ភ្នំពេញ ៖ ក្នុងរយៈពេលជាង ២ទសវត្សរ៍ចុងក្រោយនេះ វិស័យធនាគារ និងហិរញ្ញវត្ថុ បានរីកចម្រើនគួរឱ្យកត់សម្គាល់ ដោយក្នុងនោះបានរួមចំណែកជួយជំរុញកំណើនសេដ្ឋកិច្ចជាតិ កាត់បន្ថយភាពក្រីក្រ លើក​កម្ពស់ជីវភាពរស់នៅរបស់ប្រជាពលរដ្ឋ និងជំរុញកំណើនបរិយាបន្នហិរញ្ញវត្ថុនៅទូទាំងប្រទេស។

ជាក់ស្ដែង គិតត្រឹមដំណាច់ឆមាសទីមួយឆ្នាំ២០២៥នេះ ទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុ មានកំណើន ៧% ឬប្រមាណជាង ៩៧ប៊ីលានដុល្លារអាម៉េរិក។ ក្នុងនោះ ឥណទានអតិថិជន​កើនឡើង ៤,៥% ដល់ជាង ៦២ប៊ី លានដុល្លារអាម៉េរិក។ រីឯប្រាក់បញ្ញើអតិថិជនមានកំណើនជាង ១៤% ដល់ប្រមាណជាង ៦១,៤ប៊ីលាន ដុល្លារអាម៉េរិក និងដើមទុនមានកំណើន ៥,៥% ដល់ ១០,៤ប៊ីលានដុល្លារអាម៉េរិក បើប្រៀបធៀបទៅនឹងដំណាច់ឆមាសទី១ ឆ្នាំ២០២៤។ នេះបើតាមការឱ្យដឹងពីលោក ឌិត សុចល តំណាងសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា។

ថ្លែងក្នុងកម្មវិធី​បណ្តុះបណ្តាលអ្នកសារព័ត៌មាន និងអ្នកផលិតមាតិកា អំពីវិស័យធនាគារ និងហិរញ្ញវត្ថុ និងចំណេះដឹងផ្នែកហិរញ្ញវត្ថុ ឆ្នាំ២០២៥ កាលពីពេលថ្មីៗនេះ លោក ឌិត សុចល បានបន្តឱ្យដឹងថាគ្រឹះស្ថានធនាគារ និងហិរញ្ញវត្ថុ បានបន្តចូលរួមជំរុញ និងលើកកម្ពស់បរិយាបន្នហិរញ្ញវត្ថុ តាមរយៈ​ការ​ផ្តល់​សេវាហិរញ្ញវត្ថុកាន់តែមានប្រសិទ្ធភាព រហ័ស និងទូលំទូលាយជាងមុន ស្របទៅតាមយុទ្ធ​សាស្ត្រ​បរិយាបន្នហិរញ្ញវត្ថុជាតិ។ ជាលទ្ធផល គិតត្រឹមរយៈពេលដូចគ្នានេះ ចំនួនគណនីប្រាក់បញ្ញើអតិថិជនកើនដល់ប្រមាណ ២៧,៥​លាន​គណនី និងគណនីឥណទានអតិថិជនកើនដល់ដល់ប្រមាណ៤,៣លានគណនី។ ជាមួយគ្នានេះ ដើម្បីបន្តចូលរួមអភិវឌ្ឍវិស័យធនាគារ និងហិរញ្ញវត្ថុឱ្យកាន់តែមានភាពធន់ ស្ថិរភាព និងរឹងមាំ សមាគមធនាគារ​ និងសមាគមមីក្រូហិរញ្ញវត្ថុ ក៏បានដាក់ចេញនូវគោលនយោបាយ និង គោលការណ៍​មួយចំនួនក្នុងការពង្រឹងការអនុវត្តការផ្តល់កម្ចីប្រកបដោយការទទួលខុសត្រូវ និងការអប់រំ​ប្រជាពល​រដ្ឋ​អំពីការប្រើប្រាស់សេវាហិរញ្ញវត្ថុប្រកបដោយការទទួលខុសត្រូវផងដែរ។

យ៉ាងណាក៏ដោយ បញ្ហាប្រឈមនានានៅតែបន្តកើតមាន ដូច្នេះដើម្បីបន្តដោះស្រាយ សមាគមទាំង​ពីរ​បាន​បង្កើតកិច្ចសន្ទនាជាមួយភាគីពាក់ព័ន្ធ បង្កើតយន្តការផ្តល់ព័ត៌មាន និងវគ្គបណ្តុះបណ្តាលជា​បន្តបន្ទាប់ ក្នុងនោះក៏មាននូវវគ្គបណ្ដុះបណ្ដាលអ្នកសារព័ត៌មាន និងអ្នកផលិតមាតិកា អំពីវិស័យធនាគារ និងហិរញ្ញវត្ថុ និងចំណេះដឹងផ្នែកហិរញ្ញវត្ថុ ដែលបានប្រព្រឹត្តទៅនាថ្ងៃទី ១ និងទី១៥ ខែសីហា ឆ្នាំ២០២៥កន្លងទៅថ្មីៗនេះផងដែរ។

គួរបញ្ជាក់ថា គិតត្រឹមដំណាច់ខែ​មិថុនា ឆ្នាំ២០២៥នេះ សមាគមទាំងពីរមានសមាជិកសរុបចំនួន ២០៩គ្រឹះស្ថាន​ដែលទទួលបានអាជ្ញាប័ណ្ណដំណើការអាជីវកម្មពីធនាគារជាតិនៃកម្ពុជា។ គ្រឹះស្ថានសមាជិករបស់សមាគមធនាគារនៅ កម្ពុជាមានចំនួន ៧៧ ក្នុងនោះរួមធនាគារពាណិជ្ជ ៦០ ធនាគារឯកទេស ៨ តំណាងការិយាល័យធនាគារ បរទេស ៥ និងសមាជិក៤ទៀតរួមមាន សមាគម សហព័ន្ធហិរញ្ញវត្ថុ និងបច្ចេកវិទ្យានៃកម្ពុជា សមាគមមីក្រូ ហិរញ្ញវត្ថុកម្ពុជា គ្រឹះស្ថាន មីក្រូហិរញ្ញវត្ថុ ទទួលប្រាក់បញ្ញើ និងសាជីវកម្មធានាឥណទានកម្ពុជា។

ដោយឡែកសមាជិក សមាគមមីក្រូហិរញ្ញ វត្ថុកម្ពុជាមានចំនួន ១៣២ ដែលរួមមានគ្រឹះស្ថាន​មីក្រូ​ហិរញ្ញ​វត្ថុទទួល ប្រាក់បញ្ញើ ៤ គ្រឹះស្ថានមីក្រូ ហិរញ្ញវត្ថុមិនទទួលប្រាក់បញ្ញើ ៨២ គ្រឹះស្ថានភតិ​សន្យាហិរញ្ញវត្ថុ ១២ គ្រឹះស្ថានឥណទានជនបទ ៣២ និងធនាគារពាណិជ្ជចំនួន២។ គ្រឹះស្ថានធនាគារ និងហិរញ្ញវត្ថុជាសមាជិក ទាំងអស់មានបុគ្គលិក បម្រើការសរុប ប្រមាណជាង ៨ម៉ឺននាក់នៅទូទាំង​ប្រទេស ហើយបានផ្តល់ជូនអតិថិ ជននូវសេវា ហិរញ្ញវត្ថុច្រើនប្រភេទ ដែលសេវាចំបងៗរួមមាន សេវាប្រាក់សន្សំ(បញ្ញើ) សេវាកម្ចី(ឥណ ទាន) និងសេវាទូទាត់៕