋវិទូនៅក្រុមហ៊ុន ING រំពឹងថា គោលនយោបាយគាំទ្រកាន់តែច្រើនក៏ដូចជាឥទ្ធិពលមូលដ្ឋានគាំទ្រកាន់តែច្រើននឹងជួយឱ្យកំណើននៃការលក់រាយស្ទុះងើបឡើងវិញនៅឆ្នាំ ២០២៥។ ការស្ទុះងើបឡើងវិញនៃការប្រើប្រាស់គ្រួសារនឹងអាស្រ័យលើស្ថិរភាពតម្លៃទ្រព្យសកម្ម និងទំនុកចិត្តលើការងារផងដែរ៕
Account
Security
Favourite Content