ភ្នំពេញ ៖ ក្រុមហ៊ុនវិនិយោគិនកម្ពុជា-ចិន បានរៀបចំព្រឹត្តិការណ៍ពិព័រណ៌ផលិតផលចិននៅកម្ពុជា ឆ្នាំ២០២៥ ដោយរួមគ្នាដាក់តាំងបង្ហាញសេវាកម្ម និងផលិតផលចិនជាច្រើន ទាក់ទងនឹងសម្ភារៈបរិក្ខារ អគ្គិសនី គ្រឿងអេឡិចត្រូនិក សម្ភារៈសំណង់ គ្រឿងសង្ហារឹម សម្ភារៈប្រើប្រាស់ក្នុងគេហដ្ឋាន ការប្រឹក្សាយោបល់ផ្នែកបច្ចេកទេស និងគម្រោងវិនិយោគជាដើម ប្រកដោយគុណភាពខ្ពស់ ដើម្បីឆ្លើយតបទៅនឹងតម្រូវការទីផ្សារ និងបង្កើនទំនុកចិត្តលើម៉ាកទំនិញនៃប្រទេសទាំងពីរ និងស្វែងរកឱកាសចូលរួមគម្រោងជាមួយគ្នា។

ព្រឹត្តិការណ៍ពិព័រណ៌ផលិតផលចិននៅកម្ពុជា ឆ្នាំ២០២៥ មួយនេះមានរយៈពេល ៣ថ្ងៃ ចាប់ពីថ្ងៃទី២៨ ដល់ថ្ងៃទី៣០ ខែកញ្ញា ឆ្នាំ២០២៥ នៅមជ្ឍមណ្ឌលសន្និបាត និងពិព័រណ៌កោះពេជ្រ ដែលជាសក្ខីភាព និងការចូលរួមចំណែកយ៉ាងសំខាន់ក្នុងការជំរុញសកម្មភាពពាណិជ្ជកម្មនៅក្នុងប្រទេសកម្ពុជា និងជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគរវាងកម្ពុជា-ចិន ជួយបង្កើនគុណតម្លៃនៃទំនាក់ទំនងកិច្ចសហប្រតិបត្តិការទ្វេភាគី ក្នុងស្មារតីលើកកម្ពស់មិត្តភាពដ៏រឹងមាំ និងស៊ីជម្រៅ។

លោក CHENG XIUGEN ប្រធានក្រុមហ៊ុន ខេមបូឌាន ហ្វ្រែន អ៊ុនម៉ាន អិកស៊ីប៊ិសិន (CAMBODIAN FRANK INMAN EXHIBITION CO.,LTD) បានឱ្យដឹងថា ភាពរីកចម្រើនយ៉ាងឆាប់រហ័សនៃពាណិជ្ជកម្មចិន-កម្ពុជា គឺដោយសារតែការចូលជាធរមាននៃកិច្ចព្រមព្រៀងពាណិជ្ជកម្មសេរីចិន-កម្ពុជា និង RCEP ដែលបានបង្កើតលក្ខខណ្ឌពាណិជ្ជកម្មកាន់តែអំណោយផលសម្រាប់អាជីវកររបស់ប្រទេសទាំងពីរ ។ ក្នុងការផ្លាស់ប្តូរ និងកិច្ចសហប្រតិបត្តិការរវាងធុរកិច្ចចិន និងកម្ពុជា ជាឱកាសដើម្បីពង្រឹងទំនាក់ទំនងកិច្ចសហប្រតិបត្តិការពង្រីកទីផ្សារ និងសម្រេចបាននូវការអភិវឌ្ឍន៍រួមគ្នា បន្តការលើកកម្ពស់កិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-កម្ពុជា ឱ្យដល់ចំណុចកំពូល ដែលនាំមកនូវផលប្រយោជន៍កាន់តែច្រើនដល់ប្រជាជនរបស់ប្រទេសទាំងពីរ ។

ថ្លែងក្នុងឱកាសពិព័រណ៌ផលិតផលចិននៅកម្ពុជា ឆ្នាំ២០២៥ នេះដែរ ឯកឧត្តម សំហេង បូរ៉ា រដ្ឋលេខាធិការ តំណាងលោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានមានប្រសាសន៍ថា ការណ៍នេះ នឹងនាំមកនូវកាលានុវត្តភាពរួមគ្នាលើផ្នែកធុរកិច្ច វិនិយោគ និងការស្វែងរកកិច្ចសហការ ដើម្បីផលប្រយោជន៍រួម ។

ឯកឧត្តមរដ្ឋលេខាធិការ បានបង្ហាញពីក្ដីសង្ឃឹមថា តាមរយៈព្រឹត្តិការណ៍ពិព័រណ៍រយៈពេល៣ថ្ងៃនេះ ពាណិជ្ជករ សហគ្រិន វិនិយោគិន ធុរជនទាំងក្នុង និងក្រៅប្រទេស នឹងបានជួបប្រាស្រ័យទាក់ទងគ្នាដោយផ្ទាល់ ដើម្បីបង្កើតបណ្តាញផ្លាស់ប្តូរព័ត៌មានធុរកិច្ច និងវិនិយោគ ព្រមទាំងលើកទឹកចិត្តដល់ក្រុមហ៊ុន និងដៃគូពាក់ព័ន្ធទាំងអស់ឱ្យបន្តអនុវត្តនូវគំនិតផ្តួចផ្តើមក្នុងការរៀបចំពិព័រណ៍ពាណិជ្ជកម្មនានា នៅប្រទេសកម្ពុជា ប្រកបដោយគុណភាព ប្រសិទ្ធភាព និងលើកកម្ពស់ការយល់ដឹងពីវិស័យពាណិជ្ជកម្ម ធុរកិច្ច និងវិនិយោគនៅកម្ពុជា ដើម្បីធានាបាននូវភាពប្រកួតប្រជែងខ្ពស់ ។

សូមបញ្ជាក់ថា ៖ តាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា គិតត្រឹម៨ខែ ឆ្នាំ២០២៥នេះ ទំហំពាណិជ្ជកម្មសរុបទ្វេភាគីមានចំនួនជាង ១២,៦ពាន់លានដុល្លារអាម៉េរិក មានកំណើនប្រមាណ ២៦ភាគរយធៀបនឹងទំហំពាណិជ្ជកម្មក្នុង រយៈពេលដូចគ្នាក្នុងឆ្នាំ២០២៤។ ក្នុងនោះ កម្ពុជានាំចេញទៅចិនមានទំហំទឹកប្រាក់ប្រមាណ ១ពាន់លានដុល្លារអាម៉េរិក និងកម្ពុជានាំចូលពីចិនមានចំនួន ១១,៦ ពាន់លានដុល្លារអាម៉េរិក ៕ ដោយ / គ្រី សម្បត្តិ