បរទេស ៖​ យោងតាមប្រភពព័ត៌មានពី Al Jazeera បានរាយការណ៍ថា ប្រធានាធិបតីអាម៉េរិក Donald Trump មានបំណងដាក់ពន្ធ ៥០% លើការនាំចូលទង់ដែង ដើម្បីជំរុញការផលិតក្នុងស្រុក។

នៅក្នុងកិច្ចប្រជុំគណៈរដ្ឋមន្ត្រីនៅសេតវិមាន Trump បានប្រាប់ពីបំណងចង់ប្រកាសពន្ធ ៥០% លើការនាំចូលទង់ដែងនៅពេលក្រោយ ប៉ុន្តែមិនបាននិយាយថាពេលណាពន្ធនឹងចូលជាធរមាននោះទេ ខណៈដែលលោក Howard Lutnick លេខាធិការពាណិជ្ជកម្ម បានលើកឡើងថា ពន្ធគយទំនងជានឹងត្រូវដាក់នៅចុងខែកក្កដា ឬ ថ្ងៃទី ១ ខែសីហា។

បច្ចុប្បន្ននេះ តម្លៃទីផ្សារទង់ដែង Comex របស់អាម៉េរិកបានកើនឡើងដល់កម្រិតខ្ពស់បំផុត ១២% ភាគរយបន្ទាប់ពី Trump បានប្រកាសពីការចង់ដាក់ពន្ធនេះ។ ភាគហ៊ុនរបស់អ្នកផលិតទង់ដែងដ៏ធំបំផុតរបស់ពិភពលោក Freeport-McMoRan ដែលមានមូលដ្ឋាននៅទីក្រុង Phoenix បានកើនឡើងជិត ៥%។  យ៉ាងណាមិញ Freeport បានបង្ហាញក្តីព្រួយបារម្ភថា ការដាក់ពន្ធគយនេះនឹងប៉ះពាល់ដល់សេដ្ឋកិច្ចពិភពលោក ជាមួយនឹងការផ្តល់ជាយោបល់ដល់ Trump ដោយត្រូវផ្តោតលើការជំរុញផលិតកម្មទង់ដែងរបស់អាម៉េរិកវិញ។

អ្នកវិភាគសេដ្ឋកិច្ចអាម៉េរិកបានព្យាករណ៍ថា ពន្ធ ៥០% លើការនាំចូលទង់ដែងនឹងប៉ះពាល់ដល់ក្រុមហ៊ុនអាម៉េរិកដែលប្រើប្រាស់លោហៈនេះ ដោយសារតែប្រទេសនេះពិបាកបំពេញតម្រូវការរបស់ខ្លួន និងពឹងផ្អែកលើការនាំចូលជាច្រើនឆ្នាំមកហើយ។

កាលពីខែកុម្ភៈ កន្លងទៅ រដ្ឋបាល Trump បានប្រកាសពីការស៊ើបអង្កេតលើការនាំចូលទង់ដែងដែលអនុញ្ញាតឱ្យក្រសួងពាណិជ្ជកម្មអាម៉េរិកវិភាគពីផលប៉ះពាល់ពីការនាំចូលលើសន្តិសុខជាតិ។ ការដាក់ចេញវិធានការនេះគឺដើម្បីជំរុញការផលិតទង់ដែងក្នុងស្រុក និងបង្កើនសមត្ថភាពក្នុងការផលិត ដោយសារទង់ដែងគឺជាលោហៈធាតុដ៏សំខាន់ដែលត្រូវបានប្រើប្រាស់ក្នុងការសាងសង់ គ្រឿងអេឡិចត្រូនិច និងឧស្សាហកម្មជាច្រើនទៀត។ ជារៀងរាល់ឆ្នាំ អាម៉េរិកនាំចូលប្រហែលពាក់កណ្តាលនៃតម្រូវការទង់ដែងសរុបរបស់ខ្លួន។ ជាពិសេស ក្នុងរយៈពេលប៉ុន្មានឆ្នាំចុងក្រោយនេះ គម្រោងការជីកយករ៉ែទង់ដែងធំៗនៅទូទាំងអាម៉េរិកប្រឈមមុខនឹងបញ្ហាជាច្រើន។

គួរឲ្យបញ្ជាក់ដែរថា ប្រទេសឈីលី កាណាដា និងប៉េរូ គឺជាអ្នកផ្គត់ផ្គង់ទង់ដែងធំជាងគេចំនួន ៣ ដល់អាម៉េរិក ប៉ុន្តែការនាំចូលពីពួកគេអាចនឹងមិនប្រឈមនឹងពន្ធគយឡើយ ដោយសារពួកគេទាំងបីមានកិច្ចព្រមព្រៀងពាណិជ្ជកម្មសេរីជាមួយអាម៉េរិក។ យ៉ាងណាមិញ លេខាធិការដ្ឋានសេដ្ឋកិច្ចរបស់ម៉ិចស៊ិក ក្រសួងការបរទេសឈីលី និងនាយកដ្ឋានហិរញ្ញវត្ថុរបស់កាណាដា មិនទាន់ឆ្លើយតបភ្លាមៗចំពោះករណីនេះទេ៕