ភ្នំពេញ ៖​ ប្រមុខដឹកនាំរាជរដ្ឋាភិបាល សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា គោលការណ៍ថ្មីរបស់ធនាគារជាតិនៃកម្ពុជា ពាក់ព័ន្ធនឹងការប្រើប្រាស់ក្រដាស់ប្រាក់ដុល្លារ ដែលមានសភាពចាស់ ឬរហែកនៅខេត្តសៀមរាប គឺជាជំហានសាកល្បង (pilot) ដើម្បីអាចឱ្យធនាគារជាតិនៃកម្ពុជាធ្វើការវាយតម្លៃ និងយកជាមូលដ្ឋាន សម្រាប់រៀបចំផែនការឱ្យបានជាក់លាក់មុននឹងប្រកាសដាក់ឱ្យអនុវត្តគោលការណ៍ថ្មីនៅទូទាំងប្រទេសក្នុងពេលឆាប់ៗខាងមុខនេះ។

យ៉ាងណាក៏ដោយ បើទោះបីជាគោលការណ៍ថ្មីកំពុងដាក់ឱ្យអនុវត្តជាជំហានសាកល្បងក្តី ក៏ប្រជាជន និងបណ្តាអាជីវករនៅខេត្តសៀមរាប បានបង្ហាញការសាទរ និងពេញចិត្តចំពោះជាខ្លាំង ជាពិសេស បានបង្ករភាពងាយស្រួល និងលើកទឹកចិត្តដល់ភ្ញៀវទេសចរបរទេសក្នុងការចាយវាយនៅក្នុងតំបន់ទេសចរណ៍ប្រវត្តិសាស្ត្រមួយនេះ។

ជាមួយគ្នានេះផងដែរ បណ្តាអាជីវករដែលកំពុងប្រកបអាជីវកម្មនៅក្នុងខេត្តសៀមរាបបានសំណូមពរដល់ប្រជាជន ក៏ដូចជាអាជីវករទទៃទៀតដែលមិនទាន់ដឹងអំពីការអនុវត្តនូវគោលថ្មីនេះ សូមទទួលយកក្រដាស់ប្រាក់ដុល្លារដែលមានសភាពចាស់ ឬរហែកបន្តិចបន្តិច លើកលែងតែក្រដាស់ប្រាក់ដុល្លារ ដែលមានសភាពចាស់ខ្លាំងពេក ឬរហែកដាច់ ព្រោះបណ្តាធនាគារនៅខេត្តសៀមរាប​ រីករាយក្នុងការទទួលយកក្រដាស់ប្រាក់ដុល្លារដែលមានសភាពចាស់ ឬរហែកតិចតួចស្របតាមការណែនាំរបស់រាជរដ្ឋាភិបាល។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងអរគុណចំពោះបណ្តាធនាគារ អាជីវករ អ្នកប្ដូរប្រាក់ ក៏ដូចជាប្រជាពលរដ្ឋនៅក្នុងខេត្តសៀមរាប ដែលបានចូលរួមអនុវត្តនូវគោលការណ៍ថ្មីរបស់ធនាគារជាតិនៃកម្ពុជា ពាក់ព័ន្ធនឹងការប្រើប្រាស់ក្រដាស់ប្រាក់ដុល្លារដែលមានសភាពចាស់ ឬរហែក។

សម្តេចធិបតី បានលើកឡើងថា ៖ «មានបងប្អូនជាច្រើនបានចោទសួរថា ហេតុអ្វីបានជាធនាគារជាតិមិនដាក់ឱ្យអនុវត្តនៅទូទាំងប្រទេសតែម្ដង? ការដាក់ឱ្យអនុវត្តន៍នៅខេត្តសៀមរាបនេះ ជាជំហានសាកល្បង (pilot) ដើម្បីធនាគារជាតិអាចធ្វើការវាយ​​តម្លៃ និងយកជាមូលដ្ឋានសម្រាប់រៀបចំផែនការឱ្យបានជាក់លាក់មុននឹងប្រកាសដាក់ឱ្យអនុវត្តគោលការណ៍ថ្មីនេះនៅទូទាំងប្រទេសក្នុងពេលឆាប់ៗខាងមុខ។​

គួររំលឹកដែរថា កាលពីថ្ងៃទី២១ ខែកក្កដា ឆ្នាំ២០២៤ កន្លងមកនេះ ធនាគារជាតិនៃកម្ពុជា បានដាក់ចេញយន្តការបន្ទាន់ចំនួន ៤​​ និងយន្តការបន្តទៀត ដើម្បីសម្របសម្រួលចរាចរណ៍ក្រដាសប្រាក់ដុល្លារអាមេរិកនៅខេត្តសៀមរាប​ ជាពិសេសឆ្លើយតបនឹងបញ្ហាលំបាកពាក់ព័ន្ធនឹងការចាយវាយក្រដាសប្រាក់ដុល្លារអាមេរិកដែលមានសភាពចាស់ ឬប្រឡាក់ដែលបង្ករជាផលលំបាកដល់អាជីវករនៅក្នុងខេត្តមួយនេះ។

គួរកត់សម្គាល់ថា យន្តការបន្ទាន់ចំនួន ៤ ដែលត្រូវអនុវត្តនៅខេត្តសៀមរាប រួមមាន ៖ ១/- តម្រូវឱ្យសាខាធនាគារពាណិជ្ជនៅក្នុងខេត្តសៀមរាប ទទួលយកប្រាក់ដុល្លារអាមេរិកចាស់ ឬ ប្រឡាក់ ដោយមិនទាមទារកម្រៃសេវាពីអតិថិជនរបស់ខ្លួន លើកលែងតែក្រដាសនោះជាប្រាក់ក្លែងក្លាយ។  ២/- ក្នុងករណីក្រដាសប្រាក់ដុល្លារចាស់ខ្លាំងដែលគិតថាមិនគួរបន្តឱ្យចរាចរនៅលើទីផ្សារបាន ធនាគារពាណិជ្ជនៅក្នុងខេត្តសៀមរាបត្រូវបញ្ជូនបន្តទៅប្តូរយកក្រដាសប្រាក់ថ្មីនៅសាខាធនាគារជាតិខេត្តសៀមរាប ដោយពុំមានគិតកម្រៃសេវា និងពុំចាំបាច់រង់ចាំផ្ញើទៅទីស្នាក់ការកណ្តាលរបស់ធនាគារពាណិជ្ជនៅរាជធានីភ្នំពេញនោះទេ។

៣/- តម្រូវឱ្យគ្រឹះស្ថានធនាគារនិងហិរញ្ញវត្ថុទាំងអស់នៅខេត្តសៀមរាបដាក់ក្រដាសប្រាក់ដុល្លារអាមេរិកប្រភេទ ២០ដុល្លារអាមេរិក និង៥០ ដុល្លារអាមេរិក ជំនួសក្រដាសប្រាក់ដុល្លារអាមេរិកប្រភេទ ១០០ ដុល្លារអាមរិក នៅក្នុងម៉ាស៊ីនដកប្រាក់ (ATMs) ដើម្បីសម្រួលដល់ការចាយវាយរបស់ភ្ញៀវទេសចរ។ ដោយឡែក ការដាក់ប្រាក់បញ្ញើតាមម៉ាស៊ីនដាក់ប្រាក់គឺនៅទទួលគ្រប់ប្រភេទក្រដាសប្រាក់ដុល្លារអាមេរិក។

៤/- រៀបចំផ្សព្វផ្សាយទៅកាន់អាជីវករប្តូរប្រាក់ ម្ចាស់សណ្ឋាគារ និងភោជនីយដ្ឋាន ដើម្បីឱ្យបានយល់កាន់តែច្បាស់ និងគាំទ្រចំពោះវិធានការដែលបានដាក់ចេញខាងលើ និងត្រៀមសហការជាមួយធនាគារជាតិនៃកម្ពុជាក្នុងការអនុវត្តយន្តការបន្តទៀត។

ចំណែកឯ យន្តការបន្តទៀតមាន ២​ យន្តការ។ ១/- ជំរុញការប្រើប្រាស់កម្មវិធីទូរស័ព្ទ Bakong Tourist App ដើម្បីគាំទ្រវិស័យទេសចរណ៍នៅកម្ពុជា តាមរយៈការជួយសម្រួលដល់ការទូទាត់របស់ភ្ញៀវទេសចរអន្តរជាតិ ដែលអញ្ជើញមកកម្សាន្តនៅប្រទេសកម្ពុជា និង២/- សហការជាមួយក្រុមហ៊ុនលក់ម៉ាស៊ីនរាប់ស្រាល់ជ្រើស ដើម្បីកំណត់លក្ខខណ្ឌស្តង់ដារមួយ ដែលមានសង្គតិភាពរវាងម៉ាស៊ីនរាប់ស្រាល់ជ្រើសរបស់ធនាគារជាតិ និងធនាគារពាណិជ្ជ ក៏ដូចជារវាងម៉ាស៊ីនរបស់ធនាគារពាណិជ្ជនិងធនាគាពាណិជ្ជ៕